ISAIAH 63 - BUKUIT NE TILIL

Katerteretab chitab luget ne bo Kamuktaindet

¹ Ng’o ne bunu Edom, ne tinyei ngoroik che kigisal kobiriritu, eng’ Bosra: ne tinyei ngoroik che bo torornatet, kowendi eng’ oindab kimnatennyi? Anendet ne ang’alali eng’ imanda, ne atinye kamuget asor.

² Amu nee si kobiriritu ngoroiguk, ak u ngoroiguk che bo ne tiechei sabibuk?

³ Kiatiech anege sabibuk eng’ ole kitue; ak kima komi chi kobota eng’ bichoto; ee, kiatiech eng’ neregekyuk, atiechatiech eng’ neregekyuk che laldos; ak koisegei ngoroikyuk korotikwak che soptos, ak kiamuruon ngoroikyuk tugul.

⁴ Amu kimi muguleldanyu betutab yaaktaetab mugetut, ak kagoit kenyitab chechuk che kitiachi.

⁵ Ak kiageerote, ama biit ne toretisiei; ak kiakwong’ amu ma biit chi ne tiiei age: kiibwa anyun eunnyu yetunet; ak kitiia neregekyuk che ng’wonen.

⁶ Ak kiatiech bik eng’ neregekyuk, ak kiagochi kobogityo eng’ neregekyuk che ng’wonen, ak kiatumji ng’ony korotikwak che soptos.

Kongoi amu mieinwekab Jehovah che bo betusiek che kigosiirto

⁷ Amwaitoi chamnyet ne tala ne bo Jehovah, ak kalosunoikab Jehovah, ko u tugul che kigogonech Jehovah; ak mieindo ne o eng’ gotab Israel, ne kigogochi ichek ko u rirenosiekyik, ak ko u chang’indab chamnyennyi ne tala.

⁸ Amu kimwa kole, Bikyuk iman, lagok che mayaei kaberberisiet: kiek anyun yetindenywa.

⁹ Kiginyalil inendet eng’ nyalilwogikwak tugul, ak kisor ichek malaikaiyandennyi ne kimi tainnyi: kiitiach eng’ chamnyennyi ak rirenennyi; ak kigesen ak koganab betusiek tugul che bo keny.

¹⁰ Ago kiingelelso ak kogochi arogenet Tamirmiriennyi ne tilil: kigiwal anyun koek bunyondenywa, ak kobargei ak ichek.

¹¹ Kiibwat anyun betusiek che bo keny, Musa, ak bikyik, kole, Mi ano inendet ne kiimut ichek kolong’une nyanjet koboto mestowek che bo akwennyi? Mi ano inendet ne kiinde Tamirmiriennyi ne tilil kwenunywa,

¹² ne kichuul eunnyi ne bo torornatet koba koboto eutab tai ne bo Musa, ne kipchei beek eng’ tainywa, si koyachigei kainet ne bo koigeny,

¹³ ne kiindochi ichek kobun riret, ko u mbartanyit eng’ ong’atet, si maginach?

¹⁴ Ko u ye chorjingei tuga atebwet, kogochi ko u noto Tamirmirietab Jehovah ichek komuuny: kiindochi anyun biguk, si kobiit iyachige kainet ne toror.

¹⁵ Keer anyun ng’ony eng’ kipsengwet, ak igeer eng’ meng’otetab tililindang’ung’ ak ko bo torornateng’ung’. Mi ano kagiileng’ung’ bo ge ak boisioniguk che bo kamuktaet? Kaietena rirenetab muguleldang’ung’ ak rirenosieguk.

¹⁶ Amu i kwandanyo, agot ngo maingenech Abraham, ama naech Israel; ee, Jehovah, inye ko i kwandanyo; kaineng’ung’ ko katiagindennyo koboch keny.

¹⁷ Ee, Jehovah, amu nee si igonech kemaste eng’ ortinweguk, ak iuuit mugulelwekyok si magiywein? Weege amu otwogiguk, bororiosiekab boroteng’ung’.

¹⁸ Kinyaban biguk che tililen; ago ne matia kotiech bunikyok oldang’ung’ ne tilil.

¹⁹ Kageige bik che kitom ibou; ko u icheget che ma kimwaitae kaineng’ung’.