JEREMIA 17 - BUKUIT NE TILIL

¹ Kigisire tengektab Juda kalamitab karnet koboto ng’atibindab koita ne uui: kigisirji mugulelwekwak ak eng’ kuinoikab kapkorosusiekwak;

² ko ta kobwati lagokwak kapkorosusiekwak ak Aserik che mi ole mi ketik che tuonen eng’ tulonok barak.

³ Ee tulwennyu ne mi kewanin, agoitoi keluul tuguguk ak konoraiguk tugul, ak komosweguk che tororen, amu tengekto, eng’ kiwotosieguk tugul.

⁴ Ak ibagaktoi aginye boroteng’ung’ ne kiagonin; ak agonin iot buniguk eng’ emet ne mengen: amu kiolaal mat eng’ neregekyuk, ne lalei koigeny.

⁵ Mwaei Jehovah ko u ni kole: Chubot chito ne imang’u chi, ak kotiiegei chi, inendet ne istoegei muguleldanyi Jehovah.

⁶ Amu igeitu sondit eng’ surkwen, ama keerei ye biitu mieindo; ago menyei komoswek che yaamnyotin eng’ ong’atet, emetab munyuk ole mamenyei chi.

⁷ Iberurot chito ne imang’u Jehovah, ak ko ne kamang’unennyi Jehovah.

⁸ Amu igeitu inendet ketit ne kigiminji ole negite beek, ak kowaktoi tigitikyik eng’ ole negite ainet, kamaiyweisiei ye biitu kiptoret, ago tuonitu sogekyik; ama toptobeni eng’ kenyitab kemeut, ama metoi koi logoek.

⁹ Kaberberindet muguleldo kosiir tuguk tugul, ak ko ya mising’: ng’o ne imuchi konai?

¹⁰ Ane Jehovah ne asiachi muguleldo, atieme kabwatutik, si agochi chi age tugul ko u ortinwekyik, ko u logoekab boisionikyik.

¹¹ Ko u taiywet ne iyumi arek che ma chechik, u noto ne nyoru magornatosiek, ama eng’ iman; betos kota kosobei inendet, ak koek inendet eng’ kagesunennyi, chito ne berber.

¹² Oldanyo ole tilil ng’echeretab laitornatet ne bo torornatet, ne kiginde ole toror, koboch taunet.

¹³ Ee Jehovah, inye ne i kamang’unetab Israel, ililandos ichek tugul che metoin; kisirei eng’ ng’ony ichek che istoenagei, amu kigometa Jehovah, kondametutab beek che soptos.

¹⁴ Isooba, ee Jehovah, si asob: sorua, si anyor sorunet: amu i kalosunennyu.

¹⁵ Keero, mwawa ichek kolenjina, Mi ano ng’olyotab Jehovah? Ingonyo nguno.

¹⁶ Ma achakte ane kot abagakte asubin aek mestowot; ama amach betutab rirek; ingen inye: kimi taing’ung’ kit ne kimong’une kutinnyu.

¹⁷ Amat imua: i ole amwechini eng’ betutab yaitiet.

¹⁸ Ingolilanso che usa, ago megona alilan; ingoarogenso ichek, ago megona aarogen: ipchi ichek betutab yaitiet, ak ing’eme ichek ng’emisiet konyil aeng’.

Ripsetab sabato

¹⁹ Kimwawa Jehovah ko u ni kole: Ui, itonone ormarichetab bik, ole mong’une laitorinikab Juda, ak komandoe, ak eng’ ormarichok tugul che bo Jerusalem;

²⁰ ak ilenji ichek, Ogas ng’olyotab Jehovah, okwek laitorinikab Juda, ak Juda komugul, ak bik tugul che menyei Jerusalem, che obendi orit obune ormarichochuto;

²¹ Mwaei Jehovah ko u ni kole: Oripge, amoib laut age tugul eng’ betutab sabato, anan oibu kobun ormarichokab Jerusalem;

²² anan oib lautik eng’ gorikwok eng’ betutab sabato, amoyai boisio age tugul: ago otaban betutab sabato, ko u ye kiang’at kwanisiekwok;

²³ ago ma kas, anan koeb it, ago kiiuuiit kaatwekwak, si magas, ak kotaach konetisiet.

²⁴ Ak ngot oepcha it eng’ kagiiletab ge, mwaei Jehovah, si moibu laut age tugul kobun ormarichokab nganasani eng’ betutab sabato, ago otaban betutab sabato, amoyai boisio age tugul eng’ betunoto;

²⁵ bwanei anyun orit laitorinik ak bounik che tebe ng’echeretab laitornatet ne bo Daudi, kobunu ormarichokab nganasani, kolong’onu karisiek ak mbartanyisiek, icheget ak bounikwak, bikab Juda, ak bik che menyei Jerusalem: ak kemeny nganasani agoi.

²⁶ Ak kobwa kobunu nganasokab Juda, ak komoswek che kiyiem Jerusalem, ak che bunu emetab Benjamin, ak emet ne soi, ak che bunu tulonok, ak che bunu Murot ne bo Tai, koibu kagochinoik che kibeelei, ak tiseiywek, ak kagochinoikab busiek, ak tuguk che nyamdut, ak koibu korosekab kongoi, kobwa gotab Jehovah.

²⁷ Ago ngot ko mogasa it otaban betutab sabato, amoib laut age tugul ak obe orit obun ormarichokab Jerusalem eng’ betutab sabato; alaal anyun mat eng’ ormarichokyik, si kobeel gorikab laitoriat che bo Jerusalem, ama kimisi.