JEREMIA 32 - BUKUIT NE TILIL

Kitiachi emiet eng’ Anatot

¹ Kinyonji Jeremia ng’olyot ne kibunu Jehovah eng’ kenyitab taman ne bo Sedekia laitoriatab Juda, ne ki kenyitab taman ak sisiit ne bo Nebukadresar.

² Kiyiem anyun lugetab laitoriatab Babulon Jerusalem eng’ betusiechoto: ak kiga kigerji maotiot Jeremia seremutab ribik, ne kimi gotab laitoriatab Juda.

³ Amu kiga koger inendet Sedekia laitoriatab Juda kolenji, Amu nee si imaoten, ak ile, Mwaei Jehovah ko u ni kole, Agochini nganasani eutab laitoriatab Babulon, ak koluul;

⁴ ama chilili Sedekia laitoriatab Juda eng’ eutab Kaldeik, ago kindoi iman eutab laitoriatab Babulon, ak kong’alal tuwai kimni, ak kogeergei togoch;

⁵ ak komut Sedekia kwo Babulon, ak kotebe oloto agoi tun aityi biret inendet, mwaei Jehovah: agot ngobargei ak Kaldeik, ko magiberurok?

⁶ Ak imwa Jeremia kole, Kinyonja ng’olyotab Jehovah kolenja

⁷ Keero, nyonjinin Hanamel weritab Salum imameng’ung’, kolenjinin, Aljige mbarennyu ne mi Anatot: amu neng’ung’ imanitab katiaget ial.

⁸ Kinyonja anyun Hanamel weritab imamennyu eng’ seremutab ribik ko u ng’olyotab Jehovah, ak kolenja, Asomin ale, al mbarennyu ne mi Anatot, ne mi emetab Benjamin: amu neng’ung’ imanitab borotet, ak neng’ung’ katiaget; aljige noto. Kianai anyun ale bo Jehovah ng’olyondonito.

⁹ Ak kiaal mbaranato ne kimi Anatot ne bo Hanamel weritab imamennyu, ak kiagerji inendet fedaisiek, choto ko sekelisiek taman ak tisab che bo feda.

¹⁰ Ak kiasir baruetab kayanjinet, ang’och, ak aguur baorinik, ak agerji inendet fedaisiek eng’ kit ne kirogendoisie.

¹¹ Kiaib anyun baruetab kayanjinet ne bo alyet, noto ne kiging’och ko u ng’atutiet ak biteet, koboto noto ki yatat.

¹² Ak kiagochi anyun barunato bo kayanjinet ne bo alyet Baruk weritab Neria weritab Maseia, eng’ taitab Hanamel weritab imamennyu, ak eng’ taitab baorinik che kisirji kainaikwak baruanato bo kayanjinet ne bo alyet, eng’ taitab Yahudik tugul che kitebyei eng’ seremutab ribik.

¹³ Ak kiang’at Baruk eng’ tainywa, alenji,

¹⁴ Mwaei Jehovah ne bo lugosiek, Kamuktaindetab Israel, ko u ni kole, Ib baronochu bo kayanjinet, baruani bo kayanjinetab alyet, koboto ne kaging’och, ak baruani bo kayanjinet ne yatat, ak inde teretab menet; si kotebe betusiek che chang’.

¹⁵ Amu mwaei Jehovah ne bo lugosiek, Kamuktaindetab Israel, ko u ni kole: Ta kealei kogeny gorik ak mbarenik ak mbarenikab sabibuk eng’ emoni.

¹⁶ Kingo kaagochi Baruk weritab Neria baruetab kayanjinet ne bo alyet, asa Jehovah, alenji,

¹⁷ Ee Kiptaiyat Jehovah! Keero, kiiyai kipsengwet ak ng’ony eng’ kimnateng’ung’ ne o ak eng’ eung’ung’ ne chuulat; mami kiy age tugul ne temenen,

¹⁸ inye ne irire elfusiek, ak igeerjini tengekwogikab kwanisiek tegetikab lagokwak che isubi ichek: Kamuktaindet ne o, ne bo kamuktaet, kainennyi ko Jehovah ne bo lugosiek;

¹⁹ inendet ne o eng’ kiruoget, ak ko bo kamuktaet eng’ boisiet; ne keerei konyekyik ortinwek tugul che bo werikab bik; si kogochi age tugul ko u ortinwekyik ak ko u logoekab boisionikyik;

²⁰ ne kiinde kaborunoik ak kwong’utik emetab Misri, agoi rani, eng’ Israel ak eng’ bik alak; ak kiiyai kaineng’ung’ konaak, ko u ye u rani;

²¹ ak kiimutu biguk Israel komong’ eng’ emetab Misri eng’ kaborunoik, ak kwong’utik, ak eng’ eut ne kim, ak eng’ eut ne chuulat, ak eng’ kamuiset ne o;

²² ak igochi emoni, ne kiiyosiechi kwanisiekwak ile igochini ichek, emet ne nyiitat chego ak kumik;

²³ ak kibwa, konam kobunji; ago ma kas it kuting’ung’, ama isub ng’atutiguk; ma yai kiy age tugul eng’ choto tugul kiing’atyi ichek koyai: koigochi anyun yaitioni tugul konyonji ichek.

