ISAIAH 52 - BUKUIT NE TILIL

Walaksei Jerusalem konyoru torornatet

¹ Ng’eet, ng’eet, ilaach kimnateng’ung’, ee Sion; ilaach ngoroiguk che kororon, ee Jerusalem, nganaset ne tilil: amu koboch nguno ko ma kobwanjinin che ma kimuratan ak che ma tililen.

² Lelekte temburiek; ng’eet, tebi ng’ony, ee Jerusalem: itiach ratutik che mi kaating’ung’, ee cheptab Sion ne kigeluul.

³ Amu mwaei Jehovah ko u ni kole, Kigialdak buch; ak kitiachok ama eng’ feda.

⁴ Amu mwaei Kiptaiyat Jehovah ko u ni kole, Kichortagei bikyuk eng’ tai koba Misri koek toek eng’ oloto: ak kiinyalil ichek Asuriaindet buch.

⁵ Mwaei anyun Jehovah kole, Ayae nee eng’ yu, amu kigimut bikyuk buch? Iteitos ichek che bou, mwaei Jehovah, ak kichubei kainennyu kotugul, betut komugul.

⁶ Nae anyun bikyuk kainennyu: naei anyun eng’ betunoto kole ane ne ang’alali; ogeero, ane.

⁷ Kororon ne tia eng’ tulonok, kelyekab inendet ne ibu logoiywek che miach, ne mwaitoi kalyet, ne ibu logoiywek che miach che bo mieindo, ne mwaitoi yetunet; ne mwachin Sion kolenjin, Laitorani Kamuktaindeng’ung’!

⁸ Kutitab ribiguk! Waachei ichek, tiendos kibagenge; amu tun keerei ichek togoch eng’ togoch, ye weeksei Jehovah konyonei Sion.

⁹ Oboiboitu, otiense tugul, okwek komoswek che kigemeto che bo Jerusalem; amu kigogaigai Jehovah bikyik, kigotiach Jerusalem.

¹⁰ Amu kigobarta Jehovah eunnyi ne tilil eng’ taitab bororiosiek tugul; ak keerei tabanwek tugul che bo ng’ony yetunetab Kamuktaindennyo.

¹¹ Oba, oba, omande eng’ oloto, amat otwa kiy ne ma tilil; omande eng’ kwenunnyi; otililitu, okwek che oibe tugukab Jehovah.

¹² Amu momandoi eng’ kagirgiret, anan omwei: amu indoenok Jehovah; ak letwok Kamuktaindetab Israel.

Kit ne kinyalilji Otwoginndetab Jehovah

¹³ Ogeero, boisie otwogindennyu ng’omnatet, kieeti ak kitorori, ak kotororit mising’.

¹⁴ Ko u ye kikwong’enen che chang’, (kiging’em togennyi kosiir ne bo chi age tugul, ak kiging’em itondanyi kosiir werikab bik,)

¹⁵ ibisi anyun bororiosiek che chang’; namei kut laitorinik amu inendet: amu tun keerei tuguk che kitom kemwachi ichek, ak koguiyo tuguk che kitom kogas.