ISAIAH 8 - BUKUIT NE TILIL

Kaborunet agobo Maer-salal-hasbas

¹ Ak kilenja Jehovah, Ipchige kit ne o ne kisirei, ak isire kalamitab chito, Agobo Maer-salal-hasbas;

² si kobiit acheng’jige baorinik che kiyani, kosir tuguk che biitu, Uria tisiindet, ak Sekaria weritab Jeberekia.

³ Kiawe anyun oldab chebioset ne maotio; ak kimanach, ak kosich werit. Kilenja Jehovah anyun, Tochi kainennyi Maer-salal-hasbas.

⁴ Amu kotom komuch lakwanato kotwek kole, Baba, ak Eiyo, koluulei laitoriatab Asuria magornatosiekab Damasko ak barunenikab Samaria.

Jehovah ak bunikab Juda

⁵ Ak king’alalwa Jehovah kogeny, kole,

⁶ Amu kiesio bichu beekab Siloa che rootei mutyo, ak koboiboitune Resin ak weritab Remalia;

⁷ keero, ipchin anyun Kiptaiyat ichek beekab Ainet, che chang’ che kimen, noto ko laitoriatab Asuria koboto torornatennyi tugul: ak kotogosyi inendet ainosiekyik tugul, ak kosiir ngegusiekyik tugul:

⁸ ak kobokto kwo Juda; ak koyom kosiir oloto; nyiiei kot koit kaatit; ak konyiiei kaiitoetab kebebaikyik tebeesindab emeng’ung’, ee Imanuel.

⁹ Owaach, ee bororiosiechu, si kobiit ketonatonak; ak oeb it, ee okwek tugul che o bo emotinwek che looen: ogermenge, si ketonatonak; ogermenge anyun, si ketonatonak.

¹⁰ Oruoch tugul, si koek buch; omwa ng’olyot, ama tononi: amu mi Kamuktaindet kobotech.

¹¹ Amu king’alalwa Jehovah ko u noto eng’ eut ne kim, ak kotigona si mawendate ortinwekab bichu, kole,

¹² Amomwa ole, Chaamset, agobo tugul che mwaei bichu kole, Chaamset; amoiywei kit ne iywei icheget, anan oarogen.

¹³ Amu Jehovah ne bo lugosiek inegei ne ogonyiti; ak ingoek inendet ne oiywei, ak koek inendet ne konok oiyweisie.

¹⁴ Ak koek inendet ole tilil; ago egu koita ne inachi bich ak ruandet ne riichei bich eng’ gorik tuwai che bo Israel, koek mestet ak mestet age ne ter eng’ bik che menyei Jerusalem.

¹⁵ Kinachi che chang’ eng’ oloto, ak kobutyo, ak koilyo, ak kename mestet, ak kimut.

¹⁶ Rat anyun baornatet, ng’och ng’atutik eng’ kwenutab alamalyennyu.

¹⁷ Si agen Jehovah, ne unyei togennyi si mageer gotab Jakobo, ak amang’u inendet.

¹⁸ Ogeero, ane ak lagok che kigona Jehovah ko ki kaborunoik ak kwong’utik eng’ tugul, che bunu Jehovah ne bo lugosiek, ne menyei tulwetab Sion.

¹⁹ Ak ye mwawok kole, Ocheng’ate ichek che boisie oik ak bonik, che twegu ko u taritik ak che nyeanyei ng’alek: tos manyoljin bik kocheng’ Kamuktaindenywa? Tos nyoljin kocheng’at che kigobek agobo che soptos?

²⁰ Onamge ak ng’atutik ak baornatet! Ngot ko mang’alal ichek kosub ng’olyondonito, ko amu mami lapkeiyet eng’ ichek.

²¹ Ak tun siirtoe yoto, konyalildos ak koamei rubet: ak ye tun kaam rubet, konerekso, ak kosas laitoriandenywa ak Kamuktaindenywa, ak konyal barak:

²² ak kogeer ng’ony, ak ogeero, mi bichiindo ak mesundeito, mesundeito ne bo ndara; ak keonji ichek mesundeito ne o.