JAKOBO 1 - BUKUIT NE TILIL

Kotigonet ne boisie kotugul agobo tuguk che terotin

¹ Jakobo, otwogindetab Jehovah ak ko bo Kiptaiyat Jesu Kristo, asirjini ortinwek taman ak aeng’ che bo bik che kigoiyestat, agatok.

² Tupchosiekyuk, oiit ole boiboiyet kityo ye konyoru yomsosiek che terotin;

³ ongen ole ibu muitaet tiemetab kayaneng’wong’.

⁴ Ak ingoek muitaet ne tinyei boisiet ne igesunotgei, si kobiit oegu che igesunotingei ak ko nyiitotin, che ma rartaat eng’ kiy.

⁵ Ago ngot kobetyi chi age tugul eng’ okwek ng’omnatet, ko ingosom Jehovah, ne igochin tugul eng’ aiyebindo ama kere kong’; ak kigochin inendet.

⁶ Ago ingosom eng’ kayanet, amat kosage: amu inendet ne sage ko kergei ak mildaetab ge ne bo nyanjet ne mildoi usonet koba komosi ak komosi.

⁷ Amat kobwat chichoto kole sichei kiy eng’ Kiptaiyat,

⁸ chitab kabwatutik aeng’, ne ma tononot eng’ ortinwekyik tugul.

⁹ Ago ingobaibait ne tupchet ne ko nyerat, eng’ katororennyi:

¹⁰ ak ingobaibait magoriot, amu kagiming’in: amu siirtoi inendet ko u taptetab suswek.

¹¹ Amu choru asista koboto usonet ne beelei tuguk, ak kobeel suswek koresyo; ak kobutyo taptokwak, ak kobet kororonindab itondanywa: betei ko u noto agine magoriot eng’ ortinwekyik.

¹² Baibai chito ne muitoi eng’ yomset: amu ye kagoterter, kotaachei kutwet ne bo sobondo, ne kiiarorji Kiptaiyat ichek che chamei inendet.

¹³ Amat komwa chi ye kagiyom kole, Kayoma Jehovah: amu mayomei Jehovah yaitiet, ama yomei inendet chi age tugul:

¹⁴ ago kiyomei chi tugul, ye imuti magennyi ne ya, ak kichuuti,

¹⁵ ak ye kagomanach maget ne ya, koii tengekto: ak ye kagoeet tengekto, koii meet.

¹⁶ Amat ongegenak, chamanikyuk che kitupche.

¹⁷ Kagoitoet age tugul ne mie ak konunotiot age tugul ne igesunotgei ko bo barak, chorugei eng’ Kwanda ne bo lapkeiyosiek, ne mami eng’ inendet kit ne walaksei, anan ko uruet ne bunu waletab ge.

¹⁸ Kisichech eng’ magennyi eng’ ng’olyotab imanit, si kobiit keegu che tongoanikab yautikyik.

Kayanet ne bo iman

¹⁹ Ongen ng’olyondoni, chamanikyuk che kitupche. Ago ingochepchebit chi age tugul kogas, amaek ne sib kong’alali, ama sib konerechi:

²⁰ amu mayaei neregekab chi imandab Jehovah.

²¹ Eng’ noto anyun omete simdo tugul ak chang’indab yaitwogik, otaach eng’ mutyonet ng’olyot ne kigimin, ne imuchi kosor sobonwekwok.

²² Ago oegu che yaei ng’olyot, amat oegu che kasei kityo, ogenege okwege.

²³ Amu ngot koek chi age tugul kasindetab ng’olyot, ama ne yaei, ko u chito ne keerei togennyi eng’ kioit:

²⁴ amu keeregei, ak kwo, ak koutie eng’ yoto kole ka chito ne u nee.

²⁵ Ago inendet ne isiachi ng’atutiet ne igesunotgei, ne bo katiaknatet, ak koteptoi, amaek kasindet ne utie, ago yaindet ne boisiei, kiberuri chichito eng’ boisiennyi.

²⁶ Ngo len chi tinyei atebet ne u ne bo kayanik, ama ribei ng’elyeptanyi ak koberberi muguleldanyi, ko buch kayanetab chichoto.

²⁷ Kayanet ne tilil ne matinyei muruonindo eng’ taitab Jehovah Kwanda, ko ni: kowendi kogeerei che matinyei sigikwak ak mosogik eng’ nyalildanywa, ak koripgei inendet eng’ ng’ony koek ne matinyei tisia.