ISAIAH 61 - BUKUIT NE TILIL

Boisietab Katiagindet eng’ Sion

¹ Mi kobota tamirmirietab Kiptaiyat Jehovah; amu kiila Jehovah si kobiit aamji logoiywek che miach che nyerotin; kigoyokta anya che ilyotin mugulelwek, si kobiit aamji luulenik katiaget, ak kitiach che ratotin.

² Si kobiit aamda kenyit ne chamat eng’ Jehovah, ak betutab yaaktaetab mugetut ne bo Kamuktaindennyo; ak agaigai tugul che rirtos;

³ si aarorji ichek che rirtos eng’ Sion, kigochi chepkulet ne kararan kogeere orek, ak mwaitab boiboiyet kogeere rirek, ak ngorietab kalosunet kogeere tamirmiriet ne kigonyigisit; si kobiit keguure ketik che bo imanda, che kimin Jehovah, si kegonyit.

⁴ Ak koteech kogeny karatwek che bo keny, koteech kole kiga koguber eng’ tai, ak koteech kogeny nganasok che kigemeto, ole kiga koguber eng’ ibinwek che chang’.

⁵ Ak kotononso toek koyaga akwotisiekab kechirekwok, ak kobatwok mbarenik kipsagarek, ak koek ribikab sabibukwok.

⁶ Ago kiguurenok tisiikab Jehovah: kuurenok bik kiboitinikab Kamuktaindennyo: oame magornatosiekab bororiosiek, ak olosunege torornatenywa.

⁷ Onyoru konyil aeng’ agobo kalilaneng’wong’; ak koboiboitu eng’ kebebertanywa kogeere toiyet: nyabani anyun ichek konyil aeng’ eng’ emenywa: bunjin ichek boiboiyet ne bo koigeny.

⁸ Amu achame ane Jehovah kiruoget, aweche rebisiet koboto tengekto; ak ayaakyini ichek eng’ imanit, ak kiyomisyige ak ichek kayomiset ne bo koigeny.

⁹ Ak konaak iyotenywa eng’ bororiosiek, ak konaak lagokwak eng’ bik: ak naei bik tugul ichek ye keer, kole, Chu iyotet ne kigoberur Jehovah.

¹⁰ Abaibaitu mising’ eng’ Jehovah, boiboitu sobondanyu mising’ eng’ Kamuktaindennyu; amu kagolaakwa ngoroikab yetunet, kagotugena ngoriet ne bo imanda, ko u ye lelesane sandet kit ne indoi metit, ak ko u ye lelesane mureret sonoekyik.

¹¹ Amu ko u ye ing’atos tuguk eng’ ng’ony, ak ko u ye bitos tuguk che kigigolji mbar; kobiti ko u noto Kiptaiyat Jehovah imanda ak kalosunet eng’ taitab bororiosiek tugul.