JEREMIA 14 - BUKUIT NE TILIL

Kemeut ne kibiit eng’ Juda ak saetab Jeremia

¹ Kinyonji Jeremia ng’olyotab Jehovah agobo iljet.

² Rirei Juda, ak nyaluldos ormarichokyik, tebyei ng’ony bikyik koteitos; ak kotogosta rirekab Jerusalem.

³ Ak koyokto bikwak che toogunotin bik che mengechen koba ole mi beek: bendi agoi keringonik, ama nyoru beek: weeksei buch ak terenikwak: ililandos ak kotoptobenso, ak kotuch metowekwak.

⁴ Amu emet ne kigobetak, amu kima kota komi ropta emet, ililandos che ibatisiei, tuchei metowekwak.

⁵ Ee, yiei kenyelet agine eng’ kewanin, ak kobagakta aruennyi, amu mami suswek.

⁶ Ak kotononso agichek sigirokab timin eng’ tulonok che churiotin, isiendos ko u lelwek; imenitu konyekwak, amu ma komi kiy ne tuon.

⁷ Agot ngo baorianjinech tengekwogikyok, ee Jehovah, boisie amu kaineng’ung’: amu chang’ kachuchugosiekyok bo ge; kigeyaun tengekto.

⁸ Ee inye kamang’unetab Israel, yetindennyi eng’ betutab nyalilda, amu nee si iige toondet eng’ emet, ak iige kiprutoiyot ne mastoi koruei kemout agenge?

⁹ Amu nee si iige chi ne kakwong’, iige chito ne kim, ne maimuch kosorunis? Ago inye, ee Jehovah, imi kwenunnyo, ak kimwaitaenech kaineng’ung’; amemetech.

¹⁰ Mwachin Jehovah bichu ko u ni kole, Kicham ko u noto koombenso; tom koisto kelyekwak: mataachei anyun Jehovah ichek amu noto; ibwati inendet tengektanywa, ak koityin biret amu tengekwogikwak.

¹¹ Ak kimwawa Jehovah kolenja, Amat isa isomji bichu mieindo.

¹² Ye irugutgei ichek, ko magase rirekwak; ak ye igoito kagochinet ne kibeelei, koboto kagochinetab busiek, ko mataache: ago agesu ichek eng’ rotwetab chok, ak rubet, ak koroito.

¹³ Kiamwa anyun ale, Bwa, Kiptaiyat Jehovah! Keero, mwachin maotik ichek, kolenji, Maityinok rotwetab chok, amonyoru rubet; ago agonok kalyet ne bo iman eng’ olito.

¹⁴ Kilenja anyun Jehovah, Maoteni maotik lembechek eng’ kainennyu: ma ayokte ichek, ama ang’at ichek, anan ang’alalji: maotenwok ng’ang’utiet ne bo lembech, koboto ng’orset, ak kit ne bo buch, ak kaberberisietab mugulelwekwak.

¹⁵ Mwaei Jehovah anyun ko u ni agobo maotik che maoteni eng’ kainennyu, che ma ayokte, ago mwaei ichek kole, Mabiitu rotwetab chok anan rubet eng’ emoni, kole, Kigesu maotichoto eng’ rotwetab chok ak rubet.

¹⁶ Ak kewirji ortinwek che bo Jerusalem bik che kimaotenjin, amu rubet ak rotwetab chok; ama biitu chi ne tubei ichek, icheget ak osotikwak, ak werikwak ak tibikwak: amu arong’jini icheget yaitienywa.

¹⁷ Ak imwachi ichek ng’olyondoni ilenji, Ingoba beekyuk bo kong’ kemoi ak bet, ama sisei; amu kail cheptab bikyuk, ne bergeiyat, eng’ ilet ne o, kaguotenet ne ng’wan mising’.

¹⁸ Ngot ale awa mbar, ogeero, che kigebare rotwetab chok! Ak ngot ale awa nganaset, ogeero, mitei che nyaluldos amu rubet! Amu bendoti eng’ emet maotik ak tisiik ama tinyei naet.

¹⁹ Tos kiiesie Juda iman? Tos kigowech sobondang’ung’ Sion? Amu nee si ibirech, ama mi kasoobet eng’ achek? Kigigen kalyet, ago ma nyo kiy ne mie; kigigen betutab kasoobet, ak keero, kibiit arogenet!

²⁰ Ee Jehovah, king’anye tengektanyo, ak yaitietab kwanisiekyok: amu kigeyaun tengekto.

²¹ Amat iwechech, amu kaineng’ung’; ametewer ng’echeretab laitornatet ne bo torornateng’ung’: ibwat, amat ibut kayomiset ne kigaiyomiswech.

²² Tos mi age tugul eng’ tuguk che bo buch, che bo bororiosiek, ne imuchi kogon ropta? Anan imuch kipsengwetisiek kogon ropta ne inesi? Tos ma inyendet Jehovah Kamuktaindennyo? Kigenin anyun; amu kiiayi tuguchuto tugul.