JAKOBO 3 - BUKUIT NE TILIL

Kanyol kebou ng’elyepta

¹ Amat koek che chang’ eng’ okwek konetik, tupchosiekyuk, ongen ole tun kinyoru kiruoget ne o mising’.

² Amu kibutosi achek tugul eng’ tuguk che chang’. Ngot ko maibut chi age tugul eng’ ng’olyo, kogesunotgei chichoto, ak komuchi korib borto komugul agine.

³ Ngot kinde karik kutuswekab mbartanyisiek, si kobiit kogasech it, keweechi borwekwak tugul agichek.

⁴ Ogeer melisiek agichek, nganda eechen mising’, ak koonati usonaik che kimen, keweege baoiyot ne ming’in ne kindochine, kwo ole makyin ne kweriei.

⁵ U noto agine ng’elyepta, kebeberta ne ming’in, ak kolosegei eng’ tuguk che eechen. Ogeero, beelei mat ne ming’in kwenik che tia!

⁶ Ak ng’elyepta ko mat: ng’onyut ne bo tengekto eng’ kebeberwekyok ko ng’elyepta, ne imuruoni borto komugul, ak konaami mat eng’ bandab chi kote kosobei ak kinaami eng’ matab Gehenna.

⁷ Amu kibaei tiong’ik alak tugul, ak taritik, ak tuguk che ichuutegei ak tuguk che mitei nyanjet, ko kigobai bik;

⁸ ago maimuchi chi koboi ng’elyepta: yaitiet ne ma bounaksei, ne nyiitat ng’wonetab meet.

⁹ Kilosune noto Kiptaiyat ak ko Kwanda: ak kichube bik, che kigiyai eng’ kergeindab Jehovah:

¹⁰ bunu kutit agenge kaberuret ak chubisiet. Che kitupche, ma nyolu koteb ko u nito tuguchuto.

¹¹ Tos kutune konda agenge beek che anyiny ak che ng’wonen?

¹² Che kitupche, imuchi mogoiywet koii emitik? Anan koii ketitab sabibuk logoekab mogoonik? Amaimuchi beek che miach kobiitune che bo munyuk.

Ng’omnatet ne ma bo iman ak ne bo iman

¹³ Ng’o ne ng’om eng’ okwek ak koguitos? Ingobarta boisionikyik eng’ atebet ne mie eng’ kaming’inetab ge ne bo ng’omnatet.

¹⁴ Ago ngot otinye ng’etkonda ne ng’wan ak toiyet eng’ mugulelwekwok, ko mat olosge, amat omwa lembech agobo imanit.

¹⁵ Mabunu barak ng’omnatoni bo ng’ony, bo borwek, bo oindet.

¹⁶ Amu ole mitei ng’etkonda ak toiyet, komitei bolatet ak yautiet age tugul ne ya.

¹⁷ Ago ng’omnatet ne bunu barak ko ne tai ko tilil, yeityo ko bo kalyet, ak komuitoi, ak kasei kiy ne kimwachin, ak ko nyiitat rirenet ak logoek che miach, ama walaksei, ama tinyei chombilet.

¹⁸ Ak kegolei logoekab imanda eng’ kalyet agobo ichek che yaei kalyet.