ISAIAH 60 - BUKUIT NE TILIL

Tiendab Sion ne kigitiach

¹ Ng’eet, iluu; amu kagoit lapkeiyeng’ung’, ak kagochorjin torornatetab Jehovah.

² Amu, keero, tuchei mesundeito ng’ony, ak kotuch mesundeito ne o bororiosiek: ago chorjinin Jehovah, ak kotook torornatennyi eng’ inye.

³ Ak kobwanji bororiosiek lapkeiyeng’ung’, ak kobwanji laitorinik kaluunetab choruneng’ung’.

⁴ Yot met ak igeer komoswek tugul: iyumigei ichek tugul, ak kobwanjin: bunu weriguk ole loo, ak keganabu tibiguk.

⁵ Igeer anyun ak kikwenyin, ak kobotan muguleldang’ung’ ak kibaraa; amu bwanjinin chang’indab nyanjosiek, bwanjinin magornatosiekab bororiosiek.

⁶ Tuchin chang’indab tambesik, koboto moekab tambesik che bo Midian ak Epa; bunu tugul Sheba: ibu tahabu ak tuguk che nyamdut, ak komwaita kalosunoikab Jehovah.

⁷ Kiyumjinin akwotisiek tugul che bo kechirekab Kedar, koboisieun mengichikab Nebaiot: bwanei amu taachaksei eng’ kaptisisiennyu, ak atorori gotab torornatennyu.

⁸ Ng’o chu ruaei ko u boldet, ak kotirirendos cheptugenik eng’ tirisiokwak?

⁹ Igena iman ngegusiek, ak sib kogena melisiek che bo Tarsis, si kobiit komut weriguk eng’ ole loo, koibu fedaisiekwak ak tahabusiekwak, agobo kainetab Jehovah Kamuktaindeng’ung’, ak agobo Inendet ne Tilil ne bo Israel, amu kigotororin.

¹⁰ Ak koteech toek irimoiguk, ak koboisieun laitorinikwak: amu kiabirin eng’ neregekyuk, ago kiarirenen amu chamennyu.

¹¹ Kiyatei kogeny ormarichoguk kotugul; magigerei bet anan kemoi; si koibun bik magornatosiekab bororiosiek, koboto laitorinikwak che kimutu.

¹² Amu lusei bororiet ak bounatet ne maboisieun; ee, king’emei bororiosiechoto kobetyo.

¹³ Nyonjinin torornatetab Lebanon, koboto biribirinik, taragonik che sabulen, ak taragonik che ter; si koyai konyol oldanyu ne tilil, ak achob ole tebe kelyekyuk kogararanit.

¹⁴ Ak kobwanjin werikab icheget che kiinyalilin kong’urugonu; ak kogutung’so eng’ keldebesaikab kelyeguk ichek tugul che kisasin; ak koguurenen, Nganasetab Jehovah, Sion ne bo Inendet ne Tilil ne bo Israel.

¹⁵ Ak ko u ye kiga kebagakten, ak kewechin, kot ko kima kota komi chi ne kibunei kwenung’ung’, ayain anyun iegu telunatet ne bo koigeny, boiboiyetab ibinwek che chang’.

¹⁶ Ichuchuni kogeny chegab bororiosiek, ak irerie kinaikab laitorinik: si kobiit inai ile ane Jehovah, ko a yetindeng’ung’, ak ko katiagindeng’ung’, Inendet ne bo Kamuktaet ne bo Jakobo.

¹⁷ Aibu tahabu ageere sugunonik, ak aibu feda ageere karik, ak ageere sugunonik ketik, ak ageere karik koik: ak ayai kogeny kiptainiguk koek kalyet, ak ayai kayagiguk koek imanda.

¹⁸ Ma kegasei kogeny koromnatet eng’ emeng’ung’, anan kobiit kubernatet ak ng’emisiet eng’ kiwotosieguk; ago tun iguure irimoiguk Yetunet, ak iguure ormarichoguk Kalosunet.

¹⁹ Ma koegu asista lapkeiyeng’ung’ bet: ama kogonin lapkeiyet kaluunetab arawet: ago egu Jehovah lapkeiyeng’ung’ ne bo koigeny; ak koek Kamuktaindeng’ung’ torornateng’ung’.

²⁰ Ma kororoktoi asistang’ung’, ama komei araweng’ung’: amu egu Jehovah lapkeiyeng’ung’ ne bo koigeny, ak kogesgei betusiekab rireguk.

²¹ Ak koek che bo imanda kogeny biguk tugul, ak koek emet borotenywa koigeny; temet ne kiamin, boisietab eunekyuk, si kobiit kegonyita.

²² Egu ne ming’in elfut, ak koek ne ming’in bororiet ne kim: achokyini noto ane Jehovah eng’ betunnyi.