²⁴ Ogeero karurugutikab ng’ung’unyek ole bunu bik kobwanei koluulei nganasani; ak kagigochi nganasani eutab Kaldeik che baregei ak nganasanato, amu rotwetab chok, ak rubet, ak koroito: ak kagosulda noto kiimwa; ak keero, igeere noto.

²⁵ Ee Kiptaiyat Jehovah, kiimwawa ilenja, Aljige mbaret eng’ feda, ak iguur baorinik; nganda kigigochi nganasani eutab Kaldeik.

²⁶ Kinyonji anyun ng’olyotab Jehovah Jeremia, kolenji,

²⁷ Keero, a Jehovah, Kamuktaindetab bik tugul: tos mi kiy age tugul ne temena?

²⁸ Mwaei anyun Jehovah ko u ni kole: Keero, agochini nganasani eutab Kaldeik, ak eng’ eutab Nebukadresar laitoriatab Babulon, ak koluul:

²⁹ ak kobwa Kaldeik che baregei ak nganasani, kobwa konaam nganasani, ak kobeel, koboto gorik, che kiigoitoe ichek nyamdutik che kibeelei, kogochin Baal eng’ baragutab gorichoto, ak korong’jin kanamonik che ter, kagochinoik che kieei, si kobiit kotacha anerech.

³⁰ Amu kigoyai lagokab Israel ak lagokab Juda ne ya eng’ tainnyu koboch ming’inatenywa: amu kigotacha lagokab Israel anerech eng’ boisionikab eunekwak, mwaei Jehovah.

³¹ Amu kigoek eng’ ane nganasani tagisietab nereknatennyu ak ne bo neregekyuk che ng’wonen koboch betut ne kiteechei ichek agoi rani; kot aiste eng’ tainnyu,

³² amu yaitiet tugul ne bo lagokab Israel ak ne bo lagokab Juda, che kigoyai kotagena anerech, ichek, laitorinikwak, bounikwak, tisiikwak, ak maotikwak, ak bikab Juda, ak bik che menyei Jerusalem.

³³ Ak kigotuktocha batai, ama keera: ak nganda kianet ichek, ang’eete karon mising’ ak aneti, ko ma epchi it si kotaach konetisiet.

³⁴ Ago kiinde tugukwak che kiwechei, got ne kimwaitoe kainennyu, kong’wanit.

³⁵ Ak kiteech komoswek che tororen che bo Baal, che mi atebwetab weritab Hinom, si kogoito werikwak ak tibikwak kobun mat kogochi Molek; ne kima ang’at, ama kuura met, ale si kobiit koyai kii kiwechei; ak kogochi Juda koyai tengekto.

³⁶ Mwaei anyun Jehovah, Kamuktaindetab Israel, agobo nganasani, ne omwae ole, Kagigochi eutab laitoriatab Babulon eng’ rotwetab chok, ak eng’ rubet, ak eng’ koroito, ko u ni kole,

³⁷ Ogeero, ayumi ichek komong’ eng’ emotinwek tugul che kigaonji ichek amu neregekyuk, ak eng’ neregekyuk che ng’wonen, ak eng’ neregek che eechen, ak amutu ichek kogeny kobwa olito, ak agochi komeny eng’ chametab ge.

³⁸ Ak koek bikyuk, ak aegu Kamuktaindenywa:

³⁹ ak agochi ichek muguleldo agenge ak oret agenge, si komuch koiywea koigeny; si konyor mieindo ak lagokwak che isubi ichek:

⁴⁰ ak kiyomisige ak ichek kayomiset ne bo koigeny, ale matuktochini batai ichek ago ayachini ne mie; ak ande kaiyweisiennyu mugulelwekwak, si maistoenagei.

⁴¹ Ee, aboiboitune ichek ayachi ne mie, ak amin ichek eng’ emoni iman eng’ muguleldanyu komugul ak eng’ sobondanyu komugul.

⁴² Amu mwaei Jehovah ko u ni kole: Ko u ye kiaipchi bichu yaitioni o tugul, aipchini ko u noto mieindo tugul ne kiarorji ichek.

⁴³ Ak keal mbarenik eng’ emoni, ole omwae ole, Kigoguber, ama mi chi anan tiony; kigigochi eutab Kaldeik.

⁴⁴ Alei bik mbarenik eng’ fedaisiek, ak kosir baronokab kayanjinet, ak kong’och, ak koguur baorinik, eng’ emetab Benjamin, ak eng’ komoswek che mi ole negite Jerusalem, ak eng’ nganasokab Juda, ak eng’ nganasok che mi emetab tulonok, ak eng’ nganasok che mi emet ne soi, ak eng’ nganasok che mi Murot ne bo Tai: amu agochini koweek eng’ ole kigiluulji, mwaei Jehovah.