JEREMIA 22 - BUKUIT NE TILIL

Ng’alekab bwa agobo maoinatosiek che kigimwa agobo laitorinikab Juda

¹ Kamwa Jehovah ko u ni kole: Chorjige gotab laitoriatab Juda, ak imwa eng’ oloto ng’olyondoni,

² ile, Kas ng’olyotab Jehovah, ee laitoriatab Juda, ne itebe ng’echeretab laitornatet ne bo Daudi, inye, ak otwogiguk, ak biguk che bendi orit kobunei ormarichochu.

³ Mwaei Jehovah ko u ni kole: Oyai okwek kiruoget ak imanda, ak osoru ne kigiluul komong’ eng’ eutab usindet: amat oyai ne ya, anan koromnatet, oyachi toondet, anan ne matinyei kwanda, anan mosoget, amotumde korotik che matinyei tengek, eng’ olito.

⁴ Amu ngot oyai iman kiito, kobendi orit anyun kobunei ormarichokab goi, laitorinik che tebe ng’echeretab laitornatet ne bo Daudi, kolanyei karisiek, ak mbartanyisiek, inendet ak otwogikyik, ak bikyik.

⁵ Ago ngot ko mogas it ng’alechuto, ayosiechinige anyun, mwaei Jehovah, ale, egu goi karatia.

⁶ Amu mwaei ko u ni Jehovah agobo gotab laitoriat ne bo Juda kole, I Gilead eng’ ane, ak ko i metitab Lebanon; ago ayain iman iegu ong’atet, ak nganasok che magimenyei.

⁷ Ak achob ng’emik agobo inye, chi tugul ak karikyik: ak koluul ichek taragoniguk che kororon ak kowirji ma.

⁸ Ak kosiirtoe bororiosiek che chang’ nganasani, ak kolenji chi age tugul chitab kokwennyi, Amu nee si koyachi Jehovah ko u ni nganasani o?

⁹ Kowol anyun kole, Amu kimeto kayomisetab Jehovah Kamuktaindenywa, ak kolos kanamonik che ter, ak koot.

¹⁰ Amorirji ne kigome, anan ote agobo inendet: ago orir mising’ agobo inendet ne mandoi; amu ma koweeksei inendet kogeny, anan kogeer emennyi ne kigisikyin.

¹¹ Amu kamwa Jehovah agobo Salum weritab Josia laitoriatab Juda, ne kilaitoran kogeer Josia kwandanyi, ne kimanda eng’ olito, kole, Ma koweeksei kogeny;

¹² ago mechin ole kigiluulji, ak ma kogeerei emoni agoi.

¹³ Bwa eng’ inendet ne teechei gonnyi ko ma eng’ imanda, ne teechei gorikyik che bo orit eng’ sastaet; ne boisie chitab kokwennyi amaigochin melekto, amaigochin kit ne yamegei ak boisiennyi;

¹⁴ ne mwaei kole, Ateekyinige got ne o ak gorik che baroen che bo orit, ak kondechigei tirisiok; ak kigitete taragonik, ak kesale saleiywek che biriren.

¹⁵ Tos ilaitoran, amu igiilige ibelisie eng’ taragonik? Tos kima amis kwandang’ung’ ak koeeiso, ak koyai kiruoget ak iman? Kimieit anyun eng’ inendet.

¹⁶ Kiiruoksechi ne banan ak ne matinyei kiy; kimieit anyun. Tos kima konaena nito? Mwaei Jehovah.

¹⁷ Ago matokyingei konyeguk ak muguleldang’ung’ kiy age kobate tugukab ng’wen, ak tumdaetab korotik che matinyei tengek, ak sastaet, ak koromnatet, koyai choto.

¹⁸ Mwaei anyun Jehovah agobo Jeoiakim weritab Josia, laitoriatab Juda, ko u ni kole: Maiteei chi agobo inendet kole, Bwa, werit ne kitupche! Anan, Bwa, chepto ne kitupche! Maiteei chi agobo inendet kole, Bwa, kiptaiyandani! Anan, Bwa etunatennyi!

¹⁹ Kitubei ko u ye kitubei sigiriet, kichuuti ak kewirta kosiir ormarichokab Jerusalem.

²⁰ Togoste Lebanon, ak irir; ak iwaach eng’ Basan: ak irir eng’ Abarim; amu kagobar chamaniguk tugul.

²¹ Kiang’alalun eng’ betusiekab boroteng’ung’; ago kiimwa ile, Magase. Kigoek biteeng’ung’ nito koboch ming’inateng’ung’, ile, megase it kutinnyu.

²² Baei usonet mestoweguk tugul, ak keluul chamaniguk: ililan iman anyun ak itoptoben agobo yaitieng’ung’ tugul.

²³ Ee inye ne imenye Lebanon, ne iteeche kesweng’ung’ eng’ taragonik, iegu chi ne kirirjin mising’ ye kabwanjin ng’woninwek, ng’wanindo ne u ne bo kwondo ne machei kosigis!

²⁴ Ko u ye asobe, mwaei Jehovah, agot nganda ko waet ne bo ng’okset eng’ eunnyu ne bo tai Konia weritab Jeoiakim laitoriatab Juda, ang’usin ui tugul eng’ oloto;

²⁵ ak andein eunekab icheget che cheng’ei sobondang’ung’, ak eunekab ichek che iywei, eutab Nebukadresar laitoriatab Babulon, ak eutab Kaldeik.

²⁶ Ak atimden imande, koboto komet ne kisichin, obe emet age, ne kima kesikyinok; ak obekyi oloto.

²⁷ Ago maweekyingei emet ne machei sobonwekwak.

²⁸ Tos chichito Konia ne teret ne kisasei ne kigoyie? Tos inendet ko teret ne magiboiboitune? Amu nee anyun si ketimda icheget, inendet, ak iyotennyi, ak king’eetochi emet ne maingen?

²⁹ Ee emoni, emoni, emoni, kas ng’olyotab Jehovah.

³⁰ Mwaei Jehovah ko u ni kole, Osir chichi ole matinyei lakwa, chito ne maborei eng’ betusiekyik: amu maborei chi ne bo iyotennyi, ne tebe ng’echeretab laitornatet ne bo Daudi, ak koboi kogeny eng’ Juda.