JEREMIA 3 - BUKUIT NE TILIL

Kiek kit ne kibiit eng’ Bororosiek taman che bo Israel, kit ne kiteechine Juda

¹ Mwaei ichek kole, Ngot koon chi osotiondennyi, ak kobagakta inendet ak koek osotiotab chito age, ko tos ta koweekyigei chichoto kwonyoto kogeny? Tos maimuruoni emonoto mising’? Ago kiiyai kugoinatet koboto chamanik che chang’; ago oweekyage kogeny, mwaei Jehovah.

² Onyal barak ak ogeer tulonok che churiotin; mi ano komoswek che tom oruiye tuwai? Kiigen ichek eng’ ortinwek taban, ko u Marabuindet eng’ ong’atet; ak kiimuruon emet eng’ kugoinateng’ung’ ak eng’ sogornateng’ung’.

³ Kigeger anyun ropta amu noto, si mata kobiit ropta ne bo let; ago itinye togetab chepkugoniot, ak iesioi ililan.

⁴ Tos mechame irirja koboch nguno, ile, Baba, i kandoindetab ming’inatennyu?

⁵ Tos nerechi inendet agoi? Nerechi agoi kagesunet? Keero, kiing’alal, ak kiiyai tuguk che yaachen ak kiisub oreng’ung’.

⁶ Kimwawa anyun Jehovah kogeny eng’ betusiekab Josia laitoriat kolenja, Tos kiigeer noto kiyai Israel ne kigogetyigei let? Kigotogosta tulwet age tugul ne koi, ak kwo kelutab ketit age tugul ne tuon, ak kiyai kugoinatet eng’ oloto.

⁷ Ak kingo kagoyai tuguchuto tugul, amwa ale, Weekyinagei inendet; ago ma week: ak kigeer nito chepkamennyi Juda kaberberindet.

⁸ Ak kiageer agobo ng’olyondonito, ye kingo kagoyai Israel ne kiga kogetyigei let, ibetab ge, ko kiaon inendet ak agochi baruetab besiet, ago ma iyweis Juda chepkamennyi kaberberindet; ago kiwa agine koyai kugoinatet.

⁹ Ak amu kiit inendet kole kiy ne nyamnyum kugoinatet, ko kigimuruon emet, ak kiipgei ak koik ak subenaik.

¹⁰ Ak eng’ chu tugul ko ma weekyagei eng’ muguleldanyi komugul Juda chepkamennyi, kaberberindet, ago eng’ ng’alset, mwaei Jehovah.

¹¹ Kimwawa Jehovah kolenja, Kiibartagei Israel ne kigogetyigei let kole bo iman kosiir Juda kaberberindet.

¹² Ui mwachi ng’alechu komostab murot ne bo katam, ilenji, Weege, inye Israel ne kiiweekyige let, mwaei Jehovah; ma ageerok eng’ neregek: amu atinye rirenet, mwaei Jehovah, manerechi agoi.

¹³ Ng’any tengektang’ung’ kityo, ile kiingelelji Jehovah Kamuktaindeng’ung’, ak kiiseerji toek ortinweguk eng’ kelutab ketit age tugul ne tuon, ak ma ogas it kutinnyu, mwaei Jehovah.

¹⁴ Oweege, okwek lagok che kiogetyige let, mwaei Jehovah; amu a manong’otiot eng’ okwek; ak amut chito agenge eng’ nganaset agenge, ak bik aeng’ che bo oret agenge, ak amutwak obwa Sion.

¹⁵ Ak agonok mestowek ko u ye chamei muguleldanyu, che baok eng’ naet ak kaguiyet.

¹⁶ Ak ye tun kaotesage ochang’itu eng’ emet, mwaei Jehovah, ko ma komwaei eng’ betusiechoto kogeny kole, Moingetab arorutietab Jehovah; ama chutei metit; ama kobwati ichek; ama kemage kiy; ama keyaei kogeny.

¹⁷ Tun kuure ichek Jerusalem eng’ betusiechoto, ng’echeretab laitornatet ne bo Jehovah, ak koyumjigei bororiosiek tugul, koyumjigei kainetab Jehovah, eng’ Jerusalem: ama kobendote uuindab mugulelwekwak che yaachen.

¹⁸ Tun bendoti eng’ betusiechoto gotab Juda ak gotab Israel, ak kobwa tuwai komong’ eng’ emet ne bo murot ne bo katam, kobwa emet ne kiagochi kwanisiekwok kobunji.

Mieundab Jehovah

¹⁹ Ago kiale, Amuktoi ano andein otebi ak lagok, ak agonin emet ne kararan, borotet ne mie ne bo lugosiekab bororiosiek? Ak kiale, Oguurena Baba; ama omastoi ometa.

²⁰ Iman, ko u ye bagaktoi osotiot manong’otiondennyi eng’ kaberberisiet, ko u noto, kioyaiywa kaberberisiet, ee gotab Israel, mwaei Jehovah.

²¹ Kigasei waagat eng’ tulonok che churiotin, rirek, ak somutikab lagokab Israel; amu kigomaas orenywa, kigoutie Jehovah Kamuktaindenywa.

²² Oweege, okwek lagok che kiogetyigei let, si asoob kachuchugeng’wong’ bo ge. Keero, kagibwanjin; amu i Jehovah Kamuktaindennyo.

²³ Iman, kigeni buch toretet ne bunu tulonok, wasetab ge ne mi tulonok. Iman mi yetunetab Israel eng’ Jehovah Kamuktaindennyo.

²⁴ Ago kigoam kit ne bo kalilanet boisionikab kwanisiekyok koboch ming’inatennyo; koboto kechirekwak ak akwotisiekwak, ak werikwak ak tibikwak.

²⁵ Ongeruiye eng’ kalilanennyo, ak ingotuchech tewernatennyo: amu kigeyachi tengekto Jehovah Kamuktaindennyo, achek ak kwanisiekyok, koboch ming’inatennyo agoi betuni: ama kigas it kutitab Jehovah Kamuktaindennyo.