JEREMIA 30 - BUKUIT NE TILIL

Kaweegunet ne tun kiweegu Israel ak Juda eng’ betusiek che bwanei

¹ Kinyonji Jeremia ng’olyot ne kibunu Jehovah, kolenji,

² Mwaei Jehovah, Kamuktaindetab Israel, ko u ni kole, Sirji bukuit ng’alek tugul che koamwaun.

³ Keero, bwanei betusiek, mwaei Jehovah, che awale luuletab bikyuk Israel ak Juda, mwaei Jehovah: ak agochi ichek koweek kobwa emet ne kiagochi kwanisiekwak, ak kobunji.

⁴ Ak chu ng’alek che kimwa Jehovah agobo Israel ak Juda.

⁵ Amu mwaei Jehovah ko u ni kole: Kigegas tuget ne bo botanet, ak ne bo kaiyweisiet, ne ma bo kalyet.

⁶ Oteeb anyun, si onai ngo tinyei mureno ng’wanindo ne bo sigisiet: amu nee anyun si ageere muren age tugul konamei suennyi, ko u kwondo ne machei kosigis, ak kowalogis togochik tugul eng’ arogenet?

⁷ Bwa! Amu o betunoto, kot ko mami age ne u noto: noto ko betutab nyalildab Jakobo; ago kisoru eng’ nyalilato.

⁸ Ak tun airie eng’ betunoto choginnyi ne mi kaating’ung’, mwaei Jehovah ne bo lugosiek, ak ang’eti anoguk; ama koyaei toek inendet koek otwogindenywa.

⁹ Ago otei Jehovah Kamuktaindenywa, ak Daudi laitoriandenywa, ne ang’eetyini ichek.

¹⁰ Ameiywei anyun, ee Jakobo otwogindennyu, mwaei Jehovah; ametoptoben, ee Israel: amu asorun eng’ ole loo, koboto iyoteng’ung’, komong’ eng’ emet ne kiga kiluulji; ak koweek Jakobo, ak kosis, ak komuuny, ama komi chi ne imui inendet.

¹¹ Amu ami koboten, mwaei Jehovah, si asorun; amu agesu bororiosiek tugul che kigayestochin, ago magesun inye; ago atigonenen kiruoget, amabagaktoin ama kibirin.

¹² Amu mwaei Jehovah ko u ni kole, Mainyaaksei kaguoteneng’ung’, ak ko ng’wan ng’otobeng’ung’.

¹³ Mami chi ne ng’alaldaun, si kobiit kinyain: metinye kerichek che kinyaise.

¹⁴ Kigoutienen chamaniguk tugul: macheng’in: amu kaaguotenin eng’ kaguotenetab bunyot eng’ kotigonetab inendet ne korom; amu oindab yaitieng’ung’, amu kitesogis tengekwogiguk.

¹⁵ Amu nee si irir eng’ kaguoteneng’ung’? Mainyaaksei ng’wanindang’ung’: amu oindab yaitieng’ung’, amu kitesogis tengekwogiguk, koayaun anyun tuguchuto.

¹⁶ Kiamei anyun ichek tugul che amin; kiluulei buniguk tugul, wendi age tugul luulet; ak kiluulei ichek tugul che luulin, ak agoitoi kebar ichek che cheng’ei kobarin.

¹⁷ Amu asoobin, ak anya ng’otobosieguk, mwaei Jehovah; amu kigoguurenen ne kigitimda, kole Sion nito, ne mamage kiy chi.

¹⁸ Mwaei Jehovah ko u ni kole, Ogeero, awale kogeny luuletab emaisiekab Jakobo, ak arire meng’otosiekyik; ak keteech nganaset karaitanyi, ak kotebi gotab laitoriat ko u yeginye.

¹⁹ Ak komong’une oloto kongoi ak kutitab icheget che igasegei: ak ates ichek, ama kong’ering’itu; atorori kogeny ichek, ama konyeratitu.

²⁰ Ak koigei lagokwak atkinye tai, ak kogimit tuiyenywa eng’ tainnyu, ak abir tugul che usei ichek.

²¹ Ak kobiitune ichek bounindenywa, ak komong’une kwenunywa kiruogindenywa; ak agochini inendet korik, konyo korikya; amu ng’o inendet ne tinyei nyiganatet korikya? Mwaei Jehovah.

²² Ak oegu bikyuk, ak aegu Kamuktaindeng’wong’.

²³ Ogeero, kagomong’ kipchurjurietab Jehovah, noto ko nereknatennyi ne korom, ee kipchurjuriet ne usei kot: kwerei metowekab kiptengeginik.

²⁴ Mamweeksei neregek che ng’wonen che bo Jehovah agoi koyai koges, agoi koyai magutikab muguleldanyi kosulda: oguitosi ng’olyondonito eng’ betusiek che bo let.