ISAIAH 55 - BUKUIT NE TILIL

Kaberuroikab arorutiet ne leel ne kiyai Jehovah

¹ Ee chi age tugul ne amei melel, obwanjin beek, koboto inendet ne matinyei feda; obwa anyun, oal ak oam; ee, obwa, oal divaik ak chego ama eng’ feda anan eng’ alyet.

² Amu nee si oboisie feda eng’ tuguk che ma amitwogik? Ak boisieng’wong’ agobo tuguk che mobiyonyi? Oepcha it mising’, si oam che miach, ak ingoboiboitu sobonwekwok eng’ che akwaen.

³ Oeb it, ak obwanja, ogas, si kosopcho sobonwekwok: ak kiyomisyige ak okwek kayomiset ne bo koigeny, noto rirenosiek che bo iman, che bo Daudi.

⁴ Ogeero, kiagoite inendet koek aboriat eng’ bororiosiek, koek kandoindet, ak ko ng’atindet ne bo bororiosiek.

⁵ Keero, iguure bororiet ne mengen, ak kolabatyin bororiet ne kima kongenin, amu Jehovah Kamuktaindeng’ung’, ak amu Inendet ne Tilil ne bo Israel; amu kigotororin.

⁶ Ocheng’ Jehovah kota kimuchi kenyor, oguur kota ko negit:

⁷ ingometo kiptengekyot orennyi, ak ingometo inendet ne ma bo iman, kabwatutikyik: ak ingoweekyigei Jehovah, si korire; ak ingoweekyigei Kamuktaindennyo, amu nyochin kaat iman.

⁸ Amu ma chekwok kabwatutikyuk, ama chechuk ortinwekwok, mwaei Jehovah.

⁹ Amu ko u ye toror kipsengwetisiek kosiir ng’ony, ko u noto tororen ortinwekyuk kosiir ortinwekwok, ak ko tororen kabwatutikyuk kosiir kabwatutikwok.

¹⁰ Amu ko u ye roboni ak kobuti teluchi kobunu kipsengwet, ama weektagei oloto kogeny, ago ibisi ng’ony, ak kogochi tuguk kobityo ak kong’atyo, ak kogochi keswek letaindet, ak kogochi amitwogik chito ne amei;

¹¹ u noto ng’olyondennyu ne mong’une kutinnyu: maweekyinagei buch, ago yaei kosulda kit ne amache, ak koborei eng’ kit ne kiayoktochine.

¹² Amu tun omandoi eng’ boiboiyet, ak kindoiywok eng’ kalyet: tiendos eng’ taing’wong’ tulonok ak tulonok che mengechen, ak koraprab eunekwak ketik tugul che bo timin.

¹³ Bitei biribiriet kogeeri katok, ak kobit myrtle kogeer katablelinik: ak kibwate kainetab Jehovah, koek kaborunet ne bo koigeny ne magiistoi.