JEREMIA 42 - BUKUIT NE TILIL

Koteebe Johanan Jeremia ng’alek che bunu Jehovah

¹ Kirik anyun kiptainik tugul che bo lugosiek, ak Johanan weritab Karea, ak Jesania weritab Hosaia, ak bik tugul kong’eete ne ming’in agoi ne o,

² ak kolenji maotiot Jeremia, Kisomin kele, kaswech somennyo, ak saiywech Jehovah Kamuktaindeng’ung’, achek tugul che kiging’etu; amu kiging’etu bik che ng’ering’ eng’ bik che chang’, ko u ye igeerech:

³ si kobiit koboruech Jehovah Kamuktaindeng’ung’ oret ne kanyol kebendate, ak kit ne kanyol keyai.

⁴ Kolenji anyun maotiot Jeremia ichek, Kaagasak; ogeero, asae Jehovah Kamuktaindeng’wong’ ko u ng’alekwok; ak kit age tugul ne wolwok Jehovah amwawok kioto; maung’enok kiy.

⁵ Kimwachi anyun ichek Jeremia kolenji, Ingoek Jehovah baoriat ne bo iman ak ko ne kiyani eng’ kwenunnyo, ngot ko magiyai ko u ng’olyot age tugul ne kaiyogunenen Jehovah Kamuktaindeng’ung’ iibwech.

⁶ Ngo ng’olyo ne mie, anan ngo ne ya, kegase it kutitab Jehovah Kamuktaindennyo, ne kiyoktochinin; si kobiit komieit eng’ achek, ye kigas it kutitab Jehovah Kamuktaindennyo.

⁷ Ak kingobata betusiek tamanu, konyonji ng’olyotab Jehovah Jeremia.

⁸ Kiguur anyun inendet Johanan weritab Karea, ak kiptainik tugul che bo lugosiek che kimi koboto inendet, ak bik tugul kong’eete ne ming’in agoi ne o,

⁹ ak kolenji ichek, Mwaei Jehovah Kamuktaindetab Israel ne kioyoktocha aib someng’wong’ kwo tainnyi, ko u ni kole:

¹⁰ Ngot ko ta omeny emoni, ateechok anyun, ama abutok, ak aminak, ama atutok: amu kaawal kabwatutikyuk eng’ yaitiet ne koayaiywok.

¹¹ Amoiywei laitoriatab Babulon, ne oiywei; amoiywei inendet, mwaei Jehovah: amu ami kobotok, si asoruok, ak atiachak eng’ eunnyi.

¹² Ak agonok rirenet, si kobiit korirenak inendet, ak kogonok oweege obe emeng’wong’.

¹³ Ago ngot omwa ole, Magimenye emoni; kot ko mogas it kutitab Jehovah Kamuktaindeng’wong’,

¹⁴ omwae olen, Achicha; kibendi emetab Misri, ole magigeere luget, ama kigase iriaget, ama amech rubet; ak kemeny oloto:

¹⁵ ogas anyun ng’olyotab Jehovah, ee okwek che kiong’etu che o bo Juda; mwaei Jehovah ne bo lugosiek, Kamuktaindetab Israel, ko u ni kole, Ngot ogiiljige otokyige Misri, ak obe otebe oloto;

¹⁶ konamak anyun eng’ oloto, eng’ emetab Misri, rotwetab chok ne oiywei, ak kosubok rubet ne oiywei koriichak eng’ oloto eng’ Misri; ak obekyi oloto.

¹⁷ Igeitu noto eng’ bik tugul che tokyingei Misri kobendi kotebe oloto; begu eng’ rotwetab chok ak eng’ rubet, ak eng’ koroito: ak mami agot agenge eng’ ichek ne ng’etu anan ne chilili eng’ yaitiet ne aipchini.

¹⁸ Amu mwaei Jehovah ne bo lugosiek, Kamuktaindetab Israel, ko u ni kole; Ko u ye kigerong’ji neregekyuk ak neregekyuk che ng’wonen, bik che menyei Jerusalem, kerong’jinok anyun ko u noto neregekyuk che ng’wonen, ye obe Misri: ak oegu che kichubei, ak che kikwong’e ak che kisasei, ak che kichotei; ama ogeere olito kogeny.

¹⁹ Kagong’alal Jehovah agobo okwek, ee okwek che kiong’etu che o bo Juda, kole, Amobe Misri: onai komie ole kaabaorianwok rani.

²⁰ Amu kioyachi kaberberisiet sobonwekwok; amu kioyokta awa oldab Jehovah Kamuktaindeng’wong’, ole, Saiywech Jehovah Kamuktaindennyo; ak imwawech ko u tugul che mwaei Jehovah Kamuktaindennyo, si keyai:

²¹ ak kaamwawok ng’alechato rani; ago ma ogas it kutitab Jehovah Kamuktaindeng’wong’ eng’ kiy age tugul ne kogoyogunena amwawok.

²² Onai anyun komie ole, obegu eng’ rotwetab chok, ak eng’ rubet, ak eng’ koroito, eng’ ole omache obe otebe.