JEREMIA 31 - BUKUIT NE TILIL

Arorutiet ne leel

¹ Mwaei Jehovah kole, Aegu eng’ betusiechoto Kamuktaindetab ortinwek tugul che bo Israel, ak koek bikyuk.

² Mwaei Jehovah ko u ni kole, Kinyor mieindo eng’ ong’atet bik che king’etune rotwetab chok: noto ko Israel, ye kigawe agochi inendet komuuny.

³ Kimong’ja Jehovah keny, kolenja, Ee, kiachamin eng’ chamnyet ne bo koigeny: kiachuutun anyun eng’ chamnyet ne tala.

⁴ Ateechin kogeny, ak keteechin, ee bergeiyatab Israel: kilelesonunenen kogeny sugutisieguk che mengechen, ak iwe iurerenote koboto ichek che igasegei.

⁵ Ak imin kogeny sabibuk eng’ tulonokab Samaria: minsei minik, ak koboiboitune logoechoto.

⁶ Amu biitu betut ye ititendos ribik eng’ tulonok che bo Epraim, kole, Ong’eetye, kebe Sion oldab Jehovah Kamuktaindennyo.

⁷ Amu mwaei Jehovah ko u ni kole, Otienji Jakobo eng’ kagasetab ge, ak owaach agobo ne o eng’ bororiosiek: omwaite, olosu ole, Ee Jehovah, soru biguk, che king’et che bo Israel.

⁸ Ogeero, amutu ichek eng’ emet ne bo murot ne bo katam, ak ayum ichek eng’ tabanwekab ng’ony, koboto ne korat, ak ne ing’wali, koboto kwondo ne tamano, ak inendet ne machei kosigis: weeksei olito, ko tuiyet ne o.

⁹ Bwanei koririonu, ak amutune sautik: agochini kobendat eng’ ole negit ainosiek, eng’ oret ne litit eng’ ole maginachi: amu a kwanda eng’ Israel, ak taitanyu Epraim.

¹⁰ Ogas ng’olyotab Jehovah, ee okwek bororiosiek, ak omwaite nito eng’ ngegusiek che looen ole, Inendet ne kiiyesta Israel, koyumi ak korib, ko u ye ribei mestowot akwennyi.

¹¹ Amu kisor Jehovah Jakobo, ak kotiach eng’ eutab inendet ne kim kosiir inendet.

¹² Ak kobwa kotien eng’ ole toror eng’ Sion, ak koroot koba tugul ole mi mieindab Jehovah, ole mi bek, ak divaik, ak mwanik, ak ole mi arekab kechir ak moek: ak koigei sobonwekwak mbaret ne kibisi; ama koarogendos kogeny agot kitigin.

¹³ Kobaibait anyun bergeiyat eng’ ureriet, koboto murenik ak boisiek agichek: amu awale rirekwak koek boiboiyet, ak agaigai ichek, ak agochi koboiboitu kometo rirekwak.

¹⁴ Ak abae akwaindo sobonwekab tisiik kobiyong’so, ak kobiyo bikyuk mieindanyu, mwaei Jehovah.

¹⁵ Mwaei Jehovah ko u ni kole: Kigasei kutit eng’ Rama, kateeiyet ak rirek che ng’wonen, rirjin Rael lagokyik; esioi kigaigai agobo lagokyik, amu ma komi.

¹⁶ Mwaei Jehovah ko u ni kole: Amat ite, anan irir: amu kigonin melekto eng’ boisieng’ung’, mwaei Jehovah; ak bwanei ichek kogeny eng’ emetab bunyot.

¹⁷ Ak mi kamang’unet ne bo betusieguk che bo let, mwaei Jehovah; ak kobwa lagoguk kogeny kiwotenywa.

¹⁸ Koagas iman koteechingei Epraim, kolen, Kiitigona, ak kiatigonage: ko u moita ne tom konai chogit: welela, si awelelok; amu i Jehovah Kamuktaindennyu.

¹⁹ Kiasigu iman ko kiawelelage; ak kiarabach kubestanyu ko kagineta: Kialilan, ee kiatoptoben, amu kiaiboti tewernatetab ming’inatennyu.

²⁰ Tos werinnyu ne achame, Epraim? Tos inendet ko lakwet ne kiboiboitune? Amu ye ang’alali kotugul arenye inendet, abwati inendet mising’ kora: iima moennyu amu inendet; arire inendet iman, mwaei Jehovah.

²¹ Lumjige kaborunoik che bo oret, yachige ketik che iboru oret: tokyi muguleldang’ung’ oret ne o, noto oret ne kiibune: weege kogeny, ee bergeiyatab Israel, weekyige nganasochuguk.

²² Iombenoti kot kotianit, ee inye chepto ne iweechige let? Amu kigotoi Jehovah koyai kit ne leel eng’ ng’ony: Yiemei kwondo muren.

²³ Mwaei Jehovah ne bo lugosiek, Kamuktaindetab Israel, ko u ni kole: Ta komwaei kogeny ichek ng’alechu eng’ emetab Juda ak eng’ nganasokyik, ye tun aweech kogeny eng’ ole kigimut kole: Ingoberurin Jehovah, ee meng’otetab imanda, ee tulwetab tililindo.

²⁴ Ak komeny oloto Juda ak nganasokyik tugul; koboto kabatik, ak ichek che iyagoti akwotisiekab kechirek.

²⁵ Amu kaabai kobiyo sobondo ne ng’etat, ak kaanyiit sobondo age tugul ne arogeni.

²⁶ Kiagosu anyun, ak ageer; ak ki anyiny ruondanyu.

²⁷ Ogeero, bwanei betusiek, mwaei Jehovah, che agoljini gotab Israel ak gotab Juda iyotetab chi ak iyotetab tiony.

²⁸ Ak ko u ye kiarib ichek si kobiit atut ak agabui ak ang’em, ak anyalil, aribe anyun ichek ko u noto si kobiit ateech ak amin, mwaei Jehovah.

²⁹ Ma komwaei eng’ betusiechoto kole, Kigoam kwanisiek sabibuk che mindililen, ak kilil kelekab lagok.

³⁰ Ago meei chi age tugul amu tengektanyi: ak kiliilei kelekab chito age tugul ne amei sabibuk che mindililen.

³¹ Ogeero, bwanei betusiek, mwaei Jehovah, che kiyomisige ak gotab Israel eng’ kayomiset ne leel, ak koboto gotab Juda;

³² ma ko u kayomiset ne kigiyomisge ak kwanisiekwak eng’ betut ne kianamanu ichek amutu komong’ eng’ emetab Misri; kayomisonotonyunet ne king’em ichek, nganda kia manong’otiot eng’ ichek, mwaei Jehovah.

³³ Ago ni kayomiset ne kiyomisige ak gotab Israel ye ibata betusiechoto, mwaei Jehovah; andoi ng’atutiennyu orinywa, ak asirjini mugulelwekwak: ak aegu Kamuktaindenywa, ak koek bikyuk.

³⁴ Ama koneti kogeny chi age tugul chitab kokwennyi, ama koneti chi age tugul ng’etab kamet, kolenjin, Nai Jehovah: amu tun naa ichek tugul, koboch ne ming’in eng’ ichek agoi ne o, mwaei Jehovah: amu anyochini kaat amun yaitienywa, ama abwati tengektanywa kogeny.

³⁵ Mwaei Jehovah, ne konu asista koek lapkeiyet bet, ak ng’atutik che kiging’at agobo arawet ak kecheik si koek lapkeiyet kemoi, ne wasei nyanjet, kot komoror mildaennyi ne bo ge; kainennyi ko Jehovah ne bo lugosiek, mwaei ko u ni kole:

³⁶ Nda istoenagei ng’atutichuto, mwaei Jehovah, ta ma ko bororiet iyotetab Israel kogeny eng’ tainnyu agoi.

³⁷ Mwaei Jehovah ko u ni kole, Nda kimuchi kikwa kipsengwet, ak kisiach lumeiywekab ng’ony orit, aiste anyun agine iyotet tugul ne bo Israel amu tuguk tugul che kigoyai, mwaei Jehovah.

³⁸ Ogeero, bwanei betusiek, mwaei Jehovah, che tun kiteekyine Jehovah nganaset koboch teekset ne koi ne bo Hanael agoi ormarichetab luita.

³⁹ Ak ta kikwae borowet kolititit kotokyigei tulwet ne ming’in ne kiguure Gareb, ak kowelelgei kot koit Goa.

⁴⁰ Ak koek ne tilil eng’ Jehovah atebwet komugul ne bo muswek, ak ne bo orek, ak mbarenik tugul che itei kererutab Kidron, agoi luita ne bo ormarichetab mbartanyit ne tokyingei kong’asis; magitutu, anan kebut kogeny agoi.