ISAIAH 57 - BUKUIT NE TILIL

¹ Begu che bo iman, ama iiti chi; ak kimuti bik che tinyei rirgei, amaibwati chi kole, kimuti che bo iman si mageer yaitiet ne nyonei.

² Mong’jin ole mi kalyet; imuunyi eng’ itogusiekwak, age tugul ne wendoti eng’ lititindanyi.

³ Ago origu okwek werikab chepsogeiyot, iyotetab chito ne yaei ibetab ge ak chepkugoniot.

⁴ Ourerenjini ng’o? Oseng’eng’jini ng’o, ak ochuutyini ng’elyepta? Tos ma o lagokab bistoet, iyotetab kaberberisiet,

⁵ che olaali mageng’wong’ eng’ ketik kel, eng’ kelutab ketit age tugul ne tuon; okwek che obare lagok eng’ atebwosiek, eng’ ole kibetak eng’ ruandosiek?

⁶ Mi kebebertang’ung’ koik che chaboen che bo atebwet; choto, choto ko kebebertang’ung’: kiirong’ji ichek kagochinet ne kieei, kiigochi kagochinet. Tos igoigoa tuguchuto?

⁷ Kainde itogung’ung’ tulwet ne kiwa barak ak ko koi mising’: ak kiiwe kogeny oloto igoite tiseiywek.

⁸ Ak kiitepte kit ne bo kabwateng’ung’ eng’ ole bo let eng’ kereiywek ak tugatugik: amu kiing’ang’jige age, ne ma ane, ak kiitogoste; kiibaraa itogung’ung’, ak iyai arorutiet koboto ichek: ichame itogunywa eng’ ole kiigeerji.

⁹ Ak kiiwe oldab laitoriat iibe mwanik, ak ites nyamdutiguk, ak iyokte biguk che tononun koba ole loo, ak kiitewerge agoi oldab che kigobek.

¹⁰ Kiing’et amu koindab oreng’ung’; ago kima imwa ile, Mami kamang’unet: kiinyoru kasoobetab kimnateng’ung’; ma itanui anyun.

¹¹ Ak kiiywei ng’o anyun ak itoptoben, kot imwa lembech, ak ma ibwata, ama chut ng’olyondonito muguleldang’ung’? Ma asis betusiek che chang’, ama iywea?

¹² Abortoi imandang’ung’; ama kelun kiy eng’ boisioniguk.

¹³ Ingosorun ye irire, ichek che kiiyum, ago ibei usonet ichek, ibei kabuset ichek tugul: ago namei emet kobunji, inendet ne imang’wa, ak koek tulwennyu ne tilil borotennyi.

Arorutik che kororon che bo Jehovah agobo bik che konyiti inendet

¹⁴ Ak mwaei inendet kole, Oyai, oyai, ochob oret, oiste kanagutiet eng’ oretab bikyuk.

¹⁵ Amu mwaei ko u ni Inendet ne mi barak ak ko toror ne menyei koigeny, ne Tilil kainennyi, kole, Amenye ole toror, ak ko tilil, koboto inendet agine ne kigonyeratgei eng’ tamirmiriet, ak koming’ingei, si kobiit kisoob tamirmirietab ne iming’inegei, ak kisoob mugulelwekab che inyeratigei.

¹⁶ Amu magibortosi agoi, ama kinerechi kotugul: amu katatanui tamirmiriet eng’ tainnyu, ak sobonwek che kiayai.

¹⁷ Amu kianerech agobo tengektab kasennyi ne bo miat, ak abir inendet, kiauny togennyu ak anerech: ak kites komaasak eng’ oretab muguleldanyi.

¹⁸ Kiageer ortinwekyik, ak asoobi inendet: andochini kogeny, ak aweekyi inendet kagaigaosiek koboto bikyik che rirtos.

¹⁹ Ayae logoekab kutuswek: Kalyet, kalyet, eng’ inendet ne mi ole loo ak inendet ne mi ole negit, mwaei Jehovah; ak asoob inendet.

²⁰ Ago u kiptengeginik nyanjet ne wasegei; amu maimuchi komuuny, ak wiru beekyik ng’atatek ak simdo.

²¹ Mwaei Kamuktaindennyu kole, Mami kalyet eng’ kiptengeginik.