JEREMIA 2 - BUKUIT NE TILIL

Mia tebi kogas it Jehovah

¹ Ak kinyonja ng’olyotab Jehovah, kolenja,

² Ui, ititenji Jerusalem, ilenji, Mwaei Jehovah ko u ni kole, Abwatin agobo mieindab ming’inateng’ung’, chamnyetab katunisieng’ung’; ko u ye kiisubwa eng’ ong’atet, eng’ emet ne kima kegolei.

³ Ki tilil Israel eng’ Jehovah, rurgutinikab iyotennyi: kiityin ng’ogisto tugul che amei inendet; nyonjin yaitiet ichek, mwaei Jehovah.

⁴ Ogas ng’olyotab Jehovah, ee gotab Jakobo, ak ortinwek tugul che bo gotab Israel:

⁵ Mwaei Jehovah ko u ni kole, Nee kit ne ma bo iman ne kinyorja kwanisiekwok, kot kolooitena, ak kosubot tangoita, ak kagoek buch?

⁶ Ama mwa ichek kole, Mi ano Jehovah ne kiimutwech kemong’u eng’ emetab Misri; ne kiindoiywech kebun ong’atet, kebun emet ne surkwen ak ne bo keringonik, kebun emetab kemeut ak ne bo uruetab meet, kebun emet ne mabunei chi, ole mamenyei chi?

⁷ Ak kiamutwak obwa emet ne chang’ amitwogik, si kobiit oam logoekyik ak mieindanyi; ago kingoit emonoto, ong’wanit emennyu, ak oyai borotennyu koek kit ne kiwechei.

⁸ Ma mwa tisiik kole, Mi ano Jehovah? Ama naa ichek che tinyei ng’atutik: kiingelelja kogeny bounik agichek, ak kimaotense maotik Baal, ak kobendate tuguk che maginyorune kelunet.

⁹ Ta aruokseiwok anyun, mwaei Jehovah, ak aruoksechini lagokab lagokwok.

¹⁰ Oba obun ngegusiek che bo Kitim, ak ogeer; ak oyokte bik koba Kedar, ak obwat komie; ak ogeer ngo kigobiit kiy ne u no.

¹¹ Tos kigowal bororiet kanamonikwak agot ngo ma cheptalelisiek? Ago kigowal bikyuk torornatenywa agobo kit ne magonu kelunet.

¹² Okwong’ie agobo nito, ee okwek kipsengwetisiek, ak oarogense mising’, oyaamnye kot, mwaei Jehovah.

¹³ Amu kigoyai bikyuk yaitwogik aeng’; kigometa ane ne a kondametutab beek che soptos, ak kobaljigei keringonik, keringonik che kigoundurogis, che maimuchi kotebe beek.

¹⁴ Tos otwogindet Israel? Tos otwogindet ne kigisikyi ga? Amu nee si keluul?

¹⁵ Kigoborisenji barnotikab ng’etunyik, ak komoror mising’; ak kigong’em emennyi koek karatia; kigebeel nganasokyik, ma komenyei chi.

¹⁶ Kigotui kogeny meting’ung’ barak lagokab Nop ak Tapanes.

¹⁷ Tos kima icheng’jige nito, amu kiimete Jehovah Kamuktaindeng’ung’, ye kiimutin eng’ oret?

¹⁸ Tos image nee anyun oret ne wendi Misri, iee beekab Sihor? Anan image nee oret ne wendi Asuria, iee beekab Ainet?

¹⁹ Itigonin yaitieng’ung’: ak kogerin kong’ mastaeng’ung’; nai anyun ile kit ne ya ak ko ng’wan, amu kiimete Jehovah Kamuktaindeng’ung’, ametinye kaiyweisiet ne iywea, mwaei Kiptaiyat, Jehovah ne bo lugosiek.

²⁰ Amu kiairi choging’ung’ eng’ betusiek che bo keny, ak ang’eti anoguk, ak kiimwa ile, Maotisiei, amu kiing’uruge eng’ tulwet age tugul ne koi ak eng’ ketit age tugul ne tuon, iyae kugoinatet.

²¹ Ago kiga aminin inye ketitab sabibuk ne kararan, keswot ne bo iman: kilya anyun si iwalage iegu ketit ne ya ne mangen?

²² Amu agot ngiunege munyat, ak iboisie sabunit ne o, ko toogu kora yaitieng’ung’ eng’ tainnyu, mwaei Kiptaiyat Jehovah.

²³ Imuktoi ano anyun ile, Ma a muruon, ma asub Baalik? Keer oreng’ung’ eng’ atebwet, nai kit ne kaiyai: i moitab tambesiet ne chepcheb ne isubi ortinwekyik;

²⁴ sigirietab timin ne ingen ong’atet, ne tabei koristo eng’ magennyi; ng’o ne imuchi koweekta eng’ ye mi, eng’ betusiekyik? Mang’etos ichek tugul che cheng’ei inendet; nyoru ichek inendet eng’ arawennyi.

²⁵ Amat kobetyi kweiyot keldang’ung’, anan koam melelda moktang’ung’: ago kiimwa ile, Matilei kiy kamang’unet: achicha; amu kiacham toek, ak asubi ichek.

²⁶ Ko u ye ililani chorindet ko kaginyor, ko u noto ililani gotab Israel; icheget koboto laitorinikwak, ak bounikwak, ak tisiikwak, ak maotikwak;

²⁷ che lenjin subenet, I baba; ak kolenji koita, Kiisicha: amu kigotuktocha batai, ama tokyagei: ago mwaei eng’ betutab nyalildanywa, kole, Ng’eet, soruech.

²⁸ Ago mi ano kanamonik che kiiyachige? Ingong’eetyo ichek, ngot komuchi kosorun eng’ betusiekab nyalildang’ung’: amu ko u ole te koitetab nganasoguk, ko u noto kanamoniguk, ee Juda.

²⁹ Amu nee si ogaigaa? Kiongelelja okwek tugul, mwaei Jehovah.

³⁰ Kiabir lagokwok buch; ma cham kotigonet: kigobar rotweng’ung’ bo chok maotikwok, ko u ng’etundo ne ng’emisiei.

³¹ Ee ibini, ogeer ng’olyotab Jehovah. Tos kiaegu emetab mesundeito ne o? Amu nee anyun si komwa bikyuk kole, Kigitiachech; ma kebwane kogeny ole imi?

³² Tos imuchi chepto koutie tugukyik che bo lelesta, anan koutie mureret ngoroikyik? Ago kigoutiena bikyuk eng’ betusiek che maiitoksei.

³³ Ichoptoi ano oreng’ung’ si icheng’ chamnyet! Kiinet anyun kwonyik che yaachen ortinweguk.

³⁴ Mitei kogeny ngoroiguk korotikab kibananok che matinyei tengek: ma anyorji ole kigobutok, ago kianyorji chuto tugul.

³⁵ Ago kiimwa ile, Matinye tengek; kigoistoenagei iman neregekyik. Keero, aruogun, amu imwae ile, Tom ayai tengek.

³⁶ Amu nee si iombenote iwal bandang’ung’? Ililani agobo Misri kogeny, ko u ye kiililan agobo Asuria.

³⁷ Imandoe inendet agine, inamoti meting’ung’: amu kigoesio Jehovah kamang’unosiekwok, ak mebore choto.