JEREMIA 38 - BUKUIT NE TILIL

Keratei Jeremia

¹ Ak kigas Sepatia weritab Matan ak Gedalia weritab Pasur, ak Jukal weritab Selemia, ak Pasur weritab Malkija, ng’alek che kimwachi Jeremia bik tugul, kolenji,

² Mwaei Jehovah ko u ni kole, Inendet ne tebe nganasani, kebarei eng’ rotwetab chok, ak eng’ rubet, ak eng’ koroito: ago inendet ne wendi oldab Kaldeik kosobei ak koek sobennyi ne kiluulei.

³ Mwaei Jehovah ko u ni kole, Kigoitoi iman nganasani kwo eutab luget ne bo laitoriatab Babulon, ak koluul.

⁴ Kolenji anyun bounik laitoriat, Kisomin kele, mie kebar chichi; amu igochin eunekab murenikab luget che ng’etu eng’ nganasani, konyalulyo, ak eunekab bik tugul, amu mwachin ichek ng’alek che u choto: amu macheng’ei chichi chametab ge ne bo bichu, ago cheng’jin nyalilda.

⁵ Ak kile Sedekia laitoriat, Ogeero, mi inendet eunekwok: amu laitoriat ko ma chi ne imuchi koyaiywok kiy ne ya.

⁶ Konam anyun ichek Jeremia, ak kotoorji inendet keringetab Malkija weritab laitoriat, ne kimi seremutab ribik: ak kichoortae Jeremia rogoonik. Kima komi beek keringonoto, ago kimi ng’atatek: ak kirorokyi Jeremia ng’atatek orit.

⁷ Kingogas anyun Ebed-melek Etiopindet, ne ki siror, ne kimi gotab laitoriat, kole, kagitoorji Jeremia keringet: ye kiibuuri laitoriat eng’ ormarichetab Benjamin;

⁸ komanda Ebed-melek eng’ gotab laitoriat, ak komwachi laitoriat kolenji,

⁹ Kiptaiyandennyu laitoriat, kogoyai bichu yaitiet eng’ tuguk tugul che kogoyachi maotiot Jeremia, ne kogotoorji keringet; ak imuchi kome eng’ rubet eng’ ole mi: amu ma komi makatinik eng’ nganaset.

¹⁰ King’at anyun laitoriat Ebed-melek Etiopindet, kolenji, Imut eng’ yu bik sosom, ak oganabu maotiot Jeremia eng’ keringet, kotom kome.

¹¹ Komut anyun Ebed-melek bik, ak kwo gotab laitoriat ne mi kureretab ole kigonore tuguk, ak kiinem surainik che kigoosegitu che kigelakta ak mararenik che kigoyaagitu, ak kochoortae rogoonik koba keringet ole mi Jeremia.

¹² Ak kilenji Ebed-melek Etiopindet, Jeremia, Inde surainichu kigoosegitu che kigelakta, ak mararenichu kigoyaagitu, kulguliguk, ak inde rogoonik agichek. Ak kiyai Jeremia ko u noto.

¹³ Kiichuut anyun Jeremia eng’ rogoonik, ak komut komong’ eng’ keringet: ak kitebe Jeremia seremutab ribik.

¹⁴ Kiiyokto anyun Sedekia laitoriat kimut maotiot Jeremia, kwo ole mi inendet agoi ole kimandoe ne bo somok ne kimi gotab Jehovah: ak kimwachi laitoriat Jeremia kolenji, Amache ateebenen kiy; ameung’ena kiy.

¹⁵ Komwachi anyun Jeremia Sedekia, kolenji, Ngot amwaun kioto, kotos mebara iman? Ak ngot amwaun kiy ne toretin, ko megasa.

¹⁶ Kiiyosiechi anyun Sedekia laitoriat Jeremia eng’ ung’ot, kolenji, Ko u ye sobei Jehovah, ne kiyaiywech sobonito, ko mabarin, amandein eutab bichu cheng’ei sobondang’ung’.

¹⁷ Kilenji anyun Jeremia Sedekia, Mwaei Jehovah, Kamuktaindet ne bo lugosiek, Kamuktaindet ne bo Israel, ko u ni kole: Ngot iwe oldab bounikab laitoriatab Babulon, isobe, ama kibeelei nganasani; ak isob koboto gong’ung’.

¹⁸ Ago ngot ko mewe oldab bounikab laitoriatab Babulon, kindoi anyun nganasani eutab Kaldeik, ak kobeel, amechilili eng’ eunekwak.

¹⁹ Ak kilenji Sedekia laitoriat Jeremia, Aiywei Yahudik che kigonamgei ak Kaldeik, si maindea eunekwak, ak kochota.

²⁰ Ago kile Jeremia, Maigoitoin. Kasain ale, kas kutitab Jehovah eng’ chuto amwaun: si kobiit komieit eng’ inye, ak kosob sobondang’ung’.

²¹ Ago ngot iesie iwe, ko ni ng’olyot ne kagoborua Jehovah:

²² Keero, kimuti kwonyik tugul che ng’etu eng’ gotab laitoriatab Juda koba oldab bounikab laitoriatab Babulon, ak mwaei kwonyichoto kole, Kagoberberin choronoguk che ingen, ak kagoterterin: kagorat anyun ng’atatek kelyeguk, kagoweeigei let ichek.

²³ Ak komut osotiguk tugul komong’ ak lagoguk komutyi Kaldeik: amechilile eunekwak, ago namin laitoriatab Babulon: ak igoite nganasani kebeel.

²⁴ Kolenji anyun Sedekia Jeremia, Amengonai chi ng’alechu, si memeei.

²⁵ Ago ngot kogas bounik kole kageng’alal tuwai, ak kobwanjin kolenjin, Mwawech nguno kit ne kemwachi laitoriat; ameung’enech, si ma kibarin: ak imwawech kogeny kit ne kamwaun laitoriat:

²⁶ ilenji ichek anyun, Koaipchini laitoriat somennyu, ale, si maweekya gotab Jonatan, si mamee eng’ oloto.

²⁷ Kibwa anyun bounik tugul oldab Jeremia, ak koteebe inendet: ak kimwachi ko u ng’alechato tugul che koga ng’at laitoriat. Kobagakta anyun, mata kong’alal ak inendet; ago manaak ng’olyondonoto.

²⁸ Kitebe anyun Jeremia seremutab ribik agoi betut ne kigiluule Jerusalem.