JEREMIA 27 - BUKUIT NE TILIL

Kiteechin bororiosiek kogas it Babulon

¹ Kinyonji Jeremia ng’olyondoni kobunu Jehovah eng’ taunetab laitornatetab Jeoikam weritab Josia, laitoriatab Juda,

² kolenji, Kamwawa Jehovah ko u ni kole, Yachige anok ak chogisiek, ak iratyi kaating’ung’;

³ yeityo iyokyi laitoriatab Edom, ak laitoriatab Moab, ak laitoriatab lagokab Amon, ak laitoriatab Turo, ak laitoriatab Sidon, koib bik che kiyoktoi che bwanei Jerusalem oldab Sedekia laitoriatab Juda:

⁴ ak iyomis ichek koba oldab kiptainikwak kolenji, Kamwa Jehovah ne bo lugosiek, Kamuktaindetab Israel, ko u ni kole: Omwachini kiptainikwok ko u ni olenjini:

⁵ Kiayai ng’onyuni, chi ak tiony che mitei ng’ony, eng’ kamuktainnyu ne o ak eunnyu ne chuulat; ak agochi emonito inendet ne ageere ale nyolu agochi.

⁶ Kaagochi anyun emotinwechuto tugul Nebukadnesar laitoriatab Babulon, otwogindennyu, kaagochi inendet tiong’ikab timin koot inendet.

⁷ Ak koot bororiosiek tugul inendet ak werinnyi, agoi koit betusiekab emennyi: ak koyae anyun bororiosiek che chang’ ak laitorinik che eechen inendet koek otwogindenywa.

⁸ Ak tun abire bororiet ak bounatet ne maotei Nebukadnesar nito laitoriatab Babulon, ak ne esioi konde kaatinywa chogitab laitoriatab Babulon, abire bororionoto rotwetab chok, ak rubet, ak koroito, agoi agesu ichek eng’ eunnyi, mwaei Jehovah.

⁹ Ago, amogas okwek maotikwok anan bikwok che ng’orsei anan karuotitaosiekwok anan kipsogeinik anan bonik, che ng’alalwok kolenjinok, Moote laitoriatab Babulon:

¹⁰ amu maotenwok lembeita, si koistook olooegitu eng’ emeng’wong’; kole si aonak olusye.

¹¹ Ago bororiet ne kase it laitoriatab Babulon, ak koot inendet, abagaktoi bororionoto kong’et eng’ emenywa, mwaei Jehovah; ak kobat emonoto, ak komeny oloto.

Kiteechin Juda kogas it Babulon

¹² Ak kiang’alalji Sedekia laitoriatab Juda ko u ng’alechuto tugul, alenji, Onde kaating’wong’ chogitab laitoriatab Babulon, ak oot inendet ak bikyik, si osopche.

¹³ Amu nee si imee, inye koboto biguk, eng’ rotwetab chok, ak eng’ rubet, ak eng’ koroito, ko u ye kogomwa Jehovah agobo bororiet ne machamei koot laitoriatab Babulon?

¹⁴ Amogas ng’alekab maotik che ng’alalwok kolenjinok, Moote laitoriatab Babulon: amu maotenwok lembeita.

¹⁵ Amu ma ayogu ichek, mwaei Jehovah, ago maoteni lembechek eng’ kainennyu kole si aonak, ak olusye, okwek ak maotik che maotenwok.

¹⁶ Kiang’alalji tisiik agichek ak bichu tugul, alenji, Kamwa Jehovah ko u ni kole: Amogas ng’alekab maotikwok che maotenwok kolenjinok, Ogeero, negit si keweech kogeny terenikab gotab Jehovah eng’ Babulon: amu maotenwok lembeita.

¹⁷ Amogas bichoto; oot laitoriatab Babulon si osopche: amu nee anyun si koek karaita nganasani?

¹⁸ Ago ngot ko maotik icheget, ak ngot komi ng’olyotab Jehovah eng’ ichek, ingosa anyun Jehovah ne bo lugosiek, si ma kiib terenik che king’et eng’ gotab Jehovah, ak eng’ gotab laitoriatab Juda, ak eng’ Jerusalem, koba Babulon.

¹⁹ Amu kamwa Jehovah ne bo lugosiek ko u ni agobo tolochik, ak nyanjet, ak ng’echerok che tebe tuguk, ak che ng’etunotin che bo terenik che king’et eng’ nganasani,

²⁰ che kima ib Nebukadnesar laitoriatab Babulon, ye kiluulei Jekonia weritab Jeoiakim, laitoriatab Juda, komut eng’ Jerusalem kwo Babulon, ak bik tugul che toogunotin che bo Juda ak Jerusalem;

²¹ ee, mwaei Jehovah ne bo lugosiek, Kamuktaindetab Israel, agobo terenik che king’et eng’ gotab Jehovah, ak eng’ gotab laitoriatab Juda ak eng’ Jerusalem, ko u ni kole,

²² Kiibei koba Babulon, ak tebe oloto, agoi betut ne arutochini ichek, mwaei Jehovah; aibu anyun aweegu kobwa olito.