JEREMIA 10 - BUKUIT NE TILIL

Berberindab saetab kanamonik

¹ Ogas ng’olyot ne mwawok Jehovah, ee gotab Israel:

² Mwaei Jehovah ko u ni kole, Amat onetge ortinwekab bororiosiek, amoarogense agobo kaborunoikab kipsengwet; amu arogendos bororiosiek, agobo choto.

³ Amu tangoita bitonwekab bik: amu ebei age ketit eng’ osnet, boisietab eunekab musogindet, ne boisie aiywet.

⁴ Lelesonjine feda ak tahabu; igiige kipchumarisiek eng’ kiriswet, si matwagei.

⁵ U ichek tiret ne kigiwechwech keyaei, ago mang’alaldos: kanyol keibot, amu maimuchi kobendat. Amoiywei ichek; amu maimuchi koyai kiy ne ya, amaimuchi koyai kiy ne mie.

⁶ Mami ne ogerge, ee Jehovah; i o, ak ko o kaineng’ung’ eng’ kamuktaet.

⁷ Ng’o ne maiywein, ee Laitoriatab bororiosiek? Amu nyoljinin nito: amu mami ne u inye eng’ bik tugul che ng’omen che bo bororiosiek, ak eng’ bounatosiekwak tugul.

⁸ Ago u ichek tugul tiong’ik, ak ko abusotin: konetisiet ne kineti kanamonik ko u ye kineti ketik kityo.

⁹ Mitei feda che kigitany kolebelitu che kigiibune Tarsis, ak tahabu che bunu Upas, boisietab musogindet ak bo kitang’indetab tahabu; tuuen ngoroikwak ne nyalil, ak ko arusen ne birir; boisietab bik che ng’omen choto tugul.

¹⁰ Ago Jehovah ko Kamuktaindet ne bo iman; inendet ko Kamuktaindet ne sobei, ak ko laitoriat ne bo koigeny: botani ng’ony amu neregekyik: amaimuchi komuita bororiosiek eng’ neregekyik.

¹¹ Mwachi anyun ichek ko u ni ilenji, Betos eng’ ng’ony ak eng’ kureretab kipsengwetisiek cheptalelisiek che kima koyaei kipsengwetisiek ak ng’ony.

¹² Kiyai ng’ony eng’ kamuktaennyi, kiigimit ng’onyuni eng’ ng’omnatennyi, ak kiito kipsengwetisiek eng’ naennyi.

¹³ Ye twek, kobiit wasetab ge ne bo beek eng’ kipsengwetisiek, ak kogochi kibungweret kotogosta eng’ tabanwekab ng’ony; yachin ropta kalyelosiek, imoong’u usonet eng’ ole kigigonore.

¹⁴ Kergeitu chito age tugul ak tiondo ama tinyei naet; ililani kitang’indet age tugul ne bo tahabu eng’ kanamwennyi ne kigiwai: amu lembeita kanamwennyi ne kigitany, ama tinyei kabuset.

¹⁵ Buch choto, boisietab ng’alset: betos eng’ betut ne ityin birenywa.

¹⁶ Ma u chuto kebebertab Jakobo; amu bo tai inendet eng’ tuguk tugul; ak Israel ko bororietab borotennyi: kainennyi ko Jehovah ne bo lugosiek.

Kobendi bik luulet

¹⁷ Iyum eng’ emet tuguguk che bo mung’aret, ee inye ne imenye irimet.

¹⁸ Amu mwaei Jehovah ko u ni kole, Ogeero, awirtoi bikab emoni betuni, ak anyalil ichek, si kobiit kogas.

¹⁹ Bwa eng’ ane, amu ng’wanindanyu! Ng’wan kaguotenennyu: ago kiamwa ale, Arogenennyu iman nito, ak kanyol amuita.

²⁰ Kigeng’em emainnyu, ak kigeng’eti boroonikyuk tugul: kigoba lagokyuk kometa, ama komi: ma komi chi ne teekwa emainnyu kogeny, ak konde angokyuk.

²¹ Amu kigoigei mestowek tiong’ik, amata koteepse Jehovah: mata konyor anyun kaberuret, ak kagiyesta kechirekwak tugul.

²² Ogeero, kigasei ng’alek kobwanei, ak kirgirenet ne o komong’une emetab murot ne bo katam, si kobiit koyai nganasokab Juda koek karatia, ole menyei lelwek.

²³ Ee Jehovah, angen ale, ma bo chito ortinwekyik; amaindochin chito ne wendoti, kabwatutikyik.

²⁴ Ee Jehovah, itigona, ago eng’ kiruoget; ma eng’ neregeguk, si meyaa aek buch.

²⁵ Rong’ji neregeguk che ng’wonen bororiosiek che maingenin, ak ortinwek che maguurei kaineng’ung’; amu kigoam Jakobo, ee, kigoam inendet ak koges, ak kigong’em meng’otenywa.