JAKOBO 4 - BUKUIT NE TILIL

Yaachen kabesiosiek

¹ Bunu ano lugosiek ak boriosiek eng’ kwenung’wong’? Mabunu magutikwok che bortos eng’ kebeberwekwok?

² Ogase miat, amotinye kiy: obarisiei, ak koamok ng’etkong’, amomuchi onyoru: obortosi ak oyae luget; amotinye kiy, amu mosome.

³ Osome, amosiche, amu ya someng’wong’, si oyae magutikwok.

⁴ Okwek che oibege, mongen ole choruanditab ng’ony ko bunyondit eng’ Jehovah? Chito age tugul anyun ne machei koek choruetab ng’ony koyaegei koek bunyotab Jehovah.

⁵ Anan obwati ole ng’alali buch sirutik, kole, Tamirmiriet ne menyei eng’ achek kotinyei ng’etkonda?

⁶ Ago konu mieindo ne tesat. Len anyun, Kirindoi Jehovah che meniotin, ak kogochin mieindo che iming’inegei.

⁷ Noto anyun, oming’inityige Jehovah; ago ogirinde oindet, si komweenok.

⁸ Orikyi Jehovah, si korikyok. Oun eunekwok, okwek kiptengeginik; ak otilil mugulelwekwok, okwek che o bo kabwatutik aeng’.

⁹ Onginyalilak, ak oarogense, ak oteeiye: ingowalak roriondeng’wong’ koek arogenet, ak koek boiboiyeng’wong’ nyigisindo.

¹⁰ Oming’inge eng’ taitab Kiptaiyat, si koeetok.

¹¹ Amomwaitaege ng’alek che yaach okwege, che kitupche. Inendet ne mwaitae ng’olyot ne ya ne tupcho, anan koruokyi tupchennyi, komwaitae ng’olyot ne ya Ng’atutiet, ak koruokyin Ng’atutiet: ago ngot iruokyi Ng’atutiet, ko ma i chito ne yaei Ng’atutiet, ago i ne iruokyin.

¹² Ne konu Ng’atutiet ak koruochi ko agenge, inendet ne imuchi kosor ak komuchi kong’em: ago i ng’o inye si iruokyi chitab kokweng’ung’?

Ya menotetab magorek

¹³ Ogas anyun, okwek che omwae ole, Kibendi rani anan ko mutai nganasani, ak ketar kenyit agenge eng’ oloto, kealisiei, ak kealdoisiei, ak kesich kelunet:

¹⁴ ago mongen kit ne biitu karon. Nee sobeng’wong’? Amu okwek ko o kibungweret, ne toogu ne matia, yeityo kobet.

¹⁵ Amu kata nyoljinok ole, Ngo cham Kiptaiyat, kesoptosi, keyai ni anan ko nin.

¹⁶ Ago nguno otororige eng’ kachaunosiekwok bo ge: katororetab ge age tugul ne u noto ko ya.

¹⁷ Eng’ inendet anyun, ne ingen koyai ne mie, ama yaei, ko tengekto eng’ inendet.