ISAIAH 58 - BUKUIT NE TILIL

¹ Waach mising’, amesis, waach ko u iriaget, ak imwachi bikyuk bistoenywa, ak imwachi gotab Jakobo tengekwogikwak.

² Ago cheng’a betut age tugul, ak chamei konai ortinwekyuk: ko u bororiet ne kiyai imanda, ama meto kiruogetab Kamuktaindenywa, teebena kiruogutik che bo iman, chamei korikyi Kamuktaindet.

³ Mwaei ichek kole, Amu nee si kirugutige, amegeere? Amu nee si kinyalil achek sobonwekyok, amemage kiy? Ogeero, onyoru boiboiyeng’wong’ eng’ betutab karuguteng’wong’ bo ge, ak omage bik tugul che boisiewok tuguk che siirtoot.

⁴ Ogeero, orugutige agobo boriet ak suriet, ak olugisie yaitiet: morugutige eng’ betuni si kegas kuting’wong’ eng’ ole bo barak.

⁵ Tos noto karugutetab ge ne kialewen? Betut ne inyalili chi sobondanyi? Koabuch chi metinnyi ko u cherungut, ak kosieb kuniok ak orek? Tos oguure nito karugutetab ge, betut ne taachaksei eng’ Jehovah?

⁶ Tos ma karugutetab ge ni ne kialewen: ale kitiach ratutikab yaitet, kitiach anokab chogit, ak keunda che kigetiekyi ng’ony, ak oiri chogit age tugul?

⁷ Tos ma kebae amitwogiguk che amei rubet, ak imutu kibananok che kigetimda, kobwa gong’ung’? Ye igeer ne mi ach ngor, ituch; ameung’ege bik che bo oreng’ung’?

⁸ Koluu anyun lapkeiyeng’ung’ ko u karonet, ak kobiit kasoobeng’ung’ kochok: ak kondoenen imandang’ung’ ak koletun torornatetab Jehovah.

⁹ Yeityo anyun iguurse, ak kowolun Jehovah; iguure, ak kole, Ami yu. Ngot iiste chogit eng’ kwenung’ung’, kang’wererisiet, ak ng’alalet ne ya;

¹⁰ ak ngot irire che amei rubo, ak ibai kobiyo sobondo ne kinyalili: kochor anyun lapkeiyeng’ung’ eng’ mesundeito, ak koigei bet kwen mesundeitang’ung’.

¹¹ Ak kondoun Jehovah kotugul, ak kogochi sobondang’ung’ kobiyo eng’ komoswek che yaamnyotin, ak kogimit koweguk; ak iige mbaret ne kibisi, ak iige kererut ne matenyei.

¹² Ak koteech biguk karotwek che bo keny: ak ing’eet lumeiywekab ibinwek che chang’; ak keguurenen, Teegindetab ole kibutok, Kaweegunindetab ortinwek che itebe.

¹³ Ngot iiste keldang’ung’ eng’ betutab sabato, ameyai tuguk che ichame eng’ betunnyu ne tilil; ak ile boiboiyet betutab sabato, ne tilil ne bo Jehovah, ne bo teegisto; ak igonyit betunoto, amesub ortinweguk, anan icheng’ che ichame, anan imwa ng’aleguk:

¹⁴ ibaibaegei anyun Jehovah; ak agonin ilany komoswek che tororen che bo ng’ony; ak abaenen borotetab Jakobo kwandang’ung’: amu kagomwa nito kutitab Jehovah.