JEREMIA 11 - BUKUIT NE TILIL

Biret ne biitu ma rib chi arorutiet

¹ Kinyonji ng’olyotab Jehovah Jeremia kolenji,

² Ogas ng’alekab kayomisoni, ak ong’alalji bikab Juda, ak bik che menyei Jerusalem;

³ ak imwachi ichek ilenji, Mwaei Jehovah, Kamuktaindetab Israel, ko u ni kole, Chubot chito ne magasei ng’alekab kayomisoni,

⁴ ne kiang’at kwanisiekwok eng’ betut ne kiamutu ichek komong’ eng’ emetab Misri, komong’une matab karnet, alenji, Ogas it kutinnyu, ak oyai choto, ko u tugul che ang’atok: si oegu bikyuk anyun, ak aegu Kamuktaindeng’wong’;

⁵ si kobiit agimit kayosiet ne kiayosiechi kwanisiekwok, ale agochini ichek emet ne nyiitat chego ak kumik, ko u rani. Awolu anyun, ale, Amen, ee Jehovah.

⁶ Ak kilenja anyun Jehovah, Mwaite ng’alechuto tugul eng’ nganasokab Juda, ak eng’ ortinwekab Jerusalem, ilenji, Ogas ng’alekab arorutioni, ak oyai.

⁷ Amu kiabaorianji kwanisiekwok eng’ kagiiletab ge, koboch betut ne kiamutu ichek komong’ eng’ emetab Misri, agoi ra, ang’eete karon ak abaorianjini, alenjini, Ogas it kutinnyu.

⁸ Ago ma kas it, ama eb it, ago kiwendot age tugul eng’ uuindab muguleldanyi ne ya: aipchini anyun ichek ng’alek tugul che bo kayomisoni, ne kigang’at ichek koyai, ago ma yai.

⁹ Ak kilenja Jehovah, Mitei chaamset kwenutab bikab Juda, ak eng’ bik che menyei Jerusalem.

¹⁰ Kigoweekyigei tengekwogikab kwanisiekwak, che kiesio kogas ng’alekyuk; ak kiisub kanamonik koot: kigobut kayomisennyu gotab Israel ak gotab Juda ne kigayai koboto kwanisiekwak.

¹¹ Mwaei anyun Jehovah ko u ni kole, Ogeero, aipchini ichek yaitiet, ne maimuchi kochilile; ak korirja, ago magasyini ichek.

¹² Yeityo koba nganasokab Juda ak bik che menyei Jerusalem, koba korirji kanamonik che igochin nyamdutik; ago masoru ichek agot kitigin eng’ betutab nyalildanywa.

¹³ Amu ko u ole te koitetab nganasoguk, ko u noto kanamoniguk, ee Juda; ak ko u ole te koitetab ortinwekab Jerusalem, ko u noto kiolumde kapkorosusiekab kit ne kililane, kapkorosusiek che kibeeljine Baal nyamdutik.

¹⁴ Amesa anyun agobo bichu, amerir anan isa agobo ichek: amu magase ichek eng’ betut ne rirjina amu nyalildanywa.

¹⁵ Yaei nee chamanennyu eng’ gonnyu, amu kigoyai tengekwogik koboto bik che chang’, ak kigoistoenengei banyek che itabanotin? Ye iyae tengek ibaibaitu.

¹⁶ Kiguure Jehovah kaineng’ung’, Emdit ne tuon, ne kararan ak kotinyei logoek che miach: kiilaal mat eng’ yoto eng’ bolatetab wasetab ge ne o, ak kagoilyo temenikyik.

¹⁷ Amu kagomwa Jehovah ne bo lugosiek, ne kiminin, yaitiet agobo inye, amu yaitietab gotab Israel ak ne bo gotab Juda, che kigoyachigei kotacha anerech amu kiigochi Baal nyamdutik.

Chaamset eng’ Anatoi kole kobar maotiot

¹⁸ Ak kigona Jehovah naet agobo kioto, ak kianai: yeityo iborua boisionikwak.

¹⁹ Ago kia u aruetab kechir ne tala, ne kikweriei kwo ole kieng’e; ak kima anai ale kigochob ichek chobutik che yaachen agobo ane, kole, Ongeng’em ketit koboto logoekyik, ak ongeiste inendet eng’ emetab che soptos, si mata kibwat kainennyi kogeny.

²⁰ Ago, kona ageer yaaktaeng’ung’ bo mugetut eng’ ichek, ee Jehovah ne bo lugosiek, ne iruochi eng’ imanda, ne itieme kabwatutik ak muguleldo; amu kaang’ang’un ng’olyondennyu.

²¹ Mwaei anyun Jehovah agobo bikab Anatot, che cheng’ei sobondang’ung’, kole, Amat imaoten eng’ kainetab Jehovah, si magibarin achek;

²² mwaei anyun Jehovah ne bo lugosiek ko u ni kole, Ogeero, abire ichek: begu neranik eng’ rotwetab chok; barei rubet werikwak ak tibikwak;

²³ ama biitu che ng’etu eng’ ichek: amu aipchini yaitiet bikab Anatot, eng’ kenyit ne agikyini ichek abire.