JEREMIA 23 - BUKUIT NE TILIL

Ing’eeti Jehovah bounik che miachen

¹ Bwa eng’ mestowek che ng’emei ak koyestoi kechirekab akwennyu! Mwaei Jehovah.

² Mwaei anyun Jehovah, Kamuktaindetab Israel, ko u ni, agobo mestowek che baei bikyuk, kole, Kioiyeste akwennyu, ak oon, ama obe ogeer; ogeero, aitwok biret ne bo yaitietab boisionikwok, mwaei Jehovah.

³ Ak ayum che king’et che bo akwennyu komong’ eng’ emotinwek tugul ole kigaonji, ak amutu kogeny kobwa biusiekwak; ak koiiyo kotesogis.

⁴ Ak ande mestowek che iyagi: ama koiyweisiei kogeny, anan koarogenso, ama biitu chi ne rarjin kiy, mwaei Jehovah.

⁵ Ogeero, bwanei betusiek, mwaei Jehovah, che ang’eetyini Daudi Temet ne bo iman, ak kolaitoran ko laitoriat, ak kobois eng’ ng’omnatet, ak koyai kiruoget ak imanda eng’ emet.

⁶ Kisoru Juda eng’ betusiekyik, ak komeng’is Israel eng’ chametab ge: ak ni kainennyi ne kemwaitoe, Jehovah ko imandanyo.

⁷ Noto anyun, ogeero, bwanei betusiek, mwaei Jehovah, ye ma komwaei ichek kole, Ko u ye sobei Jehovah, ne kiimut lagokab Israel komong’ eng’ emetab Misri.

⁸ Ago, mwaei kole, Ko u ye sobei Jehovah, ne kiimut iyotetab gotab Israel komong’ eng’ emet ne bo murot ne bo katam, ak eng’ emotinwek tugul ole kigaonji ichek, ak komeny emenywa.

Kegerei kong’ maonik che bo lemech

⁹ Kagomea mugulel agobo maotik, irigisistos kowekyuk; a u chi ne kabogit, ak a u chi ne kagoterter divaik; amu Jehovah, ak amu ng’alekyik che tililen.

¹⁰ Amu nyiitat emet bik che yaei ibetab ge; amu rirei emet amu kayosiet; kigoyaam ole agete akwotisiek eng’ ong’atet; ya bandanywa, ak ma bo iman kimnatenywa.

¹¹ Amu muruon maotiot ak tisiindet; ee, kianyorji gonnyu yaitienywa, mwaei Jehovah.

¹² Egu anyun orenywa komoswek che chaboen eng’ mesundeito: kionei kot kobutyo: amu aipchini yaitiet, eng’ kenyit ne aityini birenywa, mwaei Jehovah.

¹³ Ak kiageer berberindo eng’ maotikab Samaria; kimaotene Baal, ak kogochi bikyuk Israel kolel.

¹⁴ Kiageerji maotikab Jerusalem agichek kit ne samis mising’; yaei ibetab ge, ak kobendote lembechek, ak kogimit eunekab yaikab yaitiet, kot ko mami chi ne weeksei eng’ yaitiennyi: kaigei ichek tugul Sodom eng’ ane, ak kaigei che menyei yoto, Gomora.

¹⁵ Mwaei anyun Jehovah ne bo lugosiek agobo maotik ko u ni kole: Ogeero, abae ichek ng’wonet, ak agochi beek koee: amu kigoyom emet tugul muruonindab maotikab Jerusalem.

¹⁶ Mwaei Jehovah ne bo lugosiek ko u ni kole, Amoepchi it ng’alekab maotik che maotenwok; inetok tangoita: mwaei ng’ang’utiet ne bunu mugulelwekwak, ama ne mong’une kutitab Jehovah.

¹⁷ Mwachin ichek kotugul bik che sasa, kolenjin, Kamwa Jehovah kole, Onyoru kalyet; ak komwachi chi age tugul ne wendote uuindab muguleldanyi, kolenjin, Manyonjinin yaitiet age tugul.

¹⁸ Amu ng’o ne kigotonon eng’ kapkiruogetab Jehovah, kot komuch koguiyo ak kogas ng’olyondennyi? Ng’o ne kiepchi it ng’olyondennyu, ak kogas?

¹⁹ Ogeero, kagomong’ kipchurjurietab Jehovah, noto neregekyik che koromen, ee, kipchurjuriet ne usei kot: kwerei metowekab kiptengeginik.

²⁰ Maweeksei neregekab Jehovah, agoi koyai koges, agoi koyai magutikab muguleldanyi kosulda: oguitosi ng’olyondonito komie eng’ betusiek che bo let.

²¹ Kima ayokte maotichuto, ago kiruai: kima ang’alalji, ago kimaotenso.

²² Ago nda kiga tononso eng’ kapkiruogennyu, ta kiigochin bikyuk kogas ng’alekyuk, ak ta kiweechi bichoto koweek eng’ orenywa ne ya, ak eng’ yaitietab boisionikwak.

²³ Tos a Kamuktaindet ne negit kityo, mwaei Jehovah, ak ma a Kamuktaindet ne mi ole loo?

²⁴ Tos imuchi chi kounygei eng’ komoswek che ung’otin, kot ko mageer inendet? Mwaei Jehovah. Tos ma anyi kipsengwet ak ng’ony? Mwaei Jehovah.

²⁵ Kiagas kit ne kimwa maotik, che maoteni lembechek eng’ kainennyu kole, Koaruotyi, koaruotyi.

²⁶ Tebe kot kotianit nito mugulelwekab maotik che maoteni lembechek, maotikab kaberberisietab mugulelwekwak,

²⁷ che len kogochi bikyuk koutie kainennyu eng’ karuotitaosiekwak che mwachin chi tugul chitab kokwennyi, ko u ye kiutie kwanisiekwak kainennyu amu Baal?

²⁸ Ingomwa maotiot karuotitoet ne koiruotyi; ak inendet ne tinyei ng’olyondennyu komwa eng’ imanda. Ting’egei nee metetek ak nganok? Mwaei Jehovah.

²⁹ Tos ma u ng’olyondennyu mat? Mwaei Jehovah; ak ma u kiriswet ne tonei ruandet?

³⁰ Noto anyun, mwaei Jehovah kole, Ogeero, agirindoi maotik, che kichor chi age tugul ng’alekyuk kochore chitab kokwennyi.

³¹ Mwaei Jehovah kole, Ogeero, agirindoi maotik, che boisie ng’elyebwekwak, kolen, Kole inendet.

³² Mwaei Jehovah kole, Ogeero, agirindoi ichek che maoteni karuotitaosiekab lembech, komwaita, ak kogochi bikyuk kolel amu lembechekwak, ak eng’ kachaunenywa bo ge ne bo buch: ago ma ayokte, anan ang’at ichek; ama toreti bichu agot kitigin, mwaei Jehovah.

³³ Ak ye teebenen bichu, anan ko maotiot, anan ko tisiindet, kolenjin, Nee lautietab Jehovah? Imwachi anyun ilenji, Okwek lautiet! Atimdook, mwaei Jehovah.

³⁴ Ak abire maotiot, ak tisindet, ak bik, che mwaei kole, Lautietab Jehovah, abire chichoto ak gonnyi.

³⁵ Omwachi anyun okwek, chi age tugul chitab kokwennyi, ak komwachi chi age tugul ng’etab kamet, kolenji, Kawol nee Jehovah? Ak, Kamwa nee Jehovah?

³⁶ Ama omwae lautietab Jehovah kogeny: amu egu ng’olyotab chi age tugul lautiennyi; amu kiomaas ng’alekab Kamuktaindet ne sobei, che bo Jehovah ne bo lugosiek, Kamuktaindennyo.

³⁷ Mwachi maotiot ko u ni ilenji, Tos kawolun nee Jehovah? Ak, Kamwa nee Jehovah?

³⁸ Ago ngot omwa ole, Lautietab Jehovah; mwaei anyun Jehovah ko u nito kole: Amu omwae ng’olyondoni, ole, Lautietab Jehovah, ak kiayogu kemwawok kele, Amat ole, Lautietab Jehovah;

³⁹ noto anyun, ogeero, autienok agoi, ak atimdook, koboto nganaset ne kiagonok ak kwanisiekwok, obe eng’ tainnyu:

⁴⁰ ak aibwok chotisiet ne bo agoi, ak kalilanet ne bo kotugul, ne magiutie.