ISAIAH 54 - BUKUIT NE TILIL

Kaweegunet ne kiweegu Sion

¹ Tien, ee inye ne ison, ne ma ii; tien, ak iwaach, inye ne ma inyoru ng’wanindo agobo sigisiet: amu chang’ lagokab ne mi inegei kosiir lagokab osotiot, mwaei Jehovah.

² Ibaraa oldab emaing’ung’, ak ingoiito ichek angokab meng’otosieguk; ameete; igoit borooniguk, ak igimit tigongeniguk.

³ Amu inaktoi komostab eutab tai ak ne bo katam; ak konyaban iyoteng’ung’ bororiosiek, ak kogochi kemeny kogeny nganasok che kiga kelakta.

⁴ Ameiywei; amu melilani: anan itoptoben; amu magitewerin: amu iutie tewernatetab ming’inateng’ung’, ama ibwati chotisietab mosoknateng’ung’.

⁵ Amu Yaindeng’ung’ ko manong’otiondeng’ung’; Jehovah ne bo lugosiek kainennyi: ak Inendet ne Tilil ne bo Israel ko katiagindeng’ung’; kiguure inendet Kamuktaindetab ng’ony komugul.

⁶ Amu kigoguurin Jehovah ko u osotiot ne kigebagakta, ne kigigochi koarogen eng’ muguleldanyi, osotiot ne ta ko ming’in, ye kagion, mwaei Kamuktaindeng’ung’.

⁷ Kiabagakten ne matia; ago ayumin eng’ rirenet ne o.

⁸ Kiaung’enen togennyu ne matia eng’ neregek che ing’irtogei; ago arirenen eng’ talasiet ne bo koigeny, mwaei Jehovah katiagindeng’ung’.

⁹ Amu u nito eng’ ane beekab Noa: amu ko u ye kiayosie ale ma komarane emet beekab Noa kogeny, kayosie ko u noto ale manerekyinin kogeny, anan agerin kong’.

¹⁰ Amu istogei tulonok ak kiutoi tulonok che mengechen; ago maistoenengei talasiennyu, ama kiistoi kayomisennyu ne bo kalyet, mwaei Jehovah ne rirenen.

¹¹ Ee inye ne kinyalili, ne wirtoi usonet ne o, ama kigaigain, keero, alumdoi koiguk eng’ saleiywek che kororon, ak alume lumeiyweguk koik che kiguure sapire.

¹² Ak ateege irimoiguk koik che biriren, ak ayae ormarichoguk koik che kiguure bareqet, ak ayae tabanweguk tugul koik che kororon.

¹³ Ak ineti Jehovah lagoguk tugul; ak koeet kalyetab lagoguk.

¹⁴ Kigimitin eng’ imanda; ilooitu eng’ nyalilda, amu meiyweisiei; ilooitu eng’ kamuiset, amu marikyinin.

¹⁵ Keero, ngot kong’eet chi boriet, ko mabunwa: ibuti age tugul ne ing’eetyinin boriet.

¹⁶ Keero, kiayai kitang’indet ne kuutei matab nesek, si kobiit karnet ne bo boisiennyi, ak kiayai ng’emindet si kong’emis.

¹⁷ Magiberuri karnet age tugul ne kiyaei si kogirinden; ak igikyini ng’elyepta age tugul ne kirindoin eng’ kiruoget. Nito borotetab otwogikab Jehovah, ak imandanywa ne bunwa, mwaei Jehovah.