JEREMIA 39 - BUKUIT NE TILIL

Kabutetab Jerusalem, ak keluulei bik koba Babuloni

¹ Ak kingo kageluul Jerusalem (eng’ kenyitab sogol ne bo Sedekia laitoriatab Juda, eng’ arawetab taman, konyo Nebukadresar laitoriatab Babulon koboto lugennyi tugul kobokyi Jerusalem, ak koyiem;

² kigibut nganasanato eng’ kenyitab taman ak agenge ne bo Sedekia, eng’ arawet ne bo ang’wan, eng’ betutab sogol ne bo arawanato:)

³ kobwa anyun neganaset orit bounik tugul che bo laitoriatab Babulon, ak kotebe ormarichet ne bo kwen, choto ko Nergal-sareser, Samgar-nebo, Sarsekim, Rab- saris, Nergal-saresar, Reb-mag, koboto bounik tugul alak che king’et che bo laitoriatab Babulon.

⁴ Ak kingogeer Sedekia laitoriatab Juda ak murenik tugul che bo luget, bichoto, komwei komanda eng’ nganaset kemoi, kobun oretab mbaretab laitoriat, eng’ ormarichet ne kimi kwenutab inatusiek aeng’: ak kimandae oretab Araba.

⁵ Ago kiisub ichek lugetab Kaldeik, ak kinamji Sedekia warengetab Jeriko: ak kingo kagonam inendet, komutyi Nebukadresar laitoriatab Babulon ne kimi Ribla eng’ emetab Hamat, ak kiiruokyi inendet.

⁶ Kibar anyun laitoriatab Babulon werikab Sedekia eng’ Ribla, kogeerei inendet: kibar kogeny laitoriatab Babulon bik che toogunotin tugul che bo Juda.

⁷ Kibar kogeny konyekab Sedekia, ak korate mugurek si komut kwo Babulon.

⁸ Ak kibeel Kaldeik gotab laitoriat, ak gorikab bik, ak kobut irimoikab Jerusalem.

⁹ Yeityo komut Nebusaradan kiptaiyatab ribik, bik che kiga ng’et eng’ nganaset koba Babulon koek luulenik, koboto bik che kimwei eng’ nganaset konamgei ak inendet, koboto bik che kiga ng’et.

¹⁰ Ago kibagakta Nebusaradan kiptaiyatab ribik, alak che bo bik che kibananok, che kima kotinyei kiy, eng’ emetab Juda, ak kogochi ichek mbarenikab sabibuk koboto mbarenik eng’ betunoto.

¹¹ King’at anyun Nebukadresar laitoriatab Babulon Nebusaradan kiptaiyatab ribik, agobo Jeremia, kolenji,

¹² Imut inendet, ak irib komie, ameyachi kiy ne ya; ago yachi ko u ye mwaun inendet.

¹³ Kiiyokto anyun Nebusaradan kiptaiyatab ribik, koboto Nebusasban, Rab-saris, ak Nergal-saresar ak Rab-mag, ak kiptainik tugul che eechen che bo laitoriatab Babulon;

¹⁴ kiiyokto kimut Jeremia komong’ eng’ seremutab ribik, ak konde inendet eutab Gedalia weritab Aikam, weritab Sapan, si kobiit komut inendet kwo ga: kimeng’is anyun eng’ kwenutab bik.

¹⁵ Kinyonji anyun ng’olyotab Jehovah Jeremia, ye ki kerat eng’ seremutab ribik, kolenji,

¹⁶ Ui, ak ing’alalji Ebed-melek Etiopindet, ilenji, Mwaei Jehovah ne bo lugosiek, Kamuktaindetab Israel, ko u ni kole: Keero, aipchini ng’alekyuk nganasani agobo yaitiet, ma agobo mieindo; ak isuldoi eng’ taing’ung’ eng’ betunoto.

¹⁷ Ago asorun eng’ betunoto, mwaei Jehovah: ama kigochinin eunekab bik che iywei.

¹⁸ Amu asorun iman, ama kibarin eng’ rotwetab chok, ago iluule sobeng’ung’ kobunjin: amu kiimang’wa, mwaei Jehovah.