JEREMIA 4 - BUKUIT NE TILIL

¹ Ngot iweege, ee Israel, mwaei Jehovah, iweekyinage: ak ngot iiste tuguguk che kiwechei eng’ tainnyu, ko ma keistoin anyun;

² ak iyosie ko u ni, ile, Ko u ye sobei Jehovah, eng’ imanit, eng’ kiruoget, ak eng’ imanda; ak koberurgei bororiosiek eng’ inendet, ak kolosunegei inendet.

³ Amu mwachin Jehovah bikab Juda ak che bo Jerusalem ko u ni kole, Obalu mbareng’wong’, amogol ole mi katok.

⁴ Omuratange obunji Jehovah, oiste irirenikab mugulelwekwok, okwek bikab Juda ak che omenye Jerusalem: si mamong’ neregekyuk che koromen ko u mat, ak kolalyo kot ko maimuchi chi komis, amu yaitietab boisionikwok.

Kit ne biityin bik che masigu

⁵ Omwaite eng’ Juda, ak obarte eng’ Jerusalem: ak omwa ole, Oguut iriaget eng’ emet: owaach mising’ ak omwa ole, Oyumge, ak ongebe nganasok che ng’ototin.

⁶ Onamji barak songoliet kotokyigei Sion: omwei, osoruge, amogage: amu aibu yaitiet eng’ murot ne bo katam, ak ng’emisiet ne o.

⁷ Kamong’ ng’etundo eng’ sondinnyi, ne ng’emindetab bororiosiek, mi oret, kagomong’ eng’ oldanyi; si kobiit koyai emeng’ung’ koguber, ak koek nganasoguk karatia, ama komenyei chi.

⁸ Ogermenege anyun kuniok amu noto, oririe ak oteiye: amu tom koistoeneigei neregek che ng’wonen che bo Jehovah.

⁹ Ak mwaei Jehovah kole, Tun betei eng’ betunoto muguleldab laitoriat, koboto mugulelwekab bounik; ak kokwong’io tisiik, ak kotang’any maotik.

¹⁰ Kiamwa anyun ale, He Kiptaiyat Jehovah! Iman kiiberber mising’ bichu ak Jerusalem, ilenji, Onyoru kalyet; ago ityin rotwetab chok sobondo.

¹¹ Tun kimwachin bichu ak Jerusalem eng’ betunoto, kelenjin, Usyin cheptab bikyuk usonet ne bo mat ne bunu tulonok che churiotin che bo ong’atet, ma ne sesisiei, anan ko ne itililisiei;

¹² nyonjina usonet ne o ne bunu tuguchuto: aruokyini anyun agane ichek.

¹³ Ogeero, togosu ko u bolik, ak u kipchurjuriet karisiekyik che bo luget: chepcheb mbartanyisiekyik kosiir kipsichinik. Bwa eng’ achek! Amu kageng’emech.

¹⁴ Ee Jerusalem, iunde tengekto eng’ muguleldang’ung’, si kesorun. Tebenen kabwatutiguk che yaachen kot kotianit?

¹⁵ Amu mwaitoi waagat ne bunu Dan, ak kobortoi yaitiet eng’ tulonokab Epraim.

¹⁶ Omwachi bororiosiek; ogeero, omwachi Jerusalem, olenji, Ibogu bik che ng’eete emet ne loo, ak kowaage nganasokab Juda.

¹⁷ Kigoyiem ichek ko u ribik che ribei mbaret; amu kigongelelja, mwaei Jehovah.

¹⁸ Kagoibun oreng’ung’ ak boisioniguk tuguchuto; nito ko yaitieng’ung’; amu ng’wan, amu itei muguleldang’ung’.

Ng’ang’utietab ng’emisiet ne nyonjin emet

¹⁹ Moennyu, moennyu! Atinye ng’wanindo eng’ muguleldanyu orit: rukrugeni muguleldanyu; mamuchi asis; amu kaigas, ee sobondanyu, cheetab iriaget, waagatab luget.

²⁰ Kagemwaita ng’emisiet eng’ ng’emisiet; amu kagong’emak emet komugul: kagechea keng’em emaisiekyuk, ak angokyuk eng’ sainato.

²¹ Ageere songoliet ak agase cheetab iriaget kot kotianit!

²² Amu berber bikyuk, maingena; lagok che uuen metowek, ama tinyei kaguiyet: ng’omen koyai yaitiet, ago maingen koyai ne mie.

²³ Kiageer ng’ony, ak ogeero, kima komi kiy ak kima kotinyei iton; ak kiageer kipsengwetisiek, ak kima kotinyei lapkeiyet.

²⁴ Kiageer tulonok, ak ogeero, kibotandos, ak kiiyongoi tulonok tugul che mengechen.

²⁵ Kiageer, ak ogeero, kima komi chi, ak kiga komwei taritik tugul che bo barak.

²⁶ Kiageer, ak ogeero, kiek ong’atet mbaret ne kirurei, ak kiga kiluul nganasokyik eng’ taitab Jehovah, ak eng’ taitab neregekyik che ng’wonen.

²⁷ Amu mwaei Jehovah ko u ni kole, Egu emet tugul karaita; ago magesu.

²⁸ Rirei emet amu nito, ak kotuuegitu kipsengwetisiek: amu kaamwa, ak kaachob, ak tom awal kit ne abwati, amaweechigei let eng’ ng’olyondonito.

²⁹ Mweei nganaset komugul amu waagatab bik che lanyei mbartanyisiek ak bikab kwangok; chutei sondisiek ak kolany ruandosiek: kimetoi nganaset age tugul, ama menyei chi oloto.

³⁰ Ak inye, ye king’emin, iyae nee? Agot ngilaachi ngoroik che biriren, agot ngilelesane tuguk che bo tahabu, agot ngibaraae konyeguk saleiywek, ko buch kororonindo ne iyachinige; sasin chamaniguk, cheng’ei sobondang’ung’.

³¹ Amu kiagas waagat ne u ne bo kwondo ne machei kosich taitanyi, kutitab cheptab Sion, ne isienyi, ne iitoi eunekyik, komwaei kole, Bwa eng’ ane! Amu tanui sobondanyu eng’ taitab rumik.