JEREMIA 29 - BUKUIT NE TILIL

Baruet ne kisirji Jerema luulenik che mi Babulon

¹ Chu ng’alekab baruet ne kiiyokto maotiot Jeremia eng’ Jerusalem, koyokyi boisiek che king’et eng’ che kiga kiluul, ak tisiik, ak maotik, ak bik tugul, che kiga luul Nebukadnesar eng’ Jerusalem koba Babulon,

² (ye kingo kagoba eng’ Jerusalem laitoriat Jekonia, ak kametab laitoriat, ak kiptainik, koboto bounikab Juda ak Jerusalem, ak musogik, ak kitang’ik,)

³ kiib Elasa weritab Sapan, ak Geramia weritab Hilkia (che kiiyokto Sedekia laitoriatab Juda koba Babulon oldab Nebukadnesar laitoriatab Babulon), kolenji,

⁴ Mwaei Jehovah ne bo lugosiek, Kamuktaindetab Israel, komwachin bik tugul che kigiluul, che kiachamde keluul eng’ Jerusalem koba Babulon:

⁵ ko u ni kole, Oteech gorik, ak omeny; ak ogol mbarenik, ak oam logoekwak.

⁶ Otunisie, si osich werik ak tibik; ak otunisiechi werikwok, ak ogoite tibikwok, si kosich werik ak tibik; ak otesage eng’ oloto, among’ering’itu.

⁷ Ak ocheng’ji kalyet nganaset ne kiachamde keluuljok, ak osa Jehovah agobo nganasanato: amu onyoru kalyet eng’ kalyetab nganasanato.

⁸ Amu mwaei Jehovah ne bo lugosiek, Kamuktaindetab Israel, ko u ni kole: Amongoberberak maotik che mi kwenung’wong’, ak bikwok che ng’orsei, anan oyan karuotitaosiekwok che oruotyini.

⁹ Amu maotenwok lembeita eng’ kainennyu: ma ayogu ichek, mwaei Jehovah.

¹⁰ Amu mwaei Jehovah ko u ni kole, Ye ibata kenyisiek tamanwogik tisabu omi Babulon, arutochok, ak asuldawok ng’olyondennyu ne mie, amutwok obwa olito.

¹¹ Amu angen kabwatutik che abwati agobo okwek, mwaei Jehovah, kabwatutikab kalyet, ma che bo yaitiet, si agonok kamang’unet eng’ betusiekwok che bo let.

¹² Ak oguura, ak obe osaa, ak agasak.

¹³ Ak ocheng’a, ak onyorua, ye ocheng’a eng’ mugulelwekwok tugul.

¹⁴ Ak onyorua, mwaei Jehovah, ak awal luuleng’wong’, ak ayumak omong’une bororiosiek tugul, ak eng’ komoswek tugul ole kiaonjok, mwaei Jehovah; ak amutwak kogeny obwa olito kiagoitoenok.

¹⁵ Amu kiomwa ole, Kigong’eetwech Jehovah maotik eng’ Babulon.

¹⁶ Amu mwaei Jehovah ko u ni agobo laitoriat ne tebe ng’echeretab laitornatet ne bo Daudi, ak agobo bik tugul che menyei nganasani, tupchosiekwok che ma kiluul kobotok;

¹⁷ mwaei Jehovah ne bo lugosiek ko u ni kole: Ogeero, ayokyini ichek rotwetab chok, ak rubet, ak koroito, ak ayai ichek koigei logoekab mogoonik che samis, che magimuchi keam, amu yaachen mising’.

¹⁸ Ak asube ichek rotwetab chok, ak rubet, ak koroito, ak agoite ichek kewirji komosi ak komosi eng’ bounatosiek tugul che bo ng’ony, si koek che chubotin, ak che kikwong’e, ak che kirenyei, ak che kiteweri, eng’ bororiosiek tugul che kiaonji;

¹⁹ amu ma kas ng’alekyuk, mwaei Jehovah, che kiayoktochine ichek otwogikyuk maotik, ang’eete karon mising’ ak ayokte ichek; ago ma ocham ogas, mwaei Jehovah.

²⁰ Ogas anyun ng’olyotab Jehovah, okwek tugul che kigiluul, che kiayokte eng’ Jerusalem koba Babulon.

²¹ Mwaei Jehovah ne bo lugosiek, Kamuktaindetab Israel, agobo Ahab weritab Kolaia, ak Sedekia weritab Maaseia, che maotenwok lembeita eng’ kainennyu, ko u ni kole: Ogeero, andoi ichek eutab Nebukadresar laitoriatab Babulon; ak kobar ichek eng’ taing’wong’;

²² ak komwaei luulenik tugul che bo Juda che mi Babulon, eng’ chubisiet kole, Ingoyain Jehovah iige Sedekia ak Ahab, che kiwatan laitoriatab Babulon eng’ ma;

²³ amu kigoyai berberindo eng’ Israel, ak koyai ibetab ge ak osotikab bikab kokwenywa, ak kigomwa ng’alek che bo lembech eng’ kainennyu, che kima ang’at ichek; ak ko anendet ne angen, ak ko a baoriat, mwaei Jehovah.

Maotik alak che bo lembech, ak tuguk che kibwanji

²⁴ Ak imwa agobo Semaia Neelamindet, ile,

²⁵ Mwaei Jehovah ne bo lugosiek, Kamuktaindetab Israel, ko u ni kole, Amu kiiyokyi bik tugul che mi Jerusalem baronok eng’ kaineng’ung’, ak iyokyi Sepania weritab Maaseia tisiindet, ak tisiik tugul, ilenji,

²⁶ Kaindein Jehovah iegu tisiindet igeer tisiindet Jeoiada, si kobiit oegu bounik eng’ gotab Jehovah, amu chi age tugul ne kibiywet, ak koyaegei koek maotio, iratyi ketik kelyekyik, ak iratyi mugurek kaatinnyi.

²⁷ Ara anyun, amu nee si meger kong’ Jeremia ne bo Anatot ne yaegei koek maotiondeng’wong’,

²⁸ amu ko u ye kagoyokwech inendet ng’alek eng’ Babulon, kolenjech, Bunjin betusiek che chang’ luuleng’wong’: oteech gorik ak omeny; ak ogol mbarenik, si oam logoekwak?

²⁹ Ak kisomanji Sepania tisiindet baruani, kogasei Jeremia maotiot.

³⁰ Konyonji anyun ng’olyotab Jehovah Jeremia, kolenji,

³¹ Iyokyi ng’olyot bik tugul che kigeluul, ilenji, Kamwa Jehovah agobo Semaia Neelamindet, ko u ni kole: Amu kigomaotenwok Semaia, ak kima ayogu, ak kogogonok omang’u lembeita;

³² noto anyun, mwaei Jehovah ko u ni kole, Ogeero, abire Semaia Neelamindet, ak iyotennyi; masichei chi ne menyei koboto bichu, ama keerei mieindo ne ayachini bikyuk, mwaei Jehovah: amu kimwa ngelelnatet kongelelji Jehovah.