JEREMIA 15 - BUKUIT NE TILIL

¹ Kolenja anyun Jehovah, Agot nda kiga tononso Musa ak Samuel eng’ tainnyu, ko matokyingei kabwatutikyuk bichu; timde eng’ tainnyu, koba.

² Ak ye tun teebenen kolenjin, Kibendi ano? Imwachi anyun ilenji, Mwaei Jehovah ko u ni kole, Che bo meet, kobendi meet; ak che bo rotwetab chok, kobendi rotwetab chok, ak che bo rubet, kobendi rubet, ak che bo luulet, kobendi luulet.

³ Ak ang’atyini ichek tuguk ang’wan, mwaei Jehovah: rotwetab chok ne barisiei, ak sesenik che isongiririsiei, ak taritikab barak ak tiong’ikab ng’ony, si koamis ak kong’emis.

⁴ Ak agoite ichek kewirji komosi ak komosi eng’ bounatosiek tugul che bo ng’ony, amu kit ne kiyai Manase weritab Hesekia laitoriatab Juda eng’ Jerusalem.

⁵ Amu ng’o ne tos rirenen, ee Jerusalem? Anan ng’o ne rirjinin? Anan ng’o ne mosu koteebenen agobo chametab ge?

⁶ Kiiesia, mwaei Jehovah, kiichuchuige: kiachuul anyun eunnyu atokyin, ak ang’emin; kaang’et eng’ muitaet.

⁷ Ak kiarur ichek eng’ kit ne kirurse eng’ ormarichokab emet; kiagochi kobegune lagok, kiang’em bikyuk; tomo koweek eng’ ortinwekwak.

⁸ Kigotesok mosogikwak eng’ ane kosiir ng’aniekab nyanjosiek: kiamutyi ichek luulindet betkwen kobar kametab murenik: kiagochi koche inendet tiritindo ak kamuisosiek.

⁹ Nyaluli inendet ne kigosich lagok tisab; meei; kagororokto asistanyi kota ko bet; kigolilan ak kotoptoben: ak agoite che ng’etu eng’ ichek kobar rotwetab chok eng’ taitab bunikwak, mwaei Jehovah.

Ng’wanindo ak torornatet ne biitune boisietab maoinatet

¹⁰ Bwa eng’ ane, ee kamennyu, amu kiisicha aek chi ne bo boriet ak ne ibeligei ak ng’ony komugul! Tom abesende si anyor keljinet ne siirei, ak kotomo kobesendawa bik, si konyor keljinet ne siirei; ago chuba age tugul eng’ ichek.

¹¹ Kimwa Jehovah kole, Agimitin iman agobo kit ne mie; iman agochini bunyot kogaigain eng’ betutab yaitiet ak eng’ betutab usisiet.

¹² Tos imuchi chi koiri karnet, karnet ak sugunwet ne bunu murot ne bo katam?

¹³ Agoitoi tuguguk ak konoraiguk keluul ko ma eng’ alyet, amu tengekwogiguk tugul eng’ kiwotosieguk tugul.

¹⁴ Ak agochi koba koboto buniguk emet ne mengen: amu kagolal mat eng’ neregekyuk, ne lalenen.

¹⁵ Ee Jehovah, ingen inye: ibwata, ak irutocha, ak iyaaktawa mugetut eng’ usikyuk; ameistoena muitaeng’ung’: nai ile kianyoru chotisiet amu inye.

¹⁶ Kibiit ng’aleguk, ak kiaam; ak kiek ng’aleguk eng’ ane boiboiyet ak kagasetab ge ne bo muguleldanyu: amu kimwaitoena kaineng’ung’, ee Jehovah Kamuktaindet ne bo lugosiek.

¹⁷ Ma kitebi ak tuiyetab ichek che urerendos, anan abaibaitu: kiatebi anege amu eung’ung’; amu kiinyiita neregek.

¹⁸ Amu nee si kobunji agoi ng’wanindanyu, ama inyaoksei moennyu ne magimuchi kinya? Tos iegu eng’ ane iman kererut ne iberberisiei, ko u beek che tendos?

¹⁹ Mwaei anyun Jehovah ko u ni kole, Ngot iweege, amutun kogeny, si kobiit itonon eng’ tainnyu; ak ngot inemu kit ne mie komong’ eng’ kit ne ya, iigeitu kutinnyu: weekyiningei ichek, ago meweekyinigei ichek.

²⁰ Ak ayain eng’ bichu iegu irimet ne ng’otat ne bo sugunwet; ak obarge ak ichek ago maiterterin; amu ami koboten si asorun ak atiachin, mwaei Jehovah.

²¹ Ak asorun eng’ eutab kiptengeginik, ak atiachin eng’ eutab che imuisei.