ISAIAH 59 - BUKUIT NE TILIL

Kerei tengekto Jehovah si mabois

¹ Ogeero, ma nwach eutab Jehovah, kot ko maimuch kosor; ama nyigis itinnyi, kot ko maimuch kogas:

² ago kigobesienok tengekwogikwok Kamuktaindeng’wong’, ak kigouny tengekwogikwok togennyi, kot ko ma kochamei kogas.

³ Amu muruonen eunekwok eng’ korotik, ak ko muruonen morikwok eng’ tengekto; kogomwa kutuswekwok lembechek, ng’alali ng’elyebwekwok yaitiet.

⁴ Mami agot agenge ne cheng’ei imanda ne bo kiruoget, ama mi ne ibei ng’alek che bo iman kapkiruok: imang’u ichek tangoita, ak komwaei lembechek; manachi yaitiet, ak koi tengekto.

⁵ Igenyi koikab erenet, ak kola gotab kibroroktet: meei ne amei koikwak, ak mong’une erenet koita ne kagitui.

⁶ Maegu gorikab kibroroginik ngoroik, ama tugegei boisionikwak: boisionikwak ko boisionikab yaitiet, ak komi eunekwak boisietab koromnatet.

⁷ Ruachin kelyekwak yaitiet, ak kochoktoi kotumda korotik che matinyei tengek: kabwatutikwak ko kabwatutikab tengekto; mi ortinwekwak kubernatet ak ng’emisiet.

⁸ Maingen ichek oretab kalyet; ama mi kiruoget eng’ ortinwekwak: kigoyachigei ortinwek che kunuren; maingen kalyet age tugul ne bunei oloto.

Kong’anyei bik tengekwogikwak

⁹ Loo anyun kiruoget eng’ achek, ama nyoruech imanda: kicheng’e lapkeiyet, ago ogeero, mi mesundeito; kicheng’e kakweng’et, ago kibendote mesundeito.

¹⁰ Kisapsabisioti kecheng’e inatut ko u kipkoratinik, ee, kisapsabisioti ko u che matinyei konyek: kibutyoti bet kwen ko u ye karatarat; ki u che kigobek ye kimi kwenutab che neriotin.

¹¹ Kimorori tugul ko u keerisiek, ak kitigendosi mising’ ko u cheptugenik: kicheng’e kiruoget, ago mami; kicheng’e yetunet, ago looenech.

¹² Amu kigotesogis bistaosiekyok eng’ taing’ung’, ak baorianjinech tengekwogikyok: amu mi kobotech bistaosiekyok, ak kingen tengekwogikyok:

¹³ kigiesie Jehovah eng’ bistoennyo, ak kigemaste ama kisub Kamuktaindennyo, keng’alali ng’alekab sastaet ak ngelelnatet, kichobe eng’ mugulelwekyok ng’alekab lembech, ak kemwae.

¹⁴ Ak kikwa let kiruoget, ak tononi imanda eng’ ole loo: amu kagobutyi imanda oret, ak maimuchi komong’ lititindo.

¹⁵ Ee, betot imanda; ak inendet ne bagaktoi yaitiet koyaegei koek ne kiluulei. Ak kigeer Jehovah nito, ak ma ibaibai inendet amu kima komi kiruoget.

Kotau Jehovah katiaget

¹⁶ Ak kigeer kole mami chi age tugul, ak kikwong’ amu kima komi ne sachin age: kiipchigei anyun yetunet eng’ eunnyi; ak kiti imandanyi inendet.

¹⁷ Ak kiilaach imanda ko u karnetab teget, ak chepkulet ne bo yetunet eng’ metinnyi; ak kiilaach ngoroikab yaaktaetab mugetut, ak kiilaach kagiiletab ge ko u sambut.

¹⁸ Yaakyin ichek ko u boisionikwak, neregek che ng’wonen eng’ bunikyik, yaaktaet eng’ bunikyik; yaakyin ngegusiek ko u ye nyoljin.

¹⁹ Iywei anyun kainetab Jehovah eng’ cherongo, ak koiywei torornatennyi eng’ ole chorune asista: amu nyonei ko u ainet ne isururtoi, ne onei kabusetab Jehovah.

²⁰ Ak konyo katiagindet Sion, ak konyonji ichek che bo Jakobo che metoi bistoet, mwaei Jehovah.

²¹ Ni anyun kayomisennyu ne kiyomisyinige ak ichek, mwaei Jehovah: maistoegei kuting’ung’ tamirmiriennyu ne miten ak ng’aleguk che kiande kuting’ung’, anan eng’ kutitab iyoteng’ung’, anan eng’ kutuswekab mochogoroniguk, mwaei Jehovah, koboch nguno agoi koigeny.