JEREMIA 35 - BUKUIT NE TILIL

Konetisiet ne bunu kasetab it ne bunu Rekabitik

¹ Kinyonji Jeremia ng’olyot ne kibunu Jehovah eng’ betusiekab Jeoiakim weritab Josia, laitoriatab Juda, kolenji,

² Ui gotab Rekabitik, ak ing’alalji, ak imutu ichek kobwa gotab Jehovah, agoi got age eng’ che bo orit, ak igochi divaik koee.

³ Kiamut anyun Jaasania weritab Jeremia, weritab Habasinia, ak tupchosiekyik, ak werikyik tugul, ak got komugul ne bo Rekabitik;

⁴ kiamutu kobwa gotab Jehovah, agoi got ne bo orit ne bo werikab Hanan weritab Igdalia, chitab Kamuktaindet, ne ki negite got ne bo orit ne bo bounik, ne kimi baragutab got ne bo orit ne bo Maaseia weritab Salum, ribindetab kurget.

⁵ Ak kiande tabok che nyiitotin divaik koboto kikombok, taitab werikab gotab Rekabitik, ak kialenji ichek, Oee divaichu.

⁶ Ago kile, Magiee divaik: amu king’atech kwandanyo Jonadab weritab Rekab, kolenjech, Moee divaik, okwek, anan werikwok agoi:

⁷ amoteeche got, anan ogolse, anan omin mbaretab sabibuk, anan otepte choto: ago omenye emaisiek eng’ betusiekwok tugul; si kobiit osopche eng’ betusiek che chang’ eng’ emet ne o toek.

⁸ Ak kigegas it kutitab kwandanyo Jonadab weritab Rekab ko u tugul che king’atech, kole, si ma kiee divaik eng’ betusiekyok tugul, achek, osotikyok, werikyok, anan ko tibikyok;

⁹ anan keteekyige gorik che kimenye: ama kitinye mbarenikab sabibuk anan mbarenik anan keswek:

¹⁰ ago kigemeng’ote emaisiek, ak kigegas it, ak keyai ko u tugul che king’atech kwandanyo Jonadab.

¹¹ Ago ye kinyo Nebukadresar laitoriatab Babulon emoni, ko kigile, Obwa kebe Jerusalem amu kiywei lugetab Kaldeik, ak kiywei lugetab Suriek; kemeny anyun Jerusalem.

¹² Kinyonji anyun ng’olyotab Jehovah Jeremia, kolenji,

¹³ Mwaei Jehovah ne bo lugosiek, Kamuktaindetab Israel, ko u ni kole: Ui ak imwachi bikab Juda ak bik che menyei Jerusalem, ilenji, Tos mochame otaach konetisiet oepchi it ng’alekyuk? Mwaei Jehovah.

¹⁴ Kagosulda ng’alekab Jonadab weritab Rekab, che king’at werikyik, kolenji, Amoee divaik, ak tomo koee ichek agoi betuni, amu kase it ng’atutietab kwandanywa: ago kiang’alalwok, ang’eete karon mising’ ak ang’alali, ago ma oepcha it.

¹⁵ Ak kiayokwok kogeny otwogikyuk tugul che maotik, ang’eete karon mising’ ak ayogu ichek, amwae ale, Oweege anyun chi age tugul eng’ orennyi ne ya, ak olitit boisionikwok, amosub cheptalelisiek che ter oot ichek, si omeny emet ne kiagonok koboto kwanisiekwok: ago ma oeb it, anan ogasa it.

¹⁶ Amu kagoyai werikab Jonadab weritab Rekab ng’atutietab kwandanywa, ne king’at ichek, ago ma kasa it bichu;

¹⁷ mwaei anyun Jehovah, Kamuktaindet ne bo lugosiek, Kamuktaindetab Israel, ko u ni kole: Ogeero, aipchini Juda ak bik tugul che menyei Jerusalem, yaitiet tugul ne kiamwa agobo ichek: amu kiang’alalji, ago ma kas; ago kiaguur ichek, ago ma wol.

¹⁸ Ak kimwachi Jeremia gotab Rekabitik kolenji, Mwaei Jehovah ne bo lugosiek, Kamuktaindetab Israel, ko u ni kole: Amu kiogas it ng’atutietab kwandang’wong’ Jonadab, ak orib konetisiosiekyik tugul, ak oyai ko u tugul che king’atak;

¹⁹ mwaei anyun Jehovah ne bo lugosiek, Kamuktaindetab Israel, ko u ni kole: Mabetyin chi Jonadab weritab Rekab chito ne tononi eng’ tainnyu agoi.