JEREMIA 40 - BUKUIT NE TILIL

Kitiachi Jeremia

¹ Kinyonji Jeremia ng’olyot ne kibunu Jehovah, ye kingo kagotiach Nebusaradan kiptaiyatab ribik kwo eng’ Rama, ye kiga komut inendet ko ratat eng’ sirimwek koboto luulenik tugul che bo Jerusalem ak Juda, che kiga kiluul koba Babulon.

² Kinam anyun kiptaiyatab ribik Jeremia, ak kolenji, Kimwa Jehovah Kamuktaindeng’ung’ yaitioni agobo olito;

³ ak kagoib yaitionoto konyo, ak koyai ko u ye kimwa; amu kioyachi Jehovah tengekto, ama ogas it kutinnyi, kagonyonjok anyun kiito.

⁴ Keer anyun-o, katiachin rani eng’ sirimwek che mi eung’ung’. Ngot igeer ile mie kebe tuwai Babulon, inyo kebe, ak aribin komie; ago ngot igeere ile ya kebe tuwai Babulon, itebi: keero, mi emoni tugul taing’ung’; ole igeere ile mie ak konyoljinin iwe, iwe yoto.

⁵ Ak ye kitomo koweek, kole, Weege anyun oldab Gedalia weritab Aikam weritab Sapan, ne kigonde laitoriatab Babulon koek bounindet koba nganasokab Juda, ak komeng’is koboto bik: anan iwe oldo age tugul ole igeere ile nyoljinin iwe. Kiigochi anyun kiptaiyatab ribik amitwogik inendet ak kagochinet ak kounda kwo.

⁶ Kiwa anyun Jeremia oldab Gedalia weritab Aikam eng’ Mispa, ak komeng’is koboto inendet eng’ kwenutab bik che kiga ng’et eng’ emet.

Rumisietab Ismael ne kibar Gedalia. Mweetab Ismael

⁷ Ak kingogas kiptainik tugul che bo lugosiek che kimi emotinwek, icheget ak murenikwak, kole, kogonde laitoriatab Babulon Gedalia weritab Aikam koek bounindet eng’ emet, ak kogonde eunnyi murenik, ak kwonyik, ak lagok, ak bik alak che ki kibananok mising’ eng’ emet, che bo ichek che kima kiluul koba Babulon;

⁸ kobwa anyun oldab Gedalia eng’ Mispa, icheget ko, Ismael weritab Netania, ak Johanan ak Jonatan werikab Karea, ak Seraia weritab Tanumet, ak werikab Epai Netopatindet, ak Jesania weritab Maakatindet, icheget koboto murenikwak.

⁹ Ak kiiyosiechi Gedalia weritab Aikam weritab Sapan bichoto ak murenikwak, kolenji, Amoiywei oot Kaldeik: omeng’isie eng’ emet, ak oot laitoriatab Babulon, si komieit eng’ okwek.

¹⁰ Ago amenye ane Mispa, si kobiit atonone taitab Kaldeik, che bwanjinech: ago oyum okwek divaik, logoekab kemei, ak mwanik, ak onde terenikwok, omeny nganasokwok che koonam.

¹¹ Ko u noto, kingogas Yahudik tugul che kimi Moab, ak che kimi ak lagokab Amon, ak che kimi Edom, koboto che kimi emotinwek tugul, kole, Kigobagach laitoriatab Babulon bik che king’et eng’ Juda, ak kole, kigonde Gedalia weritab Aikam weritab Sapan koboi ichek;

¹² koweek anyun Yahudik tugul eng’ komoswek tugul ole kiga kionji, ak kibwa emetab Juda, ole mi Gedalia, eng’ Mispa, ak kiiyum divaik ak logoek che chang’ che bo kemei.

¹³ Kibwa kogeny Johanan weritab Karea, ak kiptainik tugul che bo lugosiek che kimitei emotinwek, oldab Gedalia eng’ Mispa,

¹⁴ ak kolenji, Tos ingen ile kiiyok Baalis laitoriatab lagokab Amon Ismael weritab Netania kobarin? Ago ma iyan Gedalia weritab Aikam ng’alekwak.

¹⁵ Kong’alalji anyun eng’ ung’ot, Johanan weritab Karea Gedalia eng’ Mispa, kolenji, Kaigai, ichamwa awa abar Ismael weritab Netania, ama naei chi: amu nee anyun si kobarin, si koyesta Yahudik tugul che kigoyumjingei, ak kobek che king’et che bo Juda?

¹⁶ Ago kilenji Gedalia weritab Aikam Johanan weritab Karea, Ma mie iyai kiito: amu imwae lembech agobo Ismael.