ISAIAH 64 - BUKUIT NE TILIL

¹ Kata mie ibet kipsengwetisiek, ak ichoruge, si kobiit kobotanso tulonok eng’ taing’ung’;

² ko u ye beelei mat sigorik, ak ko u ye iguuti mat beek: si kibarta kaineng’ung’ konaak eng’ buniguk, si kobotanso bororiosiek eng’ taing’ung’!

³ Ye kingiyai tuguk che bo kamuiset che kima kicheng’, kiichoruge, kibotanso tulonok eng’ taing’ung’.

⁴ Amu tomo kogas bik koboch keny, anan koguiyo eng’ itik, anan kogeer eng’ konyekwak Kamuktaindet age ne ma inye, ne yaei boisiet agobo chito ne igeni inendet.

⁵ Otuitosi ak inendet ne baibai ak koyaei imanda, icheget che ibwatin eng’ ortinweguk: keero, kiinerech, ak kigiyai tengekto: kigeyai choto betusiek che chang’, ak tos kisoruech?

⁶ Amu kigiige tugul chi ne bo simdo, ak u imandanyo tugul ngoriet ne muruon: ak kirestosi achek tugul ko u sogot; ak onech yaitwogikyok ko u ye onsei usonet.

⁷ Ama mi ne kuurei kaineng’ung’, ne igiilegei si kobiit konamin: amu kiiung’enech togeng’ung’, ak kiigeswech amu tengekwogikyok.

⁸ Ara anyun, ee Jehovah, i kwandanyo; ki menet, ak ko i mimiindennyo; ak ki boisionikab euneguk achek tugul.

⁹ Amat inerech mising’, ee Jehovah, amat ibwat tengekto agoi: keero, keer komie, kisain, ki biguk achek tugul.

¹⁰ Kigoek kong’atet nganasoguk che tililen, koek Sion ong’atet, koek Jerusalem karatia.

¹¹ Kigebeel gonnyo ne tilil ne kararan, ole kilosunenen kwanisiekyok; kigong’emogis tugukyok tugul che kororon.

¹² Ee Jehovah, tos ta iranyege eng’ tuguchoto? Tos isise, ak inyalilech mising’?