JEREMIA 1 - BUKUIT NE TILIL

Kainet

¹ Chu ng’alekab Jeremia weritab Hilkia, ne ki bo tisiik che kimi Anatot eng’ emetab Benjamin:

² ne kinyonji ng’olyotab Jehovah eng’ betusiekab Josia weritab Amon, laitoriatab Juda, eng’ kenyitab taman ak somok ne bo laitornatennyi.

³ Kinyo kogeny eng’ betusiekab Jeoiakim weritab Josia, laitoriatab Juda, agoi kogesgei kenyitab taman ak agenge ne bo Sedekia weritab Josia, laitoriatab Juda; agoi keluul Jerusalem kimut eng’ arawetab mut.

Keguurei maotiot

⁴ Kinyonja anyun ng’olyotab Jehovah kolenja,

⁵ Kiangenin ye kitom amimiin eng’ moet, ak kiatabanin kotom kesichin; kiandein iegu maotiot eng’ bororiosiek.

⁶ Amwa anyun ale, He, Kiptaiyat Jehovah! Keero, mamuchi ang’alal; amu a lakwa.

⁷ Ago kilenja Jehovah, Amele, A lakwa: amu iwendi oldab bik alak tugul che ayoktochinin, ak imwae kit age tugul ne ang’atin.

⁸ Ameiywei ichek: amu ami koboten, asorun, mwaei Jehovah.

⁹ Koiito anyun Jehovah eunnyi, ak kotwa kutinnyu; ak kolenja Jehovah, Keero, kande ng’alekyuk kuting’ung’:

¹⁰ keero, kandein rani ibou bororiosiek ak bounatosiek, itutu ak ibut, ak ing’em ak igabui; iteech, ak imin.

Ng’ang’tik aeng’che bo kiruoget

¹¹ Kinyonja kogeny ng’olyotab Jehovah, kolenja, Jeremia, igeere nee? Ak kiale, Ageere temet ne bo ketit ne kiguure almond.

¹² Yeityo kolenja Jehovah, Kegeer komie: amu aribe ng’olyondennyu si ayai kosulda.

¹³ Ak kinyonja kogeny ng’olyotab Jehovah ne bo aeng’, kolenja, Igeere nee? Kiale, Ageere teret ne wasegei; ak tokyingei teronoto murot ne bo katam.

¹⁴ Yeityo kolenja Jehovah, Mong’une yaitiet murot ne bo katam, konyonjin bik tugul che bo emet.

¹⁵ Keero, aguure ortinwek tugul che bo bounatosiekab murot ne bo katam, mwaei Jehovah; ak kobwa, ak konde age tugul ng’echerennyi ne bo laitornatet ye kimandoe eng’ ormarichokab Jerusalem, ak kotokyigei irimoikyik tugul, ak kotokyigei nganasok tugul che bo Juda.

¹⁶ Ak amwa kiruogutikyuk agirindae yaitienywa tugul; amu kigometa, ak kigobeelji nyamdutik kanamonik che ter, ak kolos boisionikab eunekwak.

¹⁷ Kermenge anyun, ak ing’eet, ak imwachi ichek tuguk tugul che ang’atin; ametoptoben amu ichek, si magonin itoptoben eng’ tainywa.

¹⁸ Keero, kayain betuni iegu nganaset ne ribot, ak toloitab karnet, ak irimoikab sugunwet, si igirinde emet komugul, ak laitorinikab Juda, koboto bounikyik, ak tisiikyik, ak bikab emet.

¹⁹ Ak obarge, ago maiterterin: amu ami koboten, si asorun, mwaei Jehovah.