JEREMIA 28 - BUKUIT NE TILIL

Maoinatetab lembech ne bo Hanania, ak meenyi

¹ Ak eng’ kenyinoto, eng’ taunetab laitornatetab Sedekia laitoriatab Juda, eng’ kenyit ne bo ang’wan, eng’ arawetab mut, kong’alalwa Hanania weritab Asur, maotiot, ne ki bo Gibeon, eng’ gotab Jehovah, eng’ taitab tisiik ak bik tugul kolenja,

² Mwaei Jehovah ne bo lugosiek, Kamuktaindetab Israel ko u ni kole, Kaairi chogitab laitoriatab Babulon.

³ Kotom kogesgei kenyisiek aeng’, aibu kogeny kobwa olito tuguk tugul che bo gotab Jehovah, che kiga ib Nebukadnesar laitoriatab Babulon eng’ olito koba Babulon:

⁴ ak amutu kogeny konyo olito Jekonia weritab Jeoiakim laitoriatab Juda, koboto luulenik tugul che kigiluul che bo Juda, che kiba Babulon, mwaei Jehovah: amu airie chogitab laitoriatab Babulon.

⁵ Kimwachi anyun maotiot Jeremia maotiot Hanania eng’ taitab tisiik ak eng’ taitab bik tugul che kitonondos eng’ gotab Jehovah,

⁶ ak kile maotiot Jeremia, Amen: ingoyai Jehovah ko u noto: ingoyai Jehovah ng’aleguk kosulda che kaimaoten, koib kogeny tuguk kobwa gotab Jehovah, ak komut tugul che kigiluul, kobwa olito, kobunu Babulon.

⁷ Ago gas anyun ng’olyondoni amwae eng’ taing’ung’ ak eng’ taitab bik tugul:

⁸ Kimaoten maotik che bo keny che kiindounena ak che kiindounenen agobo emotinwek che chang’, ak bounatosiek, agobo luget ak yaitiet, ak koroito.

⁹ Maotiot ne maoteni agobo kalyet, ye kagosulda ng’olyondennyi, ko naaksei maotiondonoto, kele, kiiyogu Jehovah iman.

¹⁰ Kiinem anyun maotiot Hanania chogit ne kimi kaatitab maotiot Jeremia, ak koiri.

¹¹ Ak king’alal Hanania eng’ taitab bik tugul kole, Mwaei Jehovah ko u ni kole: Airie ko u noto chogitab Nebukadnesar laitoriatab Babulon eng’ kaatitab bororiosiek tugul, kotom kogesgei kenyisiek aeng’u. Kiwa anyun maotiot Jeremia.

¹² Kinyonji anyun ng’olyotab Jehovah Jeremia, ye kingo kagoiri maotiot Hanania chogit eng’ kaatitab maotiot Jeremia, kolenji,

¹³ Ui, ak imwachi Hanania ilenji, Kamwa Jehovah ko u ni kole: Kaiiri chogisiekab ketik; ago iyae chogisiekab karik igeere choto.

¹⁴ Amu mwaei Jehovah ne bo lugosiek, Kamuktaindetab Israel, ko u ni kole: Kande chogitab karnet kaatwekab bororiosiechu tugul, si kobiit koot Nebukadnesar laitoriatab Babyulon; ak otei inendet: ak kaagochi inendet tiong’ikab timin agichek.

¹⁵ Yeityo komwachi maotiot Jeremia maotiot Hanania, kolenji, Kaso, Hanania. Ma iyogun Jehovah; ago igochini bichu komang’ lembeita.

¹⁶ Noto anyun, mwaei Jehovah ko u ni kole, Keero, aistoin eng’ ng’ony: imee kenyini, amu kaimwa ngelelnatet ingelelji Jehovah.

¹⁷ Kime anyun maotiot Hanania eng’ kenyinoto eng’ arawetab tisab.