JEREMIA 13 - BUKUIT NE TILIL

Kalewenet agobo birenetab katanit

¹ Kimwawa Jehovah ko u ni kole, Ui, ak ialjige birenetab katanit, ak iratege, amat inde beek.

² Kiaal anyun birenet ko u ng’olyotab Jehovah, ak aratege.

³ Ak kinyonja ng’olyotab Jehovah ne bo aeng’, kolenja,

⁴ Nam birenet ne kaial ne keratege, ak ing’eet iwe Euprate, ak iuny eng’ yoto eng’ keringet ne mi ruandet.

⁵ Kiawe anyun, ak auny eng’ ole negite Euprate, ko u ye king’ata Jehovah.

⁶ Ak kingobata betusiek che chang’, komwawa Jehovah kolenja, Ng’eet, ui Euprate, ak inemu birenet eng’ yoto, ne kigang’atin iuny eng’ yoto.

⁷ Kiawe anyun Euprate, ak abal, ak anemu birenet eng’ ole kigaung’e: ak ogeero, kiga kong’emak birenoto, kima kota kotilei kiy.

⁸ Yeityo konyonja ng’olyotab Jehovah kole,

⁹ Mwaei Jehovah ko u ni kole, Ang’eme menotetab Juda ko u ni, koboto menotet ne o ne bo Jerusalem.

¹⁰ Igeitu birenoni ma kotilei kiy, bichu yaachen, che esioi kogas ng’alekyuk, che bendote uuindab mugulelwekwak, ak kosuboti kanamonik che ter, si koot ichek, ak kolos.

¹¹ Amu ko u ye namegei birenet ak suetab chi, ko u noto anyun kaagochi got komugul ne bo Israel ak got komugul ne bo Juda kenamge, mwaei Jehovah, si kobiit koek eng’ ane bororiet, ak kainet, ak kalosunet, ak teegisto: ago ma cham kogas.

¹² Mwachi anyun ichek ng’olyondoni, ilenji, Mwaei Jehovah Kamuktaindetab Israel ko u ni kole, Kinyiiti divaik teret age tugul. Ak komwaun kole, Tos magingen kele kinyiiti divaik teret age tugul?

¹³ Ilenji anyun ichek, Mwaei Jehovah ko u ni kole, Ogeero, anyiiti bogitet bik tugul che menyei emoni, laitorinik che tebe ng’echeretab laitornatet ne bo Daudi, ak tisiik, ak maotik, ak bik tugul che menyei Jerusalem.

¹⁴ Ak atue chito age age, kwanisiek ak werik, mwaei Jehovah: marire, anan abagakte, anan korira mo, kot ko magesu ichek.

Kotigonet ne bo buch eng’ Juda

¹⁵ Ogas anyun, oeb it; amomenie: amu kagomwa Jehovah.

¹⁶ Ogonyit Jehovah Kamuktaindeng’wong’, kotom koib mesundeito konyo, kotom kinach kelyekwok eng’ tulonokab mesundieto; ak ye ocheng’e lapkeiyet, kowal koek uruetab meet, ak koyai koek mesundeito ne o.

¹⁷ Ago ngot ko mogas ng’olyondonito, korirei sobondanyu eng’ ung’ot agobo menoteng’wong’; ak arir mising’, kot koba beekab kong’, amu kageluul kechirekab Jehovah.

¹⁸ Mwachi laitoriat ak kametab laitoriat, ilenji, Oming’inge, otebe ng’ony: kigobutyo chepkuloikwok, choto ko narietab torornateng’wong’.

¹⁹ Kigeger nganasok che bo Murot ne bo Tai, ama mi chi ne yatei: kigimut Juda tugul koek luulenik; kigimut tugul koek luulenik.

²⁰ Oyot met, ak ogeer ichek che bunu murot ne bo katam: mi ano kechirek che kigigonin, kechireguk che kororon?

²¹ Imwae nee ye tun inde inendet choronoguk koboun, amu inye ne kiinet koboun? Tos manamin ng’woninwek, ko u kwondo ne machei kosigis?

²² Ak ngot imwa eng’ muguleldang’ung’ ile, Amu nee anyun si kobwanja tuguchuto? Kageng’any ngoroiguk amu oindab tengektang’ung’, ak kagonyor kwariniguk ng’wanindo.

²³ Tos imuchi kowal Etiopindet iririondennyi, anan kowal cheblanget simormorindanyi? Ngo u noto, omuchi ak okwek oyai ne mie, che kionaite oyae yaitiet.

²⁴ Ayestoi anyun ichek, ko u mobek che ibei usonetab ong’atet.

²⁵ Kebebertang’ung’ nito, kebeberta ne bunwa ne kigigerun, mwaei Jehovah; amu kiiutiena, ak imang’u lembechek.

²⁶ Ang’anye anyun agane ngoroiguk kot koit metit, ak kotook tewernateng’ung’.

²⁷ Kiageer tuguguk che kiwechei, ibetab ge neng’ung’, ak kateeng’ung’ ne bo maget, tengektab kugoinateng’ung’, eng’ tulonok che mi kewanin. Bwa eng’ inye, ee Jerusalem! Memache itililitu; yaoksei nito kot kotianit?