JEREMIA 12 - BUKUIT NE TILIL

Kaiimutik che biitu ye kanyor kaberuret kiptengeginik

¹ I bo iman, ee Jehovah, ye arirjinin: ago ta amache ang’alal koboten agobo ng’olyondonito: amu nee anyun si kiberur oretab kiptengeginik? Amu nee si komuunyi ichek tugul che yaei kaberberisiet?

² Kiimin ichek, ee, kigonam ng’ony tigitik; eegitu, ee, itos logoek: i negite kutuswekwak, ago i loo eng’ mugulelwekwak.

³ Ago ingena, ee Jehovah; igeera, itieme muguleldanyu kotokyingei: ichuutu kobwa ko u kechirek che kienyei, ak itabanji betutab eng’set.

⁴ Iteei emet kot kotianit, ak korestos sogekab emet komugul? Amu sogornatetab bik che menyei oloto, kigiges anyun, kigobek tiong’ik, ak taritik; amu kile ichek, Mageerei inendet kagesunennyo.

⁵ Ngot ko kioruai ak bik che bunei kelyek, ak kigogonin ing’et, imuktoi ano anyun obarge ak mbartanyisiek? Agot ngot itebye eng’ chametab ge eng’ emetab kalyet, iyae nee anyun ye kanyi beek Jordan mising’?

⁶ Kigoyaun kaberberisiet tupchosieguk, ak gotab kwandang’ung’; kigorirjin mising’: ameyan ichek, agot nda mwaun ng’alek che kororon.

Ng’emisiet ne kinyonji Juda koibu bororiosiek

⁷ Kiabagakte gonnyu, kiamete borotennyu; kiagochi chamanetab sobondanyu kwo eunekab bunikyik.

⁸ Kigoigei borotennyu eng’ ane, ng’etundo ne mitei osnet: kigowaagena; kiawech anyun amu noto.

⁹ Tos kaigei borotennyu eng’ ane taritiet ne lege, ne barisiei? Tos kayiem inendet taritik che barisiei? Oba, oyum tiong’ik tugul che bo timin, ogetu kobwa koamis.

¹⁰ Kigong’em mbarennyu ne bo sabibuk mestowek che chang’, kigotiegat kebebertanyu, kigoyai kebebertanyu ne kararan koek ong’atet ne mami kiy.

¹¹ Kigoyai koek karatia; rirjina, amu karatia; kigeyai emet komugul koek karatia, amu mami chi ne ibwati emonoto.

¹² Katogosta bik che luulsei koba tulonok tugul che churiotin eng’ ong’atet: amu barisiei rotwetab chok ne bo Jehovah koboch tabanda age ne bo emet, agoi tabanda age: mami chi ne tinyei kalyet.

¹³ Kigol nganok, ago kiges katok; kibirtogei ama kelji kiy: ak olilandosi amu logoekwok, amu neregek che ng’wonen che bo Jehovah.

Betusiek che bwanei che bo bororiosiechoto

¹⁴ Mwaei Jehovah ng’alechoto agobo bik tugul che yaach che bo kokwennyu, che twaei borotet ne kiagochi bikyuk Israel konam kobunji, ko u ni kole: Ogeero, atutu ichek eng’ emenywa, ak atutu gotab Juda komong’ eng’ kwenunywa.

¹⁵ Ak ye kaatut ichek, aweechige ak arire ichek; ak amutu kogeny, konyo age tugul borotennyi, ak konyo age tugul emennyi.

¹⁶ Ak ngot konetgei kogiiljigei oretab bikyuk, ak koyosio eng’ kainennyu kole, Ko u ye sobei Jehovah; ko u ye kiinet bikyuk koyosio eng’ Baal; koteech anyun ichek eng’ kwenutab bikyuk.

¹⁷ Ago ngot ko macham kogas, atutu anyun bororionoto, atutu ak ang’em, mwaei Jehovah.