JEREMIA 41 - BUKUIT NE TILIL

Rumisietab Ismael ne kibar Gedalia. Mwetab Ismael

¹ Kinyo anyun Ismael weritab Netania weritab Elisama ne bo iyotetab kaplaitoriat, koboto kiptaiyat age ne o ne bo laitoriat, ak bik taman che kimi koboto inendet, eng’ arawetab tisab, oldab Gedalia weritab Aikam eng’ Mispa; ak kiamis tugul eng’ oloto eng’ Mispa.

² King’et anyun Ismael weritab Netania, ak bichoto taman kimi koboto inendet, ak koeb Gedalia weritab Aikam weritab Sapan eng’ rotwetab chok, ak kobar, ne kiga konde laitoriatab Babulon koek bounindetab emet.

³ Kibar Ismael kogeny Yahudik tugul che kimi koboto Gedalia eng’ Mispa, koboto Kaldeik che kiginyorji oloto, choto ko bikab luget.

⁴ Ak eng’ betut ne bo aeng’ ko kagobar inendet Gedalia, ama nai chi,

⁵ kobwa bik alage kobunu Sekem, Silo, ak Samaria, bik tamanwogik sisiit, che kiga konem tamnokwak ak kogerer ngoroikwak, ko kagotilgei, ak koibu kagochinoik ak tuguk che nyamdut eng’ eunekwak, koibu kobwa gotab Jehovah.

⁶ Ak kiwa Ismael weritab Netania eng’ Mispa kotorokto ichek, koriroti eng’ oret kowendi: ak kingo kagotuiyo ak ichek kolenji, Obwa oldab Gedalia weritab Aikam.

⁷ Ak kingo kagoit kwenutab nganaset, kobar Ismael weritab Netania bichoto, ak kowirji keringet, inendet, ak murenik che kimi ak inendet.

⁸ Ago kibiit bik tamanu eng’ kwenunywa che kimwachi Ismael kolenji, Amebarech: amu kitinye tuguk che kigiuny eng’ mbar, nganok, ak sairik, ak mwanik, ak kumik. Kobagakta anyun, mata kobar ichek eng’ kwenutab tupchosiekwak.

⁹ Kiinyiit anyun Ismael weritab Netania keringonoto bik che kiga kebar, keringet ne kiga kowirji Ismael muswek tugul che bo bik che kiga kobar, kiwirji ole negite Gedalia (keringonoto ko ne kibalei laitoriat Asa amu kiiywei Baasa laitoriatab Israel).

¹⁰ Yeityo komut Ismael bik tugul che king’et eng’ Mispa koek luulenik, agot tibikab laitoriat, koboto bik tugul che king’et eng’ Mispa che kiga konde Nebusaradan kiptaiyatab ribik eutab Gedalia weritab Aikam: kiimut Ismael weritab Netania bichoto koek luulenik, ak koba oldab lagokab Amon.

¹¹ Ago ye kingogas Johanan weritab Karea ak kiptainik tugul che bo lugosiek che kimi koboto inendet, yaitiet tugul ne kiga koyai Ismael weritab Netania,

¹² komut anyun bik tugul, koba kobargei ak Ismael weritab Netania, ak kinyorji inendet ole negite beek che chang’ che mi Gibeon.

¹³ Kingogeer anyun bik tugul che kimi koboto Ismael Johanan weritab Karea, ak kiptainik tugul che bo lugosiek, che kimi koboto inendet, kogasgei anyun mising’.

¹⁴ Kiwelelgei anyun bik tugul che kiga komut Ismael eng’ Mispa koek luulenik, koweek koba ole mi Johanan weritab Karea.

¹⁵ Ago kichilil Ismael weritab Netania eng’ Johanan koboto bikyik sisiit, ak koba oldab lagokab Amon.

¹⁶ Komut anyun Johanan weritab Karea ak kiptainik tugul che bo lugosiek che kimi koboto inendet, bik tugul che king’et eng’ bik che kiga koweech inendet eng’ Ismael weritab Netania, eng’ Mispa, ye kingo kagobar Gedalia weritab Aikam, bikab luget, ak kwonyik, ak lagok, ak kiptainik che kiga komut kogeny eng’ Gibeon:

¹⁷ ak kiba komeny Gerut Kimham, ne mi ole negite Bet-lehem, si kobiit koba agoi Misri,

¹⁸ amu Kaldeik: amu kiiywei ichek, amu kiga kobar Ismael weritab Netania, Gedalia weritab Aikam, ne kiinde laitoriatab Babulon koek bounindetab emet.