ISAIAH 9 - BUKUIT NE TILIL

¹ Ago mami mesundeito eng’ emet ne kitinyei bichiindo. Eng’ betusiek che bo tai, ko kiipchi sasisiet emetab Sebulun ak emetab Naptali, ago kiitoror eng’ betusiek che bo let, oretab nyanjet, Jordan bitonin, Galili ne bo bororiosiek.

Sorunindetab Israel

² Kogogeer lapkeiyet ne o bik che kibendote mesundeito: kogoluuchi lapkeiyet ichek che kimenyei emetab uruetab meet.

³ Kiites bororiet, kiites boiboiyenywa: boiboitu eng’ taing’ung’ ko u boiboiyet ne bo kesisiet, ko u bik che boiboitu ye pchei barunenik.

⁴ Amu koiiri chogitab lautiennyi, ak siaritab tigikyiennyi, ak kiroktab usindennyi, ko u eng’ betusiekab Midian.

⁵ Amu kibeelei karik tugul che bo chitab luget eng’ wasetab ge, ak ngoroik che kiisegei korotik, koek che laldos.

⁶ Amu kagisikwech lakwet, kagigonech werit; ak ting’e inendet bounatet tigikyiennyi: ak kiguure kainennyi Kwong’utiet, Kiruogindet, Kamuktaindet ne bo Kamuktaet, Kwanda ne bo Koigeny, Bounindetab Kalyet.

⁷ Mami ole igesunegei tesetab ge ne bo bounatennyi ak kalyet, eng’ ng’echeret ne bo laitornatetab Daudi, ak laitornatennyi, si kogimit, ak koboi eng’ kiruoget ak imanda koboch nguno agoi koigeny. Yaei nito kagiiletab ge ne bo Jehovah ne bo lugosiek.

Kiruogetab Jehovah eng’ Israel

⁸ Kiiyokyi Kiptaiyat Jakobo ng’olyot, ak kobutyi Israel.

⁹ Ak konai bik tugul, agot Epraim ak ne menyei Samaria, che mwaei eng’ menotet ak eng’ muguleldo ne ichaugei,

¹⁰ Kagobutyo matabaruk, ago kiteege koik che kiwaei: kigiluul mogoonik, ago kigeere taragonik.

¹¹ Noto anyun ing’eeti Jehovah bounikab Resin, kogirinda inendet, ak kogiil bunikyik.

¹² Ing’eeti Suriek eng’ tai, ak Pilistik eng’ let; ak koam Israel eng’ kutit ne iseng’eng’at. Nganda u noto, ko ma istogei neregekyik, ago ta ko chuulat eunnyi kora.

¹³ Nganda u noto ko ma weekyigei bik inendet ne kibir ichek, ama cheng’ Jehovah ne bo lugosiek.

¹⁴ Tilei anyun Jehovah metit ak katutiet eng’ Israel, ebei temetab sosiot ak mutwot betunak.

¹⁵ Metit ko boiyot ne konyitot; ak katutiet ko maotiot ne ineti lembechek.

¹⁶ Amu ibeeti bichu icheget che indochin ak keng’emei ichek che kindochin.

¹⁷ Maboiboitu Jehovah eng’ murenikwak, ama rire chechuak che matinyei kwanda ak mosogikwak: amu ya age tugul, ak ko yaindetab yaitiet, ak komwaei kutit age tugul abusnatet. Nganda u noto, ko ma istogei neregekyik, ago ta ko chuulat eunnyi kora.

¹⁸ Amu lalei yaitiet ko u mat; igesu katablelinik ak katok: ee, lalei eng’ osnet ne o, ak koiyen iyeto ne o ne u bolik che nyigisen.

¹⁹ Kigolal emet eng’ neregekab Jehovah ne bo lugosiek: kagoigei bik kwenik che kilaali; marire chi ng’etab kamet.

²⁰ Wiriti age eng’ komostab eutab tai, ak koamei rubet; ak koam eng’ komostab eutab katam, ama biyong’dos ichek: amei chi age tugul banyekab eunnyi:

²¹ amei Manase Epraim; ak amei Epraim Manase: ak kogirindoi ichek tuwai Juda. Nganda u noto, ko ma istogei neregekyik, ago ta ko chuulat eunnyi kora.