JEREMIA 33 - BUKUIT NE TILIL

Kayomisutik agobo kaweegunet

¹ Kinyonji kogeny ne bo aeng’ ng’olyotab Jehovah Jeremia, ye kita ko kerat eng’ seremutab ribik, kolenji,

² Mwaei Jehovah ne yaei noto, Jehovah ne kimimii si kogimit; kainennyi ko Jehovah, mwaei ko u ni kole:

³ Kuura, si awolun, ak aborun tuguk che eechen, ak ko uuen, che mengen.

⁴ Amu mwaei Jehovah, Kamuktaindetab Israel, agobo gorikab nganasani, ak agobo gorikab laitorinikab Juda, che kigebut koek che ribegei eng’ taitab karurugutikab ng’ung’unyek, ak eng’ rotwetab chok: mwaei ko u ni kole:

⁵ Bwanei kobaregei ak Kaldeik, ago kinyiiti muswek, che kiabar eng’ neregekyuk ak eng’ neregekyuk che ng’wonen, ak ichek tugul che kiaung’e togennyu tengekwogikwak eng’ nganasani.

⁶ Ogeero, anyai ak asoobi, ak asoobi ichek; ak ang’ang’ji ichek chang’indab kalyet ak imanda.

⁷ Ak agochi Juda ak Israel koweek eng’ ole kiga kiluulji, ak ateech ichek ko u eng’ tai.

⁸ Ak aun ichek eng’ tengektanywa tugul, che kigoyaiywa; ak anyochi kaat amu tengekwogikwak tugul, che kigoyaiywa, ak che kigongeleljinena.

⁹ Ak koek nganasani eng’ ane kainet ne kiboiboitune, koek kalosunet ak torornatet, eng’ taitab bororiosiek tugul che bo ng’ony, che kasei mieindo tugul ne ayachini ichek, ak koiyweis ak kobotanso amu mieinoto tugul ak kalyet tugul ne agochini nganasani.

¹⁰ Mwaei Jehovah ko u ni kole: Ta kegasei kogeny eng’ olito, ole omwae, ole, Karatia, ama mi chi anan tiony, choto ko nganasokab Juda, ak ortinwekab Jerusalem, che kigoguber, ama mi chi, ama mi chi ne menyei, ama mi tiony,

¹¹ kigasei tugetab boiboiyet ak ne bo kagasetab ge, ne bo sandet ak ne bo mureret, tugetab ichek che mwaei kole, Oweekyi kongoi Jehovah ne bo lugosiek, amu mie Jehovah, amu tebyei koigeny rirenennyi: ak tugetab che igoitoi korosekab kongoi kobwa gotab Jehovah. Amu agochini koweek bikab emet che kigeluul, ko u eng’ tai, mwaei Jehovah.

¹² Mwaei Jehovah ne bo lugosiek ko u ni kole: Ta kobiitu kogeny eng’ olito ole karatia, ama mi chi, ama mi tiony, ak eng’ nganasokyik tugul, meng’otetab mestowek ak ole kerjin akwotisiek che bo kechirek.

¹³ Bunei kogeny akwotisiekab kechirek taitab inendet ne iiti eng’ nganasok che bo emetab tulonok, ak eng’ nganasokab soi, ak eng’ nganasok che bo Murot ne bo Tai, ak eng’ emet ne bo Benjamin, ak eng’ komoswek ole negite Jerusalem, ak eng’ nganasokab Juda, mwaei Jehovah.

¹⁴ Ogeero, bwanei betusiek mwaei Jehovah, ye ayae ng’olyondonoto mie ne kiamwa agobo gotab Israel ak agobo gotab Juda.

¹⁵ Agochini kobityi Daudi Temetab imanda eng’ betusiechoto ak eng’ betunoto; ak koruoch kiruoget ak imanda eng’ emet.

¹⁶ Kisoru Juda eng’ betusiechoto; ak komeng’is Jerusalem eng’ chametab ge; ak ni kainet ne kimwaitoe, Jehovah ko imandanyo.

¹⁷ Amu mwaei Jehovah ko u ni kole: Magoi betyi chi Daudi ne tebe ng’echeretab laitornatet ne bo gotab Israel;

¹⁸ ama betyin chi tisiik Lawik eng’ tainnyu ne igoitoi kagochinoik che kibeelei, ak kobeel kagochinoikab busiek, ak kogoito tiseiywek kotugul.

¹⁹ Ak kinyonji ng’olyotab Jehovah Jeremia kolenji,

²⁰ Mwaei Jehovah ko u ni kole: Ndaomuchi obut arorutiennyu ne bo bet, ak arorutiennyu ne bo kemoi, kot ko ma komi betut ak kemout eng’ saisiekwak;

²¹ ta kimuchi kebut agine kayomisennyu ne kigiyomisge ak Daudi otwogindennyu, kot kobetyi werit ne laitorani eng’ ng’echerennyi ne bo laitornatet; ak ne kiayai koboto Lawik tisiik, kiboitinikyuk.

²² Ko u ye magimuchi kiit tuguk che bo kipsengwet, ama kimuchi keger ng’aniekab nyanjet; atese anyun iyotetab Daudi otwogindennyu, ak Lawik, che boisiewa.

²³ Ak kinyonji ng’olyotab Jehovah Jeremia, kolenji,

²⁴ Tos mebwati kit ne kagomwa bichu kole, Kigotimda Jehovah gorjoto aeng’ che kigolewen? Sasei ichek ko u noto bikyuk, si ma koegu kogeny bororiet eng’ tainywa.

²⁵ Mwaei Jehovah ko u ni kole: Ngot ko matononi arorutiennyu ne bo bet ak ne bo kemoi, ngot ko ma ande ng’atutikab kipsengwet ak che bo ng’ony;

²⁶ atimdoi anyun agine iyotetab Jakobo, ak ne bo Daudi otwogindennyu, kot ko malewen iyotennyi koek bounik che bou iyotetab Abraham, Isak, ak Jakobo: amu agochini koweek eng’ ole kigiluulji, ak arire ichek.