JEREMIA 16 - BUKUIT NE TILIL

Nyalilwogik che bwanei ko biret agobo tongekto

¹ Kinyonja kogeny ng’olyotab Jehovah, kolenja,

² Metunisiei, amesiche werik anan tibik eng’ olito.

³ Amu mwaei Jehovah agobo werik ak tibik che kisikyin olito, ak agobo kametisiekwak che sichei ichek, ak agobo kwanisiekwak che kisich ichek eng’ emoni ko u ni kole:

⁴ Begu ichek eng’ meet ne ng’wan; magirirjin, ama kitubei; igeitu ng’atatek eng’ ng’ony: ak kibare rotwetab chok, ak rubet; ak koek muswekwak amitwogikab taritikab barak ak tiong’ikab ng’ony.

⁵ Amu mwaei Jehovah ko u ni kole, Amewe got ne kiririe, amewe ite, anan irirji ichek: amu kiaiste kalyennyu eng’ bichu, mwaei Jehovah, noto ko chamnyennyu ne tala ak rirenennyu ne bo chamnyet.

⁶ Bekyin emoni che eechen ak che mengechen: magitubei, ama iteetos bik agobo ichek, anan kotilgei, ama icheru metowekwak;

⁷ ama butuli bik makatinik agobo ichek amu rirek, si kogaigai ichek amu bik che kabek; ama igochin koee kikombetab kagaigaet agobo kwanisiekwak ak kametisiekwak.

⁸ Amewe gotab igorta, otebi ak ichek, oamisie ak oee.

⁹ Amu mwaei Jehovah ne bo lugosiek, Kamuktaindetab Israel, ko u ni kole: Ogeero, agochini kosis eng’ taing’wong’, ak eng’ betusiekwok, tugetab boiboiyet ak ne bo kagasetab ge, ne bo sandet ak ne bo mureret, eng’ olito.

¹⁰ Ak ye tun iborji bichu ng’alechuto tugul, ak kolenjin, Amu nee si komwa Jehovah yaitioni o agobo achek? Anan nee yaitiennyo? Anan nee tengektanyo ne kigeyachi Jehovah Kamuktaindennyo?

¹¹ Ilenji anyun ichek, Amu kigometa kwanisiekwok, mwaei Jehovah, ak kosubot kanamonik che ter, ak koot ak kolos, ak kometa, ama rib ng’atutikyuk;

¹² ak kioyai yaitiet kosiir kwanisiekwok; amu, ogeero, wendoti age tugul eng’ okwek kosubi uuindab muguleldanyi ne ya, kot ko ma oepcha it:

¹³ atimdook anyun omande eng’ emoni obe emet ne tom onai, okweget anan kwanisiekwok; ak oot cheptalelisiek che ter eng’ oloto bet ak kemoi; amu marirenok.

¹⁴ Noto anyun, ogeero, bwanei betusiek, mwaei Jehovah, ne ma kemwaei kogeny kele, Ko u ye sobei Jehovah, ne kiimut lagokab Israel komong’une emetab Misri;

¹⁵ ago, kilen, Ko u ye sobei Jehovah, ne kiimut lagokab Israel eng’ emetab murot ne bo katam, ak eng’ emotinwek tugul che kiga koonji ichek: ak amutu ichek kogeny kobwa emenywa ne kiagochi kwanisiekwak.

¹⁶ Ogeero, ayoktoi keguur ramik che chang’ che bo njirenik, mwaei Jehovah, si kobiit koram ichek; ak ye ibata ayokte keguur kiplogotinik che chang’, si kobiit kocheng’at ichek eng’ tulwet age tugul, ak eng’ tulwet age tugul ne ming’in, ak eng’ kebenonik.

¹⁷ Amu ageere emotinwekwak tugul: ma ung’otin eng’ tainnyu, ama ung’at tengektanywa si mageer.

¹⁸ Ak ayaaktochini korok yaitienywa ak tengektanywa konyil aeng’; amu kigong’wanit ichek emennyu eng’ muswekab tugukwak che samis, ak kigonyiit borotennyu tugukwak che kiwechei.

¹⁹ Ee Jehovah, kimnatennyu, ak ko irimennyu, ak ole amwechini eng’ betutab nyalildanyu, bwanjinin bororiosiek kobunu tabanwek che bo ng’ony, ak komwa kole, Ma nam kiy kwanisiekyok kobate lembechek, tangoita ak tuguk che matinyei kelunet.

²⁰ Tos yachingei chito kanamonik, che ma cheptalelisiek?

²¹ Noto anyun, ogeero, agochini konai, agochini konai eunnyu ak kamugennyu, konyil nito agenge; ak konai ichek kole kainennyu ko Jehovah.