JEREMIA 21 - BUKUIT NE TILIL

Kit ne kibiitune yiemet ne kiyiem bunik nganaset

¹ Kinyonji Jeremia ng’olyot ne kibunu Jehovah, ye kiiyoktoi inendet laitoriat Sedekia kwo oldab Pasur weritab Malkija, ak Sepania weritab Maaseia tisiindet, kolenji,

² Asomin ale, teebwech eng’ Jehovah; amu ibokyinech Nebukadresar laitoriatab Babulon: tamangab koyaiywech Jehovah ko u boisionikyik tugul che kikwong’e, si kobiit kwo koistoeneigei.

³ Kimwachi anyun Jeremia kolenji, Omwachi Sedekia ko u ni olenji:

⁴ Mwaei Jehovah, Kamuktaindetab Israel, ko u ni kole, Ogeero, aweektoi karikab luget che mitei eunekwok, che obarege ak laitoriatab Babulon, ak Kaldeik che yiemok, eng’ sang’utab irimoik, ak ayumji ichek kwenutab nganasani.

⁵ Ak kebarege ak okwek eng’ eut ne chuulat, eut ne kim, eng’ neregek, ak eng’ neregek che ng’wonen, ak eng’ neregek che eechen.

⁶ Ak abir bik che menyei nganasani, chi ak tiony: begu eng’ koroito ne o.

⁷ Ak ye ibata, mwaei Jehovah, asoru Sedekia laitoriatab Juda, ak otwogikyik, ak bik, bik che ng’etu eng’ nganasanito, asoru eng’ koroito, ak eng’ rotwetab chok, ak eng’ rubet, agoite koba eutab Nebukadresar laitoriatab Babulon, ak koba eunekab bunikwak, ak eunekab icheget che cheng’ei sobonwekwak: ak kobar ichek eng’ rotwetab chok; mabagaktoi, ama rire, ama riregei.

⁸ Ak ilenji bichu, Mwaei Jehovah ko u ni kole: Ogeero, kande taing’wong’ oretab sobondo ak oretab meet.

⁹ Inendet ne tebe nganasani, kebarei eng’ rotwetab chok ak eng’ rubet, ak eng’ koroito: ago sobei inendet ne mandoi, ak komut inendet Kaldeik che yiemok, ak koek sobennyi ne kiluulei.

¹⁰ Amu kaatokyi togennyu nganasani aipchi yaitiet, ma agobo mieindo, mwaei Jehovah; kindoi eutab laitoriatab Babulon si kobeel.

¹¹ Ak okwek gotab laitoriatab Juda, ogas ng’olyotab Jehovah.

¹² Ee gotab Daudi, mwaei Jehovah ko u ni kole, Oyai kiruoget karon, osoru ne kigiluul komong’ eng’ eutab usindet, si mamong’ neregekyuk che koromen ko u mat, ak kolal kot ko mami ne imuchi komis, amu yaitietab boisionikwok.

¹³ Keero, aborienen, ee inye ne imenye atebwet, ak ne menyei ruandet ne bo warenget, mwaei Jehovah; okwek che omwae ole, Ng’o ne chorugei kebarge? Anan ng’o ne nyonei ole kimenye?

¹⁴ Ak abirok ko u logoekab boisionikwok, mwaei Jehovah: ak anaam mat eng’ osnennyi, ak kobeel tugul che mitei komoswekyik.