ISAIAH 7 - BUKUIT NE TILIL

Konamegei Suria ak Israel si kobarget ak Juda

¹ Eng’ betusiekab Ahas weritab Jotam, weritab Usia, laitoriatab Juda, kotogosta Resin Jerusalem laitoriatab Suria, ak Peka weritab Remalia, laitoriatab Israel, kolen kobargei; ago ma imuch koterter.

² Ak kigimwachi gotab Daudi, kelenji, Kanamgei Suria ak Epraim. Ak kibotan muguleldanyi, ak mugulelwekab bikyik, ko u ye itumdumi usonet ketikab osnet.

³ Kimwachi anyun Jehovah Isaia kolenji, Ui anyun otuiye ak Ahas, inye ak Sear- jasub wering’ung’, otuiyechi ole igesunegei kererjetab tamboiyot ne bo meto, ne mi oret ne o ne bo koretab mwetindet;

⁴ ak ilenji inendet, Ripge, ak isis; ameiyweisie, anan kotanui muguleldang’ung’, amu katutoichu aeng’ che bo kegenganik che iyendos, amu neregek che ng’wonen che bo Resin ak Suria, ak che bo weritab Remalia.

⁵ Amu kagochaamin Suria, koboto Epraim, ak weritab Remalia, kolenjigei,

⁶ Ongetogoste kebarge ak Juda, ak kinyalil ak keluuljige, si kinde laitoriat, noto weritab Tabeel:

⁷ kamwa ko u ni Kiptaiyat Jehovah, kole, Matononi nito, ama yaoksei.

⁸ Amu metitab Suria ko Damasko, ak metitab Damasko ko Resin: ak ye tom kogesgei kenyisiek tamanwogik lo ak mut, ko tonaksei Eprain si ma ko bororiet:

⁹ ak metitab Epraim ko Samaria, ak metitab Samaria ko weritab Remalia. Ngot ko moyan, ko magigimitok iman.

¹⁰ Ak king’alalji Jehovah Ahas kogeny kolenji,

¹¹ Som Jehovah Kamuktaindeng’wong’ kaborunet; som agot ngo mitei riret, anan ngot komi barak mising’.

¹² Ago kimwa Ahas kole, Masome, amatieme Jehovah.

¹³ Ak kimwa kole, Ogas anyun, ee gotab Daudi; tos kit ne ming’in eng’ okwek ogochi bik kong’etyo, kot ogochi Kamuktaindennyu kong’et agine?

¹⁴ Konok anyun Kiptaiyat inendet kaborunet; ogeero, manachi bergeiyat, ak kosich werit, ak koguure kainennyi Imanuel.

¹⁵ Amei inendet mwaitab chego ak kumik, ye kagonai koesio yaitiet, ak kolewen ne mie.

¹⁶ Amu kotom konai lakwet koesio ne ya, ak kolewen ne mie, kemetoi emet ne iweche laitorinikyik tuwai.

¹⁷ Ibun Jehovah, ak koipchi biguk, ak gotab kwandang’ung’, betusiek che tom kobiit, koboch betut ne kiistoegei Epraim Juda; noto laitoriatab Asuria.

¹⁸ Ak eng’ betunoto koititenji Jehovah kalyang’et ne mi tabanwek che looen che bo ainosiekab Misri, ak koititenji segemiat ne mi emetab Asuria.

¹⁹ Ak kobwa, ak komuuny tugul eng’ atebwosiek che kigoek surkwen, ak eng’ ole kigobetak eng’ ruandosiek, ak eng’ katok tugul, ak eng’ ola tugul ole kiyagisie.

²⁰ Inemu metit Jehovah eng’ betunoto eng’ rotwet ne kialei, ne mi komoswekab Ainet bitonin, koboto laitoriatab Asuria, inemu metit ak kororikab kelyek: ak konem kogeny tamnet koges.

²¹ Ak eng’ betunoto, koyagi chito roriat ak kechirek aeng’;

²² amu tun konu icheget chego che chang’, tun amei inendet mwaitab chego: amu tun amei age tugul ne kang’et eng’ emet, mwaitab chego ak kumik.

²³ Ak tun biitu eng’ betunoto katablelinik ak katok eng’ komosta age tugul, eng’ ole kimi ketikab sabibuk elfut agenge che yamegei ak fedaisiek elfut.

²⁴ Wendi chito oloto kotinyei kipchabonik ak kwanget: amu egu emonoto tugul katablelinik ak katok.

²⁵ Morikyini betunoto tulonok tugul che mengechen che kigibat, amu oiywei katablelinik ak katok, ago egu ole kiyage tuga, ak ole tiechei kechirek.