ISAIAH 53 - BUKUIT NE TILIL

¹ Ng’o ne kiiyan ng’alekyok? Ak kiging’ang’ji ng’o eutab Jehovah?

² Amu tun eetu eng’ tainnyi ko u ketit ne ng’arng’ar, ak eetu ko u tigitiot eng’ emet ne yaamat: matinyei iton anan kororonindo; ak ye kigeere inendet ko mami korornindo kot kecham.

³ Kigisas, ak kiesio bik inendet; chitab arogenosiek, ne ingen ng’wanindo: ak kigisas inendet ko u chito ne ung’e bik togochikwak, ama kiit inendet kele kiy.

⁴ Kiib iman ng’woninwekyok, ak kigesen arogenosiekyok: ago kigiit inendet kele kigibir, kibir Kamuktaindet ak konyalil.

⁵ Ago kigitoor agobo bistaosiekyok, kigiguoten agobo tengekwogikyok: kinyoru kalyennyo eng’ birennyi; ak kisoobenech birutikyik.

⁶ Ki u achek tugul kechirek che kigobetyo; kigosub age tugul eng’ achek orennyi; ak kigonde Jehovah inendet tengekwogikyok achek tugul.

⁷ Kiginyalil, ago kiiming’ingei, ma twek; kiigei inendet aruetab kechir ne kikweriei kwo ole kieng’e, ko u kechiriet ne sisei eng’ taitab bik che tilei kororikyik; ee, ma twek.

⁸ Kiginam eng’ suriet ak kiruokyi; ak ng’o ne ibwati eng’ ibindanyi kole kigiisto inendet eng’ emetab che soptos: Amu kigibir agobo bistoetab bikyuk.

⁹ Ak kiyachi inendet kererit koboto kiptengeginik, ago kigitub eng’ meennyi koboto magorek; nganda kima yai koromnatet age tugul, ama mong’une kutinnyi ng’alset age tugul.

¹⁰ Ago kicham Jehovah koguoten inendet; kiigochi arogenet; ye tun iyai sobondanyi koek kagochinet agobo tengekto, tun keerei iyotennyi, tun tesei betusiekyik, ak kotesak chametab Jehovah eng’ eunnyi.

¹¹ Tun keerei che biitune ng’wanindab sobondanyi, ak koyam; tun iityin otwogindennyu ne bo iman, imanda, bik che chang’, eng’ naennyi: ak tun ibei tengekwogikwak.

¹² Apchechini anyun inendet kebeberta koboto bik che eechen, ak kopchei barunenik koboto bik che kimen; amu kiigoito sobondanyi agoi meet, ak kigiitito bistoik: ago kigesen tengekwogikab bik che chang’, ak kisa agobo bistoik.