ISAIAH 66 - BUKUIT NE TILIL

¹ Mwaei Jehovah ko u ni kole, Kipsengwet ko ng’echerennyu ne bo laitornatet, ak ng’ony ko ng’echeretab kelyekyuk: oteekwa got ne u nee? Ak komosta ano ole amuung’e?

² Amu kiyaei eunnyu tuguchuto tugul, ak kibiit anyun tuguchuto tugul, mwaei Jehovah; ago ageni inendet ne banan ak konyerategei eng’ tamirmiriet, ne botani amu ng’olyondennyu.

³ Inendet ne barei teta ko kergei ak inendet ne barei chito; inendet ne igoitoi aruetab kechir koek tiseiywot, ko kergei ak inendet ne kiriei kaatitab seset; inendet ne igoitoi kagochinet ko kergei ak inendet ne kigoitoi korotikab toret; inendet ne beelei tuguk che nyamdut ko kergei ak inendet ne iberuri kanamwet: ee, kigolewen ortinwekwak ak kochamei sobonwekwak tugukwak che kiwechei;

⁴ alewenjini anyun kaberberisiosiekwak, ak aipchi ichek kaiyweisiosiekwak; amu kingaguurse, ko ma wol chi; ye kingang’alal, ko ma kas ichek: ago kiyai tuguk che yaach eng’ tainnyu, ak kolewen tuguk che ma abaibaitune.

⁵ Ogas ng’olyotab Jehovah, okwek che obotandosi amu ng’olyondennyi: Kigomwa che otupche icheget che wechok, che kitimdak agobo kainennyu, kole, Ingitoror Jehovah, si kobiit kegeer boiboiyeng’wong’; ago ililandos.

⁶ Waagat ne bo wasetab ge ne bunu nganaset, waagat ne bunu hekalut, kutitab Jehovah ne yaaktochin mugetut bunikyik.

⁷ Kisigis amanyor ng’wanindo; kisich werit kotom kogas ng’wanindo.

⁸ Kigogas ng’o ng’olyot ne u ni? Kigogeer ng’o tuguk che u chu? Tos kisichei emet eng’ betut agenge? Tos kisichei bororiet eng’ sait ne matia? Amu kisich Sion lagokyik, eng’ sainato kinyorune ng’wanindo.

⁹ Tos aete kesich lakwet ne kogoyam kesich? Mwaei Jehovah. Tos arate moet ne agochini koi? Mwaei Kamuktaindeng’ung’.

¹⁰ Oboiboitu okwek koboto Jerusalem, ogasge koboto inendet, okwek tugul che ochame inendet: oboiboitu eng’ boiboiyet koboto inendet, okwek tugul che orirjini:

¹¹ si kobiit ochuchun obiyong’se eng’ kainaikab kagaigaosiekyik; si kobiit ochuchun tugul, ak oboiboitune chang’indab torornatennyi.

¹² Amu mwaei Jehovah ko u ni kole, Ogeero, atesyini kalyet ko u ainet, ak atesyi torornatetab bororiosiek ko u kererut ne ing’irtogei, ak ochuchun; kiisyinok usia, ak ketinyok kigaigaak.

¹³ Agoigook ko u inendet ne igoigoi kamet; ak kigaigaak eng’ Jerusalem.

¹⁴ Ak ogeero, ak koboiboitu mugulelwekwok, ak kong’atyo kowekwok ko u suswek che ng’orng’or: ak konaak eutab Jehovah eng’ otwogikyik, ak konerekyi bunikyik.

¹⁵ Amu ogeero, nyonei Jehovah eng’ mat, ak koigei karisiekyik che bo luget kipchurjuriet; koyaakta neregekyik eng’ koromnatet, ak koyaakta kerennyi bo kong’ eng’ liblibenetab mat.

¹⁶ Amu iruoksechin Jehovah bik tugul eng’ mat ak eng’ rotwennyi bo chok: ak kochang’a che barei Jehovah.

¹⁷ Mwaei Jehovah kole, Igesugei ichek tugul che ianyinyegei ak kotililegei si koba mbarenik, kosubotgei ak koamei banyekab torok, ak che kiwechei, ak murek.

¹⁸ Amu angen boisionikwak ak kabwatutikwak: nyonei betut, ye ayumi bororiosiek tugul ak kutuswek tugul; ak kobwa ak kogeer torornatennyu.

¹⁹ Ak ande kaborunet kwenunywa, ak ayokte che chilildos eng’ ichek koba bororiosiek, koba Tarsis, Pul ak Lud, che ng’iei kwanget, agoi Tubal ak Jaban, agoi ngegusiek che looen, che tom kogas agobo kalosunennyu, anan kogeer torornatennyu; ak komwaita torornatennyu eng’ bororiosiek.

²⁰ Ak komut tupchosiekwok tugul komong’une bororiosiek tugul koek kagochinet eng’ Jehovah, kobunu mbartanyisiek, ak karisiek, ak tirbonok, ak eng’ nyumbusiek, ak eng’ moek che chepcheben che bo tambesik, kobwa tulwennyu ne tilil Jerusalem, mwaei Jehovah, ko u ye ibu lagokab Israel kagochinenywa eng’ teret ne tilil konyo gotab Jehovah.

²¹ Ak ande alak eng’ ichek kogeny koek tisiik ak Lawik, mwaei Jehovah.

²² Amu ko u ye tebe tainnyu kipsengwetisiek che leelach ak ng’onyut ne leel, che ta ayae, ko u noto tebyei iyoteng’wong’ ak kaineng’wong’ eng’ tainnyu, mwaei Jehovah.

²³ Ak tun bwanei bik tugul koloswa eng’ tainnyu koboch ye kaleel arawet agoi koleel age, ak koboch sabato age agoi sabato age, mwaei Jehovah.

²⁴ Ak komanda koba kogeer muswekab bik che kiingelelja: amu mabegu kutikwak, ama kimisi manywa; ak koek che wechei bik tugul.