JEREMIA 18 - BUKUIT NE TILIL

Cheprereniot ak menet

¹ Kinyonji Jeremia ng’olyot ne kibunu Jehovah, kolenji,

² Ng’eet, chortege agoi gotab cheptereniot, si agonin igas ng’alekyuk eng’ oloto.

³ Achortege anyun gotab cheptereniot, ak ogeero, kiyaei boisiennyi eng’ cheptirok.

⁴ Ak kingong’emak teret ne kiga kiyae menet, eng’ eutab cheptereniot, koyae kogeny menonoto teret age, ko u ye kigeerei cheptereniondonoto kole mie.

⁵ Kinyonja anyun ng’olyotab Jehovah kolenja,

⁶ Ee gotab Israel, tos mamuchi ayaiywok ko u ye kayai chepterenindonito? Mwaei Jehovah. Ogeero, ko u ye mi menet eutab cheptereniot, omi ak okwek eunnyu, ee gotab Israel.

⁷ Eng’ betut ne amwae agobo boror age tugul, ak agobo bounatet age tugul, ale atut, ak abut ak ang’em;

⁸ ngot kosik eng’ yaitienywa bororionoto kaamwa, awale kabwatutukyuk eng’ yaitiet ne kitayachini ichek.

⁹ Ak eng’ betut ne amwae agobo boror age tugul, ak agobo bounatet age tugul, ale ateech ak amin bororionoto;

¹⁰ ngot koyai yaitiet eng’ tainnyu, ama kas it kutinnyu, awale anyun kabwatutikyuk eng’ mieindo ne kigamwa ale atorete ichek.

¹¹ Ara anyun, ui ng’alalji bikab Juda, ak bik che menyei Jerusalem, ilenji, Mwaei Jehovah ko u ni kole: Ogeero, achobe yaitiet agobo okwek ak achobe kit ne aitook: ingoweeigei age tugul eng’ okwek, kometo orennyi ne ya, ak olitit ortinwekwok ak boisionikwok.

¹² Ago mwaei kole, Matilei kiy kamang’unet: amu kibendote magutikyok, ak koyai chi tugul eng’ achek ko u uuindab muguleldanyi ne ya.

¹³ Mwaei anyun Jehovah ko u ni kole: Oteebate bororiosiek, olenji, ng’o ne kigogasei ng’alek che u chu; kiyai bergeiyatab Israel kit ne samis mising’.

¹⁴ Tos betei teluchi ne bo Lebanon eng’ ruandetab kewanin? Anan tos tendos beek che kaitit che rootune ole loo?

¹⁵ Amu kigoutiena bikyuk, kigobeelji nyamdutik tuguk che matilei kiy; ak kigonach ichek eng’ ortinwekwak, eng’ ortinwek che bo keny, si kobunot ortinwek che mi taban, eng’ oret ne ma kiyai;

¹⁶ si koyai emenywa koek kwong’et, ak koek ne kirenyei kotugul; kwong’e age tugul ne siirtoi eng’ yoto, ak kolelechi metinnyi.

¹⁷ Aseeri ichek eng’ taitab bunyot ko u ye iseerisiei usonetab kong’asis; ageere bataikwak, mageere togochikwak, eng’ betutab nyalildanywa.

¹⁸ Kimwa anyun kole, Obwa kechob kit ne kiitoi Jeremia; amu mabetei ng’atutiet eng’ tisiindet, ama betei kiruoget eng’ chito ne ng’om, ama betei ng’olyot eng’ maotiot. Obwa, kebire ng’elyepta, amat ongeepchi it agot ng’olyot agenge eng’ ng’alekyik.

¹⁹ Kasa, ee Jehovah, ak iepchi it rirekyuk.

²⁰ Tos kiyaaktoi yaitiet eng’ kit ne mie? Amu kogobalji keringet sobondanyu. Ibwat ole kiatononde eng’ taing’ung’ ak ang’alal che miach agobo ichek, si kobiit aisto neregeguk che koromen eng’ ichek.

²¹ Igoite anyun lagokwak, kobar rubet, ak igoite ichek kobar rotwetab chok; ak ingobetyi lagok osotikwak, ak koek mosogik; ak ingobar meet murenikwak, ak ingobar rotwetab chok neranikwak eng’ luget.

²² Ingogasak rirek eng’ gorikwak, ye ichee ichek imutyine luget: amu kigobal keringet kole konamena, ak kouny mestonok kole konam kelyekyuk.

²³ Ago, ingen inye Jehovah, kiruogenywa ne iruochi kole kobara; menyochi kaat tengektanywa, amebukte chalwoktanywa eng’ taing’ung’: ago ingeriich eng’ taing’ung’; yachi ko u noto eng’ betutab neregeguk.