JEREMIA 36 - BUKUIT NE TILIL

Kesirei bukuit ne kimamani agobo maoinatosiekab Jeremia

¹ Kinyonji Jeremia ng’olyondoni ne kibunu Jehovah eng’ kenyit ne bo ang’wan ne bo Jeoiakim weritab Josia, laitoriatab Juda, kolenji,

² Nam bukuit ne mamanat, isirji ng’alek tugul che koamwaun agobo Israel, ak agobo Juda, ak agobo bororiosiek tugul, koboch betut ne kiang’alalun, koboch betusiekab Josia, agoi betuni.

³ Abere tamangab kogas gotab Juda yaitiet tugul ne kaatil ale ayachini ichek; si koweek chi tugul eng’ ichek kometo orennyi ne ya, si anyochi kaat amu yaitienywa ak tengektanywa.

⁴ Kiguur anyun Jeremia Baruk weritab Neria; ak kisir Baruk ng’alek tugul che bo Jehovah che kimwaei Jeremia, che kiga komwachi Jehovah inendet, kosirji bukuit ne mamanat.

⁵ Ak king’at Jeremia Baruk, kolenji, A kerat; mamuchi awa gotab Jehovah:

⁶ ui anyun isoman bukuinito, ne kaisirji che kegasena, ng’alekab Jehovah, soman kogasei bik eng’ gotab Jehovah eng’ betutab karugutetab ge: ak isoman kogeny kogasei bik tugul che bo Juda che bunu nganasokwak.

⁷ Tamangab komwaita somutikwak eng’ taitab Jehovah, ak koweek chi age tugul kometo orennyi ne ya: amu eechen neregek koboto neregek che ng’wonen che kigomwa Jehovah agobo bichu.

⁸ Ak kiyai Baruk weritab Neria ko u tugul che king’at maotiot Jeremia inendet, kosoman eng’ bukuit ng’alekab Jehovah eng’ gotab Jehovah.

⁹ Ak eng’ kenyit ne bo mut ne bo Jeoiakim weritab Josia, laitoriatab Juda, eng’ arawetab sogol, komwaita bik tugul eng’ Jerusalem, koboto bik tugul che kibunu nganasokab Juda kobwanei Jerusalem, karugutetab ge eng’ taitab Jehovah.

¹⁰ Kisoman anyun Baruk ng’alekab Jeremia che kigisirji bukuit, eng’ gotab Jehovah, eng’ got ne bo orit ne bo Gemaria weritab Sapan sirindet, eng’ seremut ne bo meto, eng’ ole kimandoe ne bo ormarichet ne leel ne bo gotab Jehovah, kisoman kogasei bik tugul.

¹¹ Ak ye kingogas Mikaia weritab Gemaria, weritab Sapan, ng’alechato tugul bo Jehovah, eng’ bukuit,

¹² kochortagei kwo gotab laitoriat, got ne bo orit ne bo sirindet: ak ogeero, kitebyei eng’ oloto bounik tugul, choto ko, Elisama sirindet, Delaia weritab Semaia, Elnatan weritab Akbor, ak Gemaria weritab Sapan, ak Sedekia weritab Hanania, ak bounik tugul.

¹³ Komwachi anyun Mikaia ichek ng’alek tugul che kagas, ye kisomani Baruk bukuit kogasei bik.

¹⁴ Koyokto anyun bounik tugul Jeudi weritab Netania, weritab Selemia, weritab Kusi, kwo ole mi Baruk, kolenji, Nam eng’ eung’ung’ bukuit ne kesomanjini bik kogas, ak inyo. Konam anyun Baruk weritab Neria eng’ eunnyi bukuinoto, ak konyo ole mi bichoto.

¹⁵ Ak kilenji ichek inendet, Tebi ng’ony anyun, ak isoman kegas. Kosoman anyun Baruk kogasei bichoto.

¹⁶ Kingo kagogas ng’alechato tugul anyun, kogeerotgei eng’ kaiyweisiet, ak kolenji Baruk, Kimwachini iman laitoriat ng’alechuto tugul.

¹⁷ Yeityo koteebe ichek Baruk kolenji, Mwawech anyun ole kiitepte si isir ng’alechuto komwaei inendet:

¹⁸ Kowolji anyun Baruk ichek, kolenji, Kimwawa ng’alechuto tugul, ak kiasirji bukuit eng’ wino.

¹⁹ Yeityo komwachi bounik Baruk, kolenji, Ui unyge, inye ak Jeremia; amongonai chi ole omi.

²⁰ Kiba anyun oldab laitoriat eng’ seremut; ago kiga konde bukuinoto got ne bo orit ne bo Elisama sirindet; ak kimwachi laitoriat ng’alechato tugul kogas.

²¹ Koyokto anyun laitoriat Jeudi kwo koib bukuit: ak kiinem eng’ got ne bo orit ne bo Elisama sirindet. Ak kisoman Jeudi kogas laitoriat, ak kogas bounik tugul che kitonondos eng’ ole negite laitoriat.

²² Kitebe laitoriat got ne kimenyei eng’ betusiekab kaititiet eng’ arawetab sogol: ak kimi mat ne kilalei eng’ kisigirit eng’ tainnyi.

²³ Ak kingo kagosoman Jeudi kartasisiek somok anan ang’wan, kotil laitoriat eng’ rotwet, ak kowirji maata kimi kisigirit, agoi kolal bukuit komugul kogesgei eng’ maata.

²⁴ Ma iyweis, ama bet ngoroikwak, laitoriat, anan age eng’ otwogikyik ne kigasei ng’alechato tugul.

²⁵ Kiigaigai anyun Elnatan ak Delaia ak Gemaria laitoriat, si mabeel bukuit: ago ma kasyi.

²⁶ Ak king’at laitoriat Jerameel weritab laitoriat, koboto Seraia weritab Asriel, ak Selemia weritab Abdeel, konam Baruk sirindet ak maotiot Jeremia: ago kiuny Jehovah ichek.

²⁷ Kinyonji anyun ng’olyotab Jehovah Jeremia, ko kagobeel laitoriat bukuit, ak ng’alek che kisirei Baruk komwaei Jeremia, kolenji,

²⁸ Nam bukuit age kogeny, ak isirji ng’alechato tugul bo tai che kimi bukuit ne bo tai ne kibeelei Jeoiakim laitoriatab Juda.

²⁹ Ak imwa agobo Jeoiakim laitoriatab Juda ile, Mwaei Jehovah ko u ni kole: Kiibeel bukuinoto, ile, Amu nee si isir, ile, Nyonei laitoriatab Babulon iman kong’emei emoni, ak kowong’ eng’ olito chi ak tiony?

³⁰ Mwaei anyun Jehovah agobo Jeoiakim laitoriatab Juda ko u ni kole: Masichei chi ne tebe ng’echeretab laitornatet ne bo Daudi: ak kiwirtoi mustanyi bet kobir asista, ak kotebe kaititindo kemoi.

³¹ Ak abire inendet ak iyotennyi, koboto otwogikyik amu tengektanywa; ak aipchini ichek ak bik che menyei Jerusalem, koboto bikab Juda, yaitiet tugul ne kiamwa agobo ichek, ago ma kas.

³² Kinam anyun Jeremia bukuit age ne mamanat, ak kogochi Baruk sirindet, weritab Neria; ne kisirji ng’alek tugul che kimwaei Jeremia che kimi bukuit, ne kiga kobeel Jeoiakim laitoriat ne bo Juda: ak kigitesyi ng’alek alak che chang’ che kergei ak chugiche.