ISAIAH 6 - BUKUIT NE TILIL

Kuursei maotiot

¹ Eng’ kenyit ne kimee laitoriat Usia, ageer Kiptaiyat kotebe ng’echeretab laitornatet, kotoror ak komi barak, ak kinyi ngoriennyi hekalut.

² Kitonondos serapik eng’ baragunnyi: kitinyei age tugul kebebaik lo; kituge aeng’ togennyi, kotuge aeng’ kelyekyik, ak kitirirene aeng’.

³ Ak kitwekyi age age kolenji, Tilil, tilil, tilil, Jehovah ne bo lugosiek: nyiitat ng’ony komugul torornatennyi.

⁴ Ak kiitumdumgei lumeiywekab tugatugikab kurget amu tugetab inendet ne kitwek, ak kinyi got iyeto.

⁵ Kiale anyun, Bwa ane! Amu kaabet; amu a chi ne tinyei kutit ne ng’wan, ak kimeng’isiei ak bik che ng’wonen kutuswek: amu kaageer Laitoriat, Jehovah ne bo lugosiek.

⁶ Kitirirenja anyun age eng’ serapik, kotinyei ng’etetiot eng’ eunnyi, ne kiinemune kanameiywot eng’ kaptisisiet.

⁷ Ak kitwae kutinnyu, ak kole, Keero, kagotwa kuting’ung’ nito; ak kageisto ng’ogistang’ung’, ak kagiundo tengektang’ung’.

⁸ Ak kiagas kutitab Kiptaiyat kolen, Ayokte ng’o, ng’o ne wendi agobo achek? Kiale anyun, Ami yu; iyokta.

⁹ Ak kile, Ui, ak imwachi bichu ilenji, Ogase iman, ago moguitosi; ak ogeere iman, ago monae.

¹⁰ Yai mugulelwekab bichu konyigisitu, ak kotimogis itikwak, ak kogerogis konyekwak, si mageertoe konyekwak, ama kastoe itikwak, anan koguiyo eng’ mugulelwekwak, ak kowalogis, ak kisoob.

¹¹ Kiateebe anyun, ale, Ee Kiptaiyat, tianitu? Ak kiwol kole, Agoi tun koguber nganasok, ak koguber gorik, ak koek emet kipkubere mising’.

¹² Ko kagouto Jehovah bik koba ole loo, ak kochang’a emotinwek che kigemeto eng’ emet.

¹³ Ak ngot ko ta komi kebeberta agenge eng’ taman, keamei kogeny: ko u ketit ne kiguure teil, ak ketit age, che ng’etu musugikwak ye kageeb; u noto, iyotet ne tilil ko tigitikyik.