JEREMIA 20 - BUKUIT NE TILIL

Koratat Jeremia eng’ ketik

¹ Kigas anyun Pasur weritab Imer tisiindet, ne ki bounindet ne o eng’ gotab Jehovah, komaoteni Jeremia agobo tuguchuto.

² Kibir anyun Pasur maotiot Jeremia, ak koratyi inendet ketik kelyekyik, eng’ ormarichet ne bo meto ne bo Benjamin, ne kimi gotab Jehovah.

³ Ak kiitiach Pasur Jeremia komong’ eng’ ketichato eng’ betut ne bo aeng’. Kilenji anyun Jeremia inendet, Ma kuure Jehovah kaineng’ung’ Pasur, ago kaguurenen Magor-misabib.

⁴ Amu mwaei Jehovah ko u ni kole, Keero, ayain iegu kamuiset ne imuege, ak ne imue choronoguk tugul: ak kobar ichek bunikwak eng’ rotwetab chok, ak igeer noto: ak agoite Juda tugul koba eutab laitoriatab Babulon, ak koluul ichek koba Babulon, ak kobare rotwetab chok.

⁵ Ak agoite kogeny magornatosiek tugul che bo nganasani, ak kelunaikyik tugul, ak tugukyik tugul che bo kamanutiet, ee konoraik tugul che bo laitorinikab Juda, koba eunekab bunikwak, che luulei tuguchoto, ak konam, ak koib koba Babulon.

⁶ Ak inye Pasur, keluulok koboto bik tugul che menyei gong’ung’; ak iit Babulon, ak imechi oloto, ak ketupchin oloto, inye ak choronoguk tugul, che kiimaotenji lembech.

Ko kagome mugulel maotiot

⁷ Ee Jehovah, kiiberbera, ak kiaberberage: i kim isiira, ak kiiterterisie: kaaegu ne kirorechin betut komugul, churochura age tugul.

⁸ Amu kotugul ye ang’alali, awaache; awaache ale, Koromnatet ak luulet: amu kagiyai ng’olyotab Jehovah koek chotisiet eng’ ane, ak aegu ne kirorechin eng’ betut komugul.

⁹ Ak ngot amwa ale, Mamwae kiy agobo inendet, anan ang’alal eng’ kainennyi, kobiit anyun eng’ muguleldanyu ko u mat ne lalei eng’ kowekyuk, ak ang’et eng’ muitaet, ak mamuchi asis.

¹⁰ Amu koagas katewerisietab che chang’, kamuiset eng’ komosta age tugul. Mwaei choronokyuk tugul che achame, che machei kotaama, kole, Omwaite, si kemwaite inendet; tamangab kigaigai, si kiterter inendet, ak kiyaaktochinege mugetut.

¹¹ Ago mi Jehovah kobota ko u inendet ne kim ak komuisei: kinachi anyun usikyuk, ama iterterisiei: ililandos kot, amu ma yai eng’ ng’omnatet, ak magoi kiutie tewernatenywa ne bo koigeny.

¹² Ago, ee Jehovah ne bo lugosiek, ne itieme chi ne bo iman, ne igeere kabwatutik ak muguleldo, kona ageer ye iyaakyini mugetut ichek; amu kiang’ang’un ng’olyondennyu.

¹³ Otienji Jehovah, olosu Jehovah: amu kigosor sobondab ne matinyei kiy eng’ eunekab yaikab yaitiet.

¹⁴ Ingochubok betut ne kigisigena: amat kiberur betut ne kisigena kamennyu.

¹⁵ Ingochubok chito ne kiipchin logoiywek che miach kwandanyu, kolenjin, Kagesigun werit; ne kiibaibai inendet kot.

¹⁶ Ak ingoigei chichoto nganasok che kigogabui Jehovah, ama sik: ak ingogas rirek karon, ak waagat bet kwen;

¹⁷ amu ma bara ami mo; si koek kamennyu kererinnyu, ak koeet moennyi kotugul.

¹⁸ Amu nee anyun si among’ eng’ mo, si ageer birtoetab ge ak arogenet, kot kogesgei betusiekyuk eng’ kalilanet